Kitabçılığın tərəqqisinə ciddi təkan

"Qanun" nəşrlər evi növbəti milli kitab sərgisini uğurla həyata keçirir

Sevindirici haldır ki, artıq dördüncü dəfə "Qanun" Nəşrlər Evinin təşkilatçılığı ilə Milli Kitab Sərgisi gerçəkləşir. 27 sentyabr 2022-ci il - tariximizə qızıl hərflərlə yazılmış İkinci Qarabağ müharibəsinin Anım günü ancaq bu qədər gözəl bir hadisə ilə qeyd edilə bilərdi. Açılış mərasiminin iştirakçılarından Fazil Mustafanın da dediyi kimi, Qarabağa qayıdış nə qədər önəmlidirsə, kitaba qayıdış da bir o qədər əhəmiyyətlidir. Çünki bu tipli sərgilər azərbaycançılığı təbliğ edir.

Çıxışçıların nitqlərindən tutmuş, tədbir üçün seçilmiş musiqilərə qədər hər şey şəhidlərimizin əziz xatirəsini yad etməyə yönəlmişdi. Skripkada "Cənab leytenant", "Sarı gəlin" ifa edilərkən gənclərin kitab mübadiləsi ilə məşğul olması çox xoş təsir bağışlayırdı. Onlar vətənin bütövlüyü, azadlığı, rifahı üçün canlarından keçdilər. Bizim, gənclər olaraq, borcumuzdur ki, onu daha da çiçəkləndirək, inkişaf etdirək. Çıxışçılardan ADİU (UNEC) rektoru Ədalət Muradov mütaliəyə diqqətin azalmasının cəmiyyətin formalaşmasında ciddi problemlər yaratdığını dedi. Bu çatışmazlıqların aradan qaldırılması üçün ən yaxın köməkçimiz isə kitablardır. Ön cəbhədə igidlər əldə silah bizi qoruyarkən rahat kreslolarda əyləşib görə biləcəyimiz işi etməsək, günah olar.

Biz gəncləri bu fəaliyyət yoluna səsləyənlərdən biri və deyərdim ki, birincisi Şahbaz Xuduoğludur. Əgər hər birimiz onun kimi işinə bağlı olsaq, ölkəmiz durmadan daha da inkişaf edər. Əllərində "cənnətə" dəvətnamə və broşüralarla küçə-küçə dolanan, indiyə qədər bir səhifə oxumamış insanları kitabları ziyarətə çağıran, gəlmək istəməyənlər çox olsa belə, səbirlə işinə davam edən, hətta getdikcə bağlanan bir tərəqqi xadimidir o. İşin ən çətin tərəfi orta yaşlıları gəlməyə razı salmaqdır. Halbuki oxumağın yaşı yoxdur. Çıxışı ilə tədbiri rəngləndirən şair Ağasəfanın da dediyi kimi, bir evdə kitab yoxdursa, orda dostluq da ola bilməz. Kitaba qayıdış mədəniyyətə qayıdışdır. Bunun üçün təkcə Bakıda yox, ölkənin hər bucağında sərgilər, təbliğatlar, təqdimatlar həyata keçirilməlidir. Milli Məclisin deputatı və Xalq şairi Sabir Rüstəmxanlı bu problemə toxunaraq kitabların kəndlərə ayaq açmasının vacibliyini vurğuladı. Çünki kitab millətin varlığını qoruyur. Rayon və kənd kitabxanalarının kasadlığı ciddi problem kimi diqqət mərkəzində saxlanılmalı, cəmiyyətin prioritetlərindən birinə çevrilməlidir. Bu gün müasir ədəbiyyatımızla tanış olmaq istəyən bir gənc şəhərdən uzaq olduğu üçün günlərlə poçtda kitabların yolunu gözləyirsə, bu, bizim üçün çox böyük ayıbdır. Düzdür, az-az olsa da, bölgələrdə yarmarkalar təşkil edilir. Bəzən Şahbaz Xuduoğlunun şikayətlərini görürük, rayon camaatının laqeydliyindən narazılıq edir. Təbii ki, bu, onu ruhdan salmır, ancaq onlara heç qəzəblənmək də lazım deyil. İnanırıq ki, getdikcə sərgilərin keçirilməsi xalq üçün bir ehtiyaca çevriləcək. Nəinki bir neçə aydan bir, hətta hər ay festivallar təşkil olunacaq, insanlar dincəlmək, vaxtlarını xoş keçirmək üçün sərgilərə üz tutacaqlar. İndiki halda oxucuların sayı az ola bilər, lakin cəmiyyət getdikcə inkişaf edir, maariflənir. Təkcə mənfiliklərə yönəlib neqativ fikirlərə qapılmayaq. Pis olduğu müddətdə mütləq yaxşı da olacaq. Daha yaxşı bir Azərbaycan, daha yaxşı bir vətən üçün kitab oxuyaq, kitab oxutduraq.

Gülşən NAİL

525-ci qəzet.- 2022.- 29 sentyabr.- S.11.