Ulu öndər və Azərbaycan gəncliyi

Gəncliyin sağlam ruhlu, savadlı, yüksək mənəvi tərbiyəyə malik olması dövlət üçün önəmlidir. Cəmiyyətin gələcəyi gənclərdir və öz gələcəyini düşünən hər bir cəmiyyət gənclərə qayğı göstərir. Bu gün Azərbaycanın tərəqqisində, onun iqtisadi, siyasi və mədəni həyatında gənclərin rolu danılmazdır. Təsadüfi deyildi ki, ölkəmizdə aparılan ardıcıl və sistemli islahatları həmişə diqqət mərkəzində saxlayan Ümummilli lider Heydər Əliyev bütün bu proseslərdə gənclərin roluna daima böyük önəm verir, müxtəlif dövlət qurumlarda gənclərin fəal iştirakını təmin edirdi.

Ümummilli lider Heydər Əliyev gənclərlə bağlı məsələləri həmişə öz siyasətinin əsas tərkib hissələrindən biri hesab edib. Heydər Əliyevin hələ 1969-1982-ci illərdə respublikaya rəhbərlik etdiyi dövrlərdə yüzlərlə yeni tədris ocaqları, gənclik mərkəzləri, hərbi məktəblər açılır, minlərlə azərbaycanlı gənc keçmiş SSRİ-nin nüfuzlu ali məktəblərində təhsil alır, müasir ixtisaslara yiyələnirdilər. Heydər Əliyevin şəxsi təşəbbüsü və qayğısı sayəsində o zamanlar Sovetlər İttifaqının 50-dən artıq iri şəhərinin 170 nüfuzlu ali məktəbində bütövlükdə 80-dək sahəni əhatə edən 150 ixtisas üzrə 15 min nəfərdən çox azərbaycanlı gəncin ali təhsil almasına, yüksək ixtisaslı mütəxəssis kimi hazırlanmasına şərait yaradılmışdı.

Təəssüf ki, sonradan bir müddət bu ənənə davam etdirilmədi, 1988-993-cü illərdə ölkə gəncliyi ictimai-siyasi proseslərdən kənarda qaldı, onun potensialı lazımınca qiymətləndirilmədi. Ölkədə gənclər siyasəti demək olar ki, unudulmuşdu. Həmin dövrdə qeyri-sağlam ictimai-siyasi vəziyyət təhsil sisteminin iflic hala düşməsinə gətirib çıxarmış, müxtəlif qrupların hakimiyyət uğrunda çəkişmələrində yeniyetmələrin potensialından sui-istifadə halları gəncliyin mənəvi-psixoloji böhran vəziyyətinə düşməsi ilə nəticələnmişdi. Lakin Ulu öndər Heydər Əliyevin xalqın təkidli tələbi ilə yenidən hakimiyyətə gəlişindən sonra bu vəziyyət kökündən dəyişdi. Ümummilli lider Heydər Əliyev ilk görüşlərdən birini məhz gənclərlə keçirdi. 1993-cü ilin sentyabrında Milli Məclisdə gənclərin nümayəndələri ilə görüşündəki çıxışında Ulu öndər onlara dərin inam bəslədiyini ifadə etdi.

Ulu öndərimiz Heydər Əliyevin bu sahədə həyata keçirdiyi siyasət gənc nəslin mənəvi-əxlaqi tərbiyəsinin gücləndirilməsinə, sosial rifahının yaxşılaşdırılmasına və zəngin elmi potensialın yaradılmasına xidmət edirdi. Gənclərin ictimai-siyasi həyatda fəallığını artırmaq üçün həyata keçirilən Dövlət Proqramının tətbiqi, idarəetmə orqanlarında gənc mütəxəssislərə üstünlük verilməsi Ümummilli lider Heydər Əliyev tərəfindən müəyyənləşdirilmiş gənclər siyasətinin uğurlu nəticəsidir.

Ölkəmizdə gənclərlə iş sahəsində mühüm tədbirlərin gerçəkləşdirilməsi Ulu öndərin adı ilə bağlıdır. Həyata keçirilən gənclər siyasətinin başlıca məqsədi milli dəyərlərə söykənən, vətəninə, xalqına bağlı olan müasir düşüncəli gənc nəslin formalaşdırılması, gəncliyin potensialından dövlətin inkişafı naminə istifadə edilməsidir. Bu səbədən də 1994-cü ilin iyulunda dövlət başçısının fərmanı ilə Gənclər və İdman Nazirliyi yaradıldı və dövlətin gənclərlə bağlı siyasəti vahid mərkəzdən idarə olunmağa başladı.

Ulu öndərimizin gənclərlə çoxsaylı görüşü, onlara verdiyi dəyərli tövsiyələr gənclərin ümummilli maraqlar və dövlət mənafeyi ətrafında birləşmələrinə xidmət edirdi. Bunun məntiqi nəticəsi idi ki, 1996-cı il fevralın 2-də Azərbaycan Gənclərinin Birinci Formu keçirildi. Formda geniş və dərin məzmunlu nitq söyləyən Ulu öndər Heydər Əliyev Azərbaycan gəncliyinin daha uğurlu sabahına inandığını vurğuladı. Həmin dövrdə gənclərin problemlərinin həllini təmin edən fərmanların imzalanması, qanunların qəbulu, gənclərin dövlət quruculuğunda fəal iştiraka cəlb olunması gənclər siyasətinə mühüm töhfə verdi. Bununla da Azərbaycan gəncinin tam hüquqlu vətəndaş kimi öz gələcəyinə sahib çıxması və ona göstərilən ehtimadı doğrultmağa çalışması üçün bütün şərait yaradıldı. 1997-ci il 2 fevral tarixli prezident fərmanı ilə həmin tarix "Azərbaycan Gəncləri Günü" elan edildi.

Böyük fərəh hissi ilə deyə bilərik ki, bu gün də dövlətimiz gənclərə xüsusi diqqət və qayğı göstərir. Ümummilli liderimiz Heydər Əliyevin gənclər siyasəti onun layiqli davamçısı, dövlət başçısı İlham Əliyev tərəfindən uğurla davam etdirilir. Bu siyasət idmana göstərilən dövlət qayğısı ilə də öz əksini tapır. Bu gün Azərbaycan dünyanın qabaqcıl idman ölkələrindən birinə çevrilib. Azərbaycanın müxtəlif bölgələrində Olimpiya komplekslərinin açılması, ölkəmizin nüfuzlu beynəlxalq idman yarışlarına evsahibliyi etməsi buna əyani sübutdur.

Hələ 2003-cü ildə cənab Prezident İlham Əliyevin seçkiqabağı platformasında prezident seçiləcəyi təqdirdə ölkədə 600 min yeni iş yerlərinin açılacağı bildirilirdi. Seçkilərdə xalqın etimadını qazandıqdan sonra möhtərəm Prezident öz vədinə sadiq qalaraq ölkənin, xüsusən də regionların inkişafına diqqət yetirməyə başladı. Bununla bağlı xüsusi dövlət proqramı təsdiq edildi. Qəbul olunmuş proqram nəticəsində regionlarda yeni istehsal və xidmət müəssisələri istifadəyə verildi, iri infrastruktur layihələrin həyata keçirilməsinə başlandı.

Ümummilli liderimiz Heydər Əliyevin əsasını qoyduğu inkişaf və tərəqqi siyasəti nəticəsində bu gün ölkəmiz yeni bir inkişaf dövrünə qədəm qoyub. Artıq Prezident İlham Əliyevin uğurlu siyasətinin nəticələri özünü əhalinin rifah halının yüksəlməsində və iqtisadi inkişaf sahəsində göstərməkdədir. Bu gün hər bir Azərbaycan gənci Ümummilli lider Heydər Əliyevin ideyalarını öz fəaliyyətində daim rəhbər tutur, möhtərəm Prezidentimiz İlham Əliyevin rəhbərliyi altında Azərbaycanın müstəqilliyinin əbədi yaşaması üçün əlindən gələni əsirgəməməyə çalışır.

Günel HƏSƏNOVA

"Binəqədi Gənclər Evi" sosial xidmət müəssisəsinin direktoru

525-ci qəzet.- 2023.- 25 avqust.- S.6.