"Heydər Əliyevin dövlətçilik idealları və müasir gənclik"

BU MÖVZUDA GƏNCƏ ŞƏHƏRINDƏ KEÇIRILƏN RESPUBLIKA ELMI KONFRANSI ULU ÖNDƏRIN IRSININ TƏDQIQ VƏ TƏBLIĞINƏ LAYIQLI TÖHFƏ OLDU

Prezident İlham Əliyevin Azərbaycan Respublikasında 2023-cü ilin "Heydər Əliyev İli" elan edilməsi haqqında 29 sentyabr 2022-ci il tarixli Sərəncamından irəli gələrək iyunun 25-də Gəncədə Şəhər İcra Hakimiyyətinin dəstəyi, AMEA Rəyasət Heyəti, Akademiyanın Gənc Alim və Mütəxəssislər Şurası və Gəncə Bölməsinin təşkilatçılığı ilə "Heydər Əliyevin dövlətçilik idealları və müasir gənclik" mövzusunda respublika elmi konfransı keçirildi. AMEA prezidenti akademik İsa Həbibbəylinin bu konfrans çərçivəsində Gəncə şəhərinə səfəri zamanı AMEA müəssisələrini, Mir Cəlal Paşayevin Ev Muzeyini, Bitki Mühafizəsi və Texniki Bitkilər ETİ-ni ziyarət etməsi və digər işgüzar görüşləri dövlətimizin bu sahədə həyata keçirdiyi uğurlu siyasətə daha bir töhfə oldu.

Akademik İsa Həbibbəyli bu barədə söz açarkən bildirdi: "Heydər Əliyevin dövlətçilik idealları və müasir gənclik" mövzusunda respublika elmi konfransında həm AMEA-nın Bakıdakı elmi tədqiqat institutlarından olan gənc nümayəndələr, həm də AMEA Gəncə Bölməsinin müxtəlif institutlarının gəncləri də məruzələrlə çıxış edirlər. Bu konfrans eyni zamanda Ulu öndər Heydər Əliyevin ideallarının işığında müasir elmi gəncliyin formalaşdırılması və Heydər Əliyevin şəxsiyyətinin miqyasını, ideallarını, mübarizəsini yeni nəsillərə çatdırmaq missiyasını daşıyır. Hesab edirəm ki, bu, AMEA-nın özünün ehtiyat qüvvəsi olan yeni gəncliyin dövlətçilik ruhunda, azərbaycançılıq ruhunda tərbiyə rolunun inkişaf etdirilməsi üçün atılan əhəmiyyətli addımlardan biridir".

Konfransda AMEA prezidenti akademik İsa Həbibbəyli, Gəncə şəhər icra hakimiyyətinin başçısı Niyazi Bayramov, AMEA-nın birinci vitse-prezidenti akademik Arif Həşimov, AMEA-nın Gəncə Bölməsinin sədri akademik Fuad Əliyev, Gəncə şəhər icra hakimiyyəti başçısı Aparatının məsul əməkdaşları, tanınmış elm xadimləri, gənc alimlər, mütəxəssislər və ziyalılar iştirak etdilər.

Tədbirdən əvvəl iştirakçılar Ulu öndər Heydər Əliyevin Gəncənin mərkəzindəki abidəsini ziyarət edərək, önünə gül dəstələri qoydular.

Sonra AMEA Gəncə Bölməsində Ulu öndər Heydər Əliyevin həyat və fəaliyyətinə həsr edilmiş sərgiyə baxış keçirildi.

Konfrans Bölmənin böyük akt salonunda gerçəkləşdi. Akademik İsa Həbibbəyli giriş sözündə "Heydər Əliyevin dövlətçilik idealları və müasir gənclik" mövzulu, iyunun 22-də Bakı şəhərində AMEA-nın dairəvi akt zalında başlayan 4 günlük respublika elmi konfransının Gəncədə davam etdirildiyini və burada yekunlaşdığını vurğuladı. Bu işdə hərtərəfli dəstəyə görə o, Gəncə şəhər icra hakimiyyətinin və AMEA Gəncə Bölməsinin rəhbərliyinə təşəkkür edərək, konfransın daha bir bölmə iclasının da bu elm ocağında keçirildiyini xatırlatdı.

İ.Həbibbəyli Ulu öndər Heydər Əliyevin daim Azərbaycan gəncliyinə xüsusi diqqət yetirdiyini, onların təhsilli, vətənpərvər ruhda, milli kimliklərinin və şəxsiyyətlərinin azərbaycançılıq ideyası işığında formalaşmasına önəm verdiyini bildirdi. Qeyd etdi ki, ölkə başçısının müvafiq sərəncamının işığında AMEA tərəfindən Ulu öndərin həyat və fəaliyyətinə dair 39 yüksək səviyyəli konfrans, seminar, simpozim və digər elmi toplantların keçirilib, bu tədbirlərdə dünyanın bir çox ölkələrindən tanınmış alimlər də iştirak ediblər.

Akademik İsa Həbibəyli Ümummilli lider Heydər Əliyevin 100 illik yubileyi münasibətilə AMEA tərəfindən dahi şəxsiyyətin zəngin dövlətçilik təliminin müxtəlif aspektlərinə həsr edilmiş çoxsaylı elmi əsərlər nəşr olunduğunu bildirdi. O, həmçinin Ulu öndərin həyat və fəaliyyətinin öyrənilməsinin elmi-populyar müstəvidən fundamental elmi araşdırmalar səviyyəsinə qaldırılmasını təqdirəlayiq hal kimi dəyərləndirdi. AMEA tərəfindən ilk dəfə olaraq, "Heydər Əliyev Ensiklopediyası"nın nəşrə hazırlandığını diqqətə çatdırdı.

Ümummilli liderin irsinin dərindən araşdırılmasına nümunə kimi, akademik İsa Həbibbəyli "Heydər Əliyev İli"nə AMEA Gəncə Bölməsinin töhfəsi olan "Heydər Əliyev və Gəncə" monoqrafiyasını təqdim etdi. Ulu öndərin fəaliyyətinin Gəncə ilə bağlı taleyüklü anlarının, o cümlədən Gəncənin iqtisadi və mədəni intibahı, dövlətçiliyimizi təhdid edən qiyam cəhdinin qarşısının alınması və digər proseslərin təfərrüatlarının, onlara aid sənəd və fotoların da bu monoqrafiyada yer aldığını vurğuladı.

Çıxışının sonunda akademik İsa Həbibbəyli Gəncə şəhəri icra hakimiyyətinin başçısı Niyazi Bayramova AMEA tərəfindən ərsəyə gətirilən "Qırmızı Kitab"ın nəşrlərini hədiyyə etdi. Həmçinin Ədəbiyyat İnstitutu tərəfindən hazırlanmış "Heydər Əliyev və Azərbaycan ədəbiyyatı" ikicildliyi AMEA Gəncə Bölməsinə hədiyyə edildi.

Tədbirin sonunda bir qrup gənc alimə elmi konransın işində fəal iştiraklarına, eləcə də məhsuldar tədqiqat fəaliyyətlərinə görə diplomlar və təşəkkürnamələr təqdim olundu.

Gəncə şəhərinə səfəri çərçivəsində akademik İsa Həbibbəyli və digər nümayəndələr burada Elm və Təhsil Nazirliyinin tabeliyindəki Elmi Tədqiqat institutlarının və AMEA Gəncə Bölməsinin tərkibində fəaliyyət göstərən Humanitar Tədqiqatlar İnstitutunun, Nizami Gəncəvi Mərkəzi və Diyarşünaslıq İnstitutunun iş şəraiti, maddi-texniki bazası, fəaliyyəti ilə tanış oldular. AMEA Gəncə Bölməsinin mövcud problemləri və gələcək inkişaf perspektivləri ilə bağlı müzakirələr aparıldı.

Akademik İsa Həbibbəyli və digər qonaqlar Azərbaycanın görkəmli yazıçısı, ədəbiyyatşünas, filologiya elmləri doktoru, professor, Əməkdar elm xadimi Mir Cəlal Paşayevin Gəncə şəhərində fəaliyyət göstərən Ev-Muzeyini ziyarət etdilər.

Qonaqlara məlumat verildi ki, muzey və onun nəzdində elmi-ədəbi tədqiqat şöbəsi Azərbaycan nəsrinin və ədəbiyyatşünaslıq elminin görkəmli nümayəndəsi Cəlal Paşayevin 100 illik yubileyi ərəfəsində ədibin xatirəsinə ehtiram əlaməti olaraq yaradılıb. Mir Cəlal Paşayevin Ev-Muzeyinin Gəncə şəhərində fəaliyyət göstərməsi təsadüfi deyil. Çünki o, Cənubi Azərbaycanda anadan olsa da, tale onu qədim Gəncə şəhərinə gətirib çıxarıb. Ədib həmişə Gəncəni sevib və doğma şəhəri bilib. Mir Cəlal Paşayevin uşaqlıq, gənclik və tələbəlik illəri, pedaqoji və ədəbi fəaliyyəti, ailə həyatı xronoloji ardıcıllıqla muzeyin ekspozisiyasında əksini tapıb. Hazırda eksponatların sayı 300-dən artıqdır. Muzey kompleksində 2009-cu ilin aprel ayında elmi-ədəbi tədqiqat şöbəsi fəaliyyətə başlayıb. Şöbənin yaradılması ədəbiyyatımızın tədqiqinə, araşdırılmasına xidmət edir. Burada mütəmadi olaraq şair və yazıçıların kitab təqdimatları, şəhər ziyalıları ilə görüşlər, konsertlər, şagird və tələbələr üçün ədəbiyyat dərsləri, ekskursiyalar və digər ədəbi-bədii tədbirlər keçirilir. Muzey fəaliyyətə başladığı gündən şəhər əhalisinin, tələbə və şagirdlərin ziyarətgahına çevrilib.

Sonda AMEA prezidenti akademik İsa Həbibbəyli Mir Cəlal Paşayevin Ev-Muzeyinin xatirə dəftərinə öz ürək sözlərini yazdı: "Mir Cəlal Paşayev sovet hakimiyyəti illərində yaşayıb-yaratmış, lakin sovet ideologiyasına öz əsərlərində yer verməmiş, əsl gerçək həyatı və sadə insanları əks etdirmiş görkəmli yazıçıdır. Mir Cəlal ədəbiyyatda həyat həqiqətlərinin və sadə insanların manifestini yaratmışdır. Mir Cəlalın Ev Muzeyi də onun həyatı və yaradıcılığı kimi sadə və mənalıdır. Bu Ev-Muzeyi həm də Mir Cəlal müəllimin dövrünü və müasirlərini əks etdirir. Muzey Mir Cəlal Paşayevin həm həyatını və həm də yaradıcılığını, mühitini və müasirlərini yeni nəsillərə bütün reallıqları və aydınlığı ilə təqdim edir".

Bitki Mühafizə və Texniki Bitkilər Elmi-Tədqiqat İnstitutunun direktoru, aqrar elmlər üzrə elmlər doktoru, professor, AMEA-nın müxbir üzvü İbrahim Cəfərovun dəvəti ilə mötəbər qonaqlar bu institutda da oldular. Akademik İsa Həbibbəyli AMEA tərəfindən ərsəyə gətirilən "Qırmızı Kitab"ın nəşrlərini direktor İbrahim Cəfərova hədiyyə etdi.

Əlimuxtar MUXTAROV

525-ci qəzet.- 2023.- 7 iyul. S. 11.