Kukla Teatrının daha bir uğurlu həftəsi

Ümummilli lider Heydər Əliyevin 100 illiyi ilə tariximizə həkk olunan 2023-cü il həm də Azərbaycan peşəkar milli teatrının 150 illik yubileyi ilə əlamətdardır. İl boyunca xüsusən, mədəniyyət qurumları və teatrlarımız bu möhtəşəm yubileyləri özündə birləşdirən mühüm və maraqlı layihələr həyata keçirməyə davam etməkdədir. Bunlardan birini - çox gözəl teatr bayramını ötən həftə Abdulla Şaiq adına Azərbaycan Dövlət Kukla Teatrı sayəsində yaşadıq.

Mədəniyyət Nazirliyinin dəstəyi ilə 13-17 iyun tarixlərini əhatə edən "Kukla teatrları həftəsi" təkcə ölkənin kukla teatrları arasında deyil, həm də ümumən teatr camesində və ictimaiyyətdə böyük maraqla qarşılandı.

İyunun 13-də Azərbaycan Dövlət Kukla Teatrında tədbirin təntənəli açılış mərasimi oldu.

Mədəniyyət Nazirliyi təmsilçilərinin, ədəbiyyat və incəsənət, teatr xadimlərinin, eləcə də beynəlxalq teatr təşkilatı və festivalları təmsilçilərinin iştirak etdiyi sənət bayramı ev sahiblərinin təqdimatında "Nağılvari" adlı tamaşa çələngi ilə başladı.

Ardınca teatr həftəsində təmsil olunan kollektivlərin yaradıcılıq yoluna qısa nəzər olan video-çarx təqdim edildi.

Tədbir teatr həftəsinin ilk qonaq kollektivi - Gəncə Dövlət Kukla Teatrının təqdimatında "Ana qaz" tamaşasının nümayişi ilə davam etdi.

Xalq şairi Rəsul Rzanın "Ana qaz" şeirinin motivləri əsasında hazırlanan eyniadlı birhissəli uşaq tamaşasının quruluş müəllifi teatrın baş rejissoru Şamil Məmmədli, quruluşçu rəssamı Məhəmməd Hacıyev, xoreoqrafik həll müəllifi Fərmail Paşayev, musiqi tərtibatçısı Şamil Məmmədlidir.

Yeddi balasını itirən ana qazın faciəsini ifadə edən xoreoqrafik tamaşada Zülfiyyə Əliyeva, Naidə Namazova, Səməd Xanəhmədov, Yeganə Məmmədova, Elmar Vəliyev, Nərmin Şərifova və başqaları rol almışdılar.

Alqışlarla qarşılanan nümayişin ardınca Azərbaycan Dövlət Kukla Teatrının direktoru, Əməkdar mədəniyyət işçisi Rəşad Əhmədzadə gəncəli kuklaçılara fəxri diplom və xatirə hədiyyələri təqdim etdi.

Teatr bayramının ikinci günü isə Qax Dövlət Kukla Teatrının yaradıcı heyəti öz sənət sovqatlarını təqdim etdilər. Onlar paytaxt kuklasevərlərinə repertuarlarındakı baxımlı səhnə nümunələrindən olan "Xeyir və Şər" adlı pantomima kukla tamaşalarını təqdim etdilər.

Dahi Azərbaycan şairi və mütəfəkkiri Nizami Gəncəvinin "Xeyir və Şər" əsəri əsasında hazırlanmış eyniadlı tamaşanın quruluş müəllifi Əməkdar artist Yusif Abdurahmanov, quruluşçu rəssamı Mayis Abdullayevdir.

Kukla texnikası ilə canlı plan, eləcə də pantomimanın sintezi olan birhissəli uşaq tamaşasında rollar Orxan Əminov, Araz Mehrablı, Nuru Mustafayev, Azər Kərimov, Aynurə Abbasova və Elnarə Razıyevaya tapşırılmışdı.

Anşlaqla keçən nümayişin ardınca qaxlı kuklaçılara da tədbirdə iştirak ilə bağlı fəxri diplom və xatirə hədiyyələri təqdim olundu.

İyunun 15-də Salyan Dövlət Kukla Teatrı "Kəloğlan" tamaşası ilə layihədə çıxış etdilər. Tamaşada aktyorlar Nahid Rüstəmbəyli, Mirxədicə Mirzəyeva, Nərmin Hüseynli və Röyal Qurbanov iştirak edirlər. Onlara da tamaşa sonra layihədə iştirakları münasibəti ilə fəxri fərman və hədiyyələr verildi.

Xatırladaq ki, ölkəmizdə fəaliyyət göstərən kukla teatrlarının yaradıcılıq əlaqələrini daha da genişləndirmək, təcrübə mübadiləsinə nail olmaq, qarşılıqlı səfərlərin yeni mərhələsinə keçmək və bölgə teatrlarının yaradıcılıq imkanlarını paytaxt teatrsevərlərinə təqdim etmək məramlı teatr tədbiri ölkənin bütün kukla teatrlarını əhatə edirdi.

Tamaşa həftəsində nümayişlər Azərbaycan Dövlət Kukla Teatrının böyük səhnəsində "açıq qapı" formatında reallaşırdı. Burada əsas məqsəd səhnə nümunələrinin bütün teatrsevərlər üçün əlçatan olması idi.

İyunun 17-də Mədəniyyət Nazirliyi, mədəniyyət və incəsənət təmsilçilərinin iştirakı ilə sənət bayramının bağlanış mərasimi keçirildi.

Azərbaycan Dövlət Kukla Teatrının direktoru, Əməkdar mədəniyyət işçisi Rəşad Əhmədzadə ideyanın reallaşmasına dəstək olan Mədəniyyət Nazirliyinə, iştirakçı teatrlara və tamaşaçılara təşəkkürünü bildirdi.

Yeni yaradıcılıq əlaqələrinin formalaşdırılması, təcrübə mübadiləsinin genişləndirilməsi və bölgədə fəaliyyət göstərən kukla teatrlarının yaradıcılığının diqqət mərkəzinə gətirilməsi məramı bu ilk ideyanın qarşıdakı illərdə ənənə halını alacağına inamını da ifadə etdi. Bildirdi ki, növbəti mərhələdə layihənin beynəlxalq miqyasa çıxması üçün başqa ölkələrdən mütəxəssislər ilə yanaşı teatrlar da dəvət olunacaq.

Mərasimdə çıxış edən qonaq teatrların rəhbərləri - Salyan Dövlət Kukla Teatrının direktoru, Əməkdar mədəniyyət işçisi Laləzər Hüseynova, Qax Dövlət Kukla Teatrının baş rejissoru, Əməkdar artist Yusif Abdurahmanov tədbirdə iştirakdan məmnunluqlarını ifadə etdilər, bu kimi görüşlərin teatrların yaradıcılıq potensialının nümayişi və müqayisələr üçün önəm kəsb etdiyini dedilər.

Tədbir proqrama uyğun olaraq ev sahibi teatrın təqdimatında "Qar kraliçası" tamaşası (A.Məmmədov) ilə davam etdi. Ardınca teatrın nəzdindəki "Oyuq" teatr-studiyası təmsilçilərinin ifasında rəngarəng mahnılar səsləndirildi.

5 gün boyunca davam edən "Kukla teatrı həftəsi" regionlarda məhdud imkanlarla belə olsa Azərbaycan mədəniyyətinə, incəsənətinə xidmətə davam etməyə çalışan teatrların özlərini və fəaliyyətlərini göstərmək üçün ən gözəl fürsətlərdən biri idi.

Bu baxımdan Salyan Dövlət Kukla Teatrının direktoru, Əməkdar mədəniyyət işçisi Laləzər Hüseynovanın təəssüratları maraq doğrur: "Rəşad Əhmədzadə bizi bu layihəyə dəvət edəndə çox sevindim. Çünki təkcə bölgələrdə oynamaq olmaz, bölgələr də şəhərə gəlməli, böyük səhnələrdə çıxış etməlidir. Bu layihə teatrlar arasında yaradıcılıq mübadiləsinə səbəb oldu, bizi ruhlandırdı. Teatrların kollektivləri bir-birini tanıdı, bir-birləri ilə dostlaşdılar. Təşkilatçılara öz minnətdarlığımı bildirirəm. Burada tamaşamız oynanılarkən uşaqların və valideynlərinin marağı məni çox sevindirdi. Həqiqətən də ictimaiyyətdə Kukla Teatrına maraq və sevgi var. Bu cür layihələrin davamlı olçasını arzu edirəm".

Gəncə Dövlət Kukla Teatrının direktoru Fərmayıl Paşayev isə "Kukla Teatrları həftəsi"ni bir bayram kimi dəyərləndirir: "Bu, bir bayramdır, dostluq görüşüdür. Burada teatr kollektivləri bir-biri ilə tanış olur, öz işlərini təqdim edir, təcrübə mübadiləsi yaranır, əlaqələr genişlənir. İnanıram ki, layihə gələcəkdə daha da inkişaf edərək öz işini davam etdirəcək".

Qax Dövlət Kukla Teatrının rejissoru Yusif Abdurahmanova görə, ötən il 50 yaşını qeyd edən teatr üçün bu layihə də əhəmiyyətli yerə sahibdir: "Kukla Teatrında təkcə uşaqlar üçün yox, böyüklər üçün də tamaşalar hazırlanır. Bizim layihəyə qatıldığımız tamaşa da məhz böyüklər üçün nəzərdə tutulmuşdu. Bu festivalın keçirilməsinin əhəmiyyəti çox böyükdür. Kukla Teatrı bir təməldir. Biz uşaqlarımızı gələcəyə yaxşı bir tamaşaçı kimi hazırlayırıq. Ümid edirəm ki, gələcəkdə bu festivalın əhatə dairəsi daha da genişlənəcək və biz xarici ölkələrdən də bu festivalda iştirak etmək üçün Kukla teatrlarını dəvət edəcəyik".

Bəli, ilk dəfə keçirilən "Kukla Teatrları həftəsi" hələlik cəmi 4 teatrın iştirakı ilə gerçəkləşdi. Ancaq əsas məsələ odur ki, təşkilatçılar öz məqsədlərinə nail olmağı bacardılar: region teatrlarımız paytaxt sakinlərinə öz fəaliyyətlərini, yaradıcılıq işlərini nümayiş etdirdi, kollektivlər bir-birinin potensialına bələd oldular. Ən önəmlisi isə, bütün uğurlu layihələrin sonunda olduğu kimi, Azərbaycan teatrı qazandı!

Şahanə MÜŞFİQ

525-ci qəzet.- 2023.- 20 iyun.- S.10.