Onların yeri hər zaman görünəcək

XALQ ARTİSTLƏRİ AZƏR PAŞA NEMƏTOV VƏ İRANA TAĞIZADƏNİN VƏFATI TEATR SƏNƏTİMİZ ÜÇÜN AĞIR İTKİ OLDU

Aprelin 9-da Azərbaycan mədəniyyəti və xüsusən teatr mühiti iki ağır itki ilə üzləşdi. Günün birinci yarısında teatr ictimaiyyəti tanınmış rejissor, Xalq artisti, Əməkdar incəsənət xadimi, Azərbaycan Dövlət Akademik Rus Dram Teatrının rejissoru İrana Tağızadənin vəfat xəbəri ilə sarsıldı. Uzun illər Azərbaycan teatr sənətini öz yaradıcılığı, quruluş verdiyi səhnə əsərləri ilə zənginləşdirən rejissor qəfil ürək tutmasından vəfat edərək onu və sənətini sevənləri dərin yasa qərq etdi. İ.Tağızadə görkəmli kinorejissor Tofiq Tağızadənin qızı, tanınmış aktyor Firdovsi Atakişiyevin həyat yoldaşı idi.

Bu xəbərin kədəri üstümüzdən sovuşmamış növbəti gözlənilməz xəbər teatr əhlini hüznə boğdu. Akademik Milli Dram Teatrının bədii rəhbəri, Teatr Xadimləri İttifaqının sədri, Xalq artisti Azər Paşa Nemətov vəfat etdi. 50 ildən artıq bir müddətdə teatr səhnəmizi quruluş verdiyi əsərlərlə zənginləşdirən, yetişdirdiyi istedadlı tələbələrlə bu sənətin inkişafına xidmət edən sənətkar ömrünün 76-cı ilində gözlərini dünyaya əbədi yumdu.

Azər Paşa Nemətov 1947-ci ildə Bakı şəhərində unudulmaz rejissor Zəfər Nemətovun ailəsində anadan olub, 31 saylı orta məktəbdə təhsil alıb. Uşaq çağlarından musiqiyə güclü duyumu, marağı varmış. Valideynləri onu Bülbül adına orta musiqi məktəbinə aparıblar. Sonra Azərbaycan Dövlət Konservatoriyasında, dünya şöhrətli bəstəkar Qara Qarayevin sinfində təhsil alıb. Tələbəlik illərində mahnılar da bəstələyib, amma gözlənilmədən yaradıcılıq istiqamətini dəyişib və 1965-ci ildə Teatr İnstitutunun rejissorluq fakültəsinə daxil olub. Məşhur rejissor Mehdi Məmmədovun kursunu bitirərək iki il sonra onun yanında assistent-müəllim işləyib. Diplom işi olan "Qardaşım klarnet çalır" (A.Aleksin, R.Rojdestvenski və O.Feltsman) Gənc Tamaşaçılar Teatrının (GTT) rus bölməsində göstərilib. 1972-ci ildə GTT-də əvvəl rejissor assistenti, sonra quruluşçu rejissor işləyib. 1974-1977-ci illərdə Sankt-Peterburq teatrında fəaliyyət göstərib. 1977-ci ildə Bakıya qayıdaraq GTT-də rejissor və baş rejissor (1983-1990) işləyib.

1990-cı aprel ayının 20-dən ömrünün sonunadək Azərbaycan Dövlət Akademik Milli Dram Teatrının quruluşçu rejissoru olub. 1991 və 1996-cı illərdə isə Teatr Xadimləri İttifaqı İdarə Heyətinin sədri seçilib. Andrey Popov adına SSRİ ümumittifaq müsabiqəsinin laureatı olub (1985). Onun tamaşaları İstanbulda, Aşqabadda, Moskvada keçirilmiş festival və müsabiqələrdə uğur qazanıb.

18 iyul 2014-cü ildə Azərbaycan Respublikasının Prezidenti yanında Bilik Fondunun Himayəçilik Şurasının üzvü seçilib. 31 avqust 2015-ci ildə Azərbaycan Dövlət Akademik Milli Dram Teatrının bədii rəhbəri-baş rejissoru vəzifəsinə təyin edilib. 6 yanvar 2016-cı ildən etibarən isə Azərbaycan Dövlət Akademik Milli Dram Teatrının baş direktoru vəzifəsində çalışıb.

A.Nemətov onlarla əsərə baxımlı, maraqlı quruluşlar verib. Təkcə Azərbaycan səhnəsində deyil, həm də xarici ölkələrin səhnəsində quruluş verdiyi əsərlərlə Azərbaycan incəsənətini, teatr sənətini ölkəmizin sərhədlərindən kənarda uğurla təmsil edib.

Xalq artisti bədii yaradıcılığı ilə 100 yaşlı Azərbaycan Dövlət Mədəniyyət və İncəsənət Universitetinin (ADMİU) uğurlu məzunlarından olmaqla yanaşı, bu universitetdə uzun müddət pedaqoji fəaliyyətlə də məşğul olub. ADMİU-nun professoru olan Azər Paşa Nemətov uzun illər universitetdə teatr sənəti üçün gənc və peşəkar kadrların hazırlanmasında mühüm rol oynayıb. Onun tələbələri bu gün həm ölkəmizin müxtəlif teatrlarında fəaliyyət göstərir, həm də sözügedən universitetdə teatr sənətinin incəliklərini tədris edərək ustadlarının yolunu uğurla davam etdirirlər.

Allah rəhmət eləsin!

Şahanə MÜŞFİQ

525-ci qəzet.- 2023.- 11 aprel.- S.9.