“Şuşaya salam” Beynəlxalq Poeziya layihəsinin təqdimatı olub

“Şuşaya salam” Beynəlxalq Poeziya layihəsinin təqdimat mərasimi keçirilib.

525.az xəbər verir ki, tədbirin açılış nitqində çıxış edən S. Babullaoğlu layihə barədə ətraflı məlumat verib. O bildirib ki, layihəni Mədəniyyət Nazirliyi, Yazıçılar Birliyi və "Space" telekanalı təqdim edir: "44 gün olmaqla hər şair bir gün öz şeirini oxuyacaq və hər bir oxu gün ərzində “Space” telekanalında translyasiya ediləcək. Proyektin sonunda bütün şairlərin imzasıyla hazırlanmış Memorial löhvə Şuşa şəhərinə hədiyyə ediləcəkdir. Şadam ki, həmkarlarımız bu layihədə iştiraka razılıq verdilər, inanmaq istəyirəm ki, nə vaxtsa onları Bakıya, Şuşaya dəvət edə biləcəyik".

Daha sonra çıxış edən AYB sədri Anar qeyd edib ki, Yazıçılar Birliyi təbliğat işlərində hər zaman olduğu kimi bundan sonra da intensiv rol alacaq: "Biz xoşbəxtik ki, Qarabağın azad olunmasını gördük. Qarabağ məsələsi başlayandan bəri Yazıçılar Birliyi hər zaman hadisələrin mərkəzində olub. Təbliğat işimiz bundan sonra da intensiv şəkildə davam edəcək. Bu fəaliyyətin vacib ünsürlərindən biri də "Şuşaya salam" layihəsidir".

“Space” Müstəqil Teleradio şirkətinin prezidenti Müşfiq Hətəmoğlu deyib ki, otuz ildir ki, Qarabağ həqiqətləri barədə müxtəlif tribunalardan çıxışlar olub: "Lakin bu gün haqqında danışdığımız layihənin haqq işimizin təbliğində xüsusi yeri olacaq. Layihənin önəmi həm də ondadır ki, dünya ziyalıları da bizim həqiqətlərimizə qoşulur. Mən deyərdim ki, bu layihə təkcə Yazıçılar Birliyinin yox, həm də dövlətimizin uğurlu layihəsidir".

Mədəniyyət Nazirliyinin nümayəndəsi Akif Maarifli çıxışında qeyd edib ki, bu layihə dünya xalqlarının fikrində Qarabağla bağlı düzgün imic formalaşdırılmasına kömək edəcək: "Cənab prezidentimizin rəhbərliyi altında torpaqlarımız işğaldan azad olunduqdan sonra Mədəniyyət Nazirliyinin üzərinə böyük məsuliyyət düşüb. Belə ki, Qarabağ həqiqətlərinin dünyaya çatdırılmasında Mədəniyyət Nazirliyi vasitəsilə böyük işlər görülür. "Şuşaya salam" layihəsi də həmin işlərdən biridir. Bilirsiniz ki, dünyada yazıçı və şair vasitəsilə xalqın səsi çatdırılır"

Azərbaycan Yazıçılar Birliyinin birinci katibi Çingiz Abdullayev deyib ki, yaxşı yazıçı xalqın əbədiyyətdə vəkilidir: "Ümumiyyətlə, tarixdə yazıçıların kitabları qalır. Vaxtilə Homer yazdığı müharibədən bizə heç nə qalmayıb, amma Homeri oxuyanda biz bilirik ki, Troyanı necə götürüblər və biz onun yazdıqlarına inanırıq. Təbii ki, yazıçıdan da çox şey aslıdır".

Azərbaycan Yazıçılar Birliyinin sədr müavini Rəşad Məcid çıxışında layihənin önəmindən söz açıb. O bildirib ki, 2020-ci ilin oktyabrından sonra Şuşa ilə bağlı ən gözəl sözlərin müəllifi Prezident İlham Əliyev olub: "Şuşaya salam" olduqca gözəl və orjinal layihədir. Təşkilatçılara təşəkkürümü bildirirəm. Şuşa bizim müqəddəs, sevimli şəhərimizdir. Xüsusilə, qeyd etmək istərdim ki, gənc olanda Şuşa haqqında ən gözəl sözləri Anar müəllimin yazılarından oxumuşam".

Daha sonra Rəşad Məcid Anarın Şuşaya həsr etdiyi şeiri səsləndirib.

AYB-nin katibi İlqar Fəhmi bildirib ki, layihəyə xarici müəlliflərin qoşulması olduqca önəmli məqamdır: "Bəzən yazıçı və şairlərə iradlar bildirirlər ki, onlar Qarabağ zəfəri haqqında yazıb-yaratmır. Halbuki hadisələr başlamamışdan öncə də yazıçılarımız, şairlərimiz Qarabağ mövzusunda yazıb-yaradıblar. Bu layihədə isə prosesə ölkəmizdən kənarda olan söz adamları da qoşulub".

Tədbir çıxışlarla davam edib.

Qeyd edək ki, “Şuşaya salam” layihəsi 27 sentyabr - 8 noyabr tarixlərində baş tutacaq.

525-ci qəzet.- 2022.- 24 sentyabr.- S.9.