ZAKİR FƏXRİ - 75

Hörmətli Zakir müəllim!

Sizi - tanınmış şair və tərcüməçini 75 illik yubileyiniz münasibətilə təbrik edirik.

Sizin 1972-ci ildə "Azərbaycan gəncləri" qəzetində çıxan "Unutmaram", "Yollar" şeirləriniz oxucularla ilk görüşünüzdür. Sonralar dövri mətbuatda müntəzəm çıxış etmisiniz. Şeirlərinizə mahnılar bəstələnmişdir. "Qalmaz belə, qalmaz dünya" kitabınız 2009-cu ildə Azərbaycan Respublikası Mədəniyyət Nazirliyinin "Qızıl Kəlmə" mükafatına layiq görülmüşdür. "Xatirə çiçəyi", "Bir ömrün tarixi", "Yaza və yoza bilmədiyim yuxu", "Qara Məlik, Qara Qəzənfər və mən", "Qalmaz belə, qalmaz dünya", "Rekviyem", "Qaranlıqdan aydınlığa", "Bəşəri poeziya" kimi irihəcmli kitablarının müəllifisiniz. 2018-ci ildə Azərbaycan Tərcümə Mərkəzi "Şeirlər (Poems)" kitabınızı həm orijinalda, həm də ingiliscə nəşr etmişdir. "Dustaqxanadan-dustaqxanaya" romanınız, Vilyam Bleyk, Con Kits, Henri Lonqfello, Edqar Po, Uolt Uitmen, Robert Frost, Allen Ginzberq, Pol Verlen, Artur Rembo, Rober Desnos, Qarsia Lorka, Vilyam Batler, Derek Uolkott, Çeslav Miloş, Oktavio Pas, Georq Geym, Riçard Brotiqan, Vislava Simborska, Emili Dikinson, Ezra Paund və digər əcnəbi şairlərin əsərlərindən nümunələr sizin tərcümənizdə işıq üzü görmüşdür.

Siz orta məktəbin axşam şöbəsini gümüş medalla bitirmisiniz. Azərbaycan Dövlət Texniki Universitetinin məzunusunuz. Əmək fəaliyyətinə fəhləlikdən başlamısınız. 1972-1973-cü illərdə "Azərbaycan gəncləri" qəzetinin ştatdankənar müxbiri, 1985-1989-cu illərdə "Ulduz" jurnalının ədəbi işçisi, 1989-1992-ci illərdə Azərbaycan Bədii Tərcümə və Ədəbi Əlaqələr Mərkəzinin əlaqələr şöbəsinin müdiri, sədr müavini olmusunuz. 1989-cu ildən nəşr olunan "Xəzər" dünya ədəbiyyatı dərgisinin 1992-2003-cü illərdə baş redaktoru vəzifəsində işləmisiniz, hazırda baş redaktorun müavinisiniz.

Ömrünüzün 50 ilini yaradıcılığa, ədəbiyyata həsr etmiş, Azərbaycan poeziyasının inkişafına mühüm töhfələr vermisiniz.

Hörmətli Zakir müəllim, sizi bir daha yubileyiniz münasibətilə təbrik edir, sizə uzun ömür, cansağlığı, yaradıcılıq uğurları arzulayırıq.

Azərbaycan Yazıçılar Birliyi

525-ci qəzet.- 2023.- 1 aprel.- S.13.