"Tacın qaytarılması" təqdim edildi

Azərbaycan Yazıçılar Birliyinin (AYB) "Natəvan" klubunda yazıçı Səyyad Aranın "Tacın qaytarılması" romanının təqdimat mərasimi keçirilib. Tədbirdə AYB-nin sədri, Xalq yazıçısı Anar, millət vəkili, akademik Nizami Cəfərov, müəllifin qələm dostları, tanınmış ədəbiyyat və ictimaiyyət nümayəndələri, oxucular iştirak ediblər.

Təqdimatı giriş sözü ilə açan AYB katibi Elçin Hüseynbəyli S.Aranın yaradıcılığı haqqında fikirlərini bölüşüb, "Tacın qaytarılması" romanının məziyyətlərindən bəhs edib. O bildirib ki, roman İkinci Qarabağ müharibəsinə, xüsusən isə Azərbaycan Respublikasının Prezidenti İlham Əliyevin "Qarabağın tacı" adlandırdığı Şuşanın işğaldan azad edilməsinə həsr olunub.

Millət vəkili, akademik Nizami Cəfərov çıxışında Vətən Müharibəsinə, Qarabağ Zəfərinə həsr olunmuş bu cür əsərlərin yazılmasının vacibliyindən söz açıb, təəssüflə qeyd edib ki, şanlı qələbəmizdən üç il keçməsinə baxmayaraq, hələ bu haqda yalnız iki roman yazılıb və onlardan biri Səyyad Aranın "Tacın qaytarılması" əsəridir. Əsərin bədii keyfiyyətlərini yüksək qiymətləndirən akademik, müəllifə və əsərin gələcək taleyinə uğurlar arzu edib.

Tənqidçi Vaqif Yusifli S.Aranın Qarabağ müharibəsinə həsr olunmuş "Başdaşı" və "İrəvana gedən yollar" romanlarını xatırladaraq, "Tacın qaytarılması" əsərini müəllifin müharibə mövzulu trilogiyasının hələlik son hissəsi kimi qiymətləndirib. Nizami Cəfərov, Vaqif Yusifli və Elçin Hüseynbəyli çıxışlarında bu romana bədii film çəkilməsinin vacibliyindən bəhs edib, kino işçilərini bu haqda düşünməyə çağırıblar.

AYB katibi Səlim Babullaoğlu da roman barədə düşüncələrini dilə gətirərək, S.Aranın son dərəcə mühüm bir mövzuda diqqətçəkən əsər ortaya qoyduğunu qeyd edib.

Mənzər Şahniyarlı, Mübariz Əhmədoğlu, Qəşəm Nəcəfzadə, Mübariz Mənsimoğlu, Jalə Cəfərova, Səxavət Talıblı, Əli Nur, Narıngül Nadir, Sevil Gültən, Aqil Əhmədov və başqaları da təqdim olunan əsər haqqında fikirlər söyləyib, müəllifə yeni yaradıcılıq uğurları diləyiblər.

Sonda çıxış edən Səyyad Aran əsərin yazılma prosesindən danışıb, bu mövzuda əsər yazmağı bir ədəbiyyatçı kimi özünün mənəvi borcu hesab etdiyini vurğulayıb və kitabını tədbir iştirakçıları üçün imzalayıb.

ŞAHANƏ

525-ci qəzet.- 2023.- 27 aprel.- S.9.