Sənə salam göndərirəm

Sənə salam göndərirəm

Buz dövrünün şaxtasından,

Aram-aram göndərirəm,

Qara dəniz yaxtasından.

Sənə salam göndərirəm,

Salam alan əlin yoxdu,

Uzadıram əllərimi,

Kipriyin var, telin yoxdu.

Sənə salam göndərirəm,

Mesaj bir xətt üstündədir.

Gözəyarı oxusan da,

Məndən çıxıb köksündədir.

Sənə salam göndərirəm

Vəziyyətim xoş görünür.

Gec yatıram, ayılmıram,

Dursam hər şey boş görünür.

Sənə salam göndərirəm,

Xala-xətrin qalmasıntək.

Sən xətrimə dəyən gündən,

Xətrim bir gün qalmayıb tək.

Sənə salam göndərirəm

İlk maaşın sevincindən.

O sevinci bol xərclədin,

Nədir səni bəs incidən?

Sənə salam göndərirəm

Gecələrin zülmətindən,

Səhər necə zor açılır,

Xəbərin yox qiyamətdən.

Sənə salam göndərirəm,

Bax, bu gecə şeir yazdım.

İlham pərim sənə sarı,

Yenə yoldan çıxıb azdım.

Sənə salam göndərirəm,

Bir salama dəyməsə də.

Bilirəm çox narahatdı

Üz-gözünü əyməsə də.

Sənə salam göndərirəm

İpəzordan aslı qalıb.

Qurumayan ağ köynəkdən

Sən almışdın paslı qalıb.

Sənə salam göndərirəm

Yusifin Züleyxasından.

Sadiq qulam göndərirəm

Yapışmışam yaxasından.

Sənə salam göndərirəm.

Füzulinin Leylisindən,

Nizaminin Məcnundan

İstəyirsən əllisindən

Göndərsəm də, çatan deyil.

Elnur Eldaroğlu

525-ci qəzet.- 2023.- 12 avqust.- S.15.