Professor Qəzənfər Paşayevdən Mədəniyyət Nazirliyinə müraciət

Əməkdar elm xadimi, professor Qəzənfər Paşayev mədəniyyət nazirinin birinci müavini, nazir vəzifəsini müvəqqəti icra edən Adil Kərimliyə məktubla müraciət edib.

Məktubda deyilir ki, bu il fevralın 23-də Milli Kitabxanada istiqlal şairi Əhməd Cavadın 130 illiyi münasibətilə keçirilən tədbirdə Nazirliyinizin və Milli Kitabxananın nəşr etdiyi "Əhməd Cavad. Biblioqrafiya" və TÜRKSOY-un çapına nail olduğu "Əhməd Cavadın seçilmiş şeirləri" kitablarının təqdimatı olub. Yüksək səviyyədə keçən tədbirdə çıxış edən yazıçı, şair və elm adamları professor Kərim Tahirovun elmi redaktorluğu və Mehriban Cəfərovanın tərtibi ilə işıq üzü görən "Əhməd Cavad. Biblioqrafiya" əsərinin məziyyətləri barədə müsbət fikirlər söyləyiblər, əsəri yüksək qiymətləndiriblər.

"Bu məktubu sizə ünvanlamaqda məramım iki məsələni nəzərinizə çatdırmaqdır. Biblioqrafiyada Əhməd Cavadın şeirlərinə bəstələnmiş mahnıların adı və bəstəkarların ad-familiyası göstərilib. Bu, çox yaxşıdır. Lakin həmin mahnılar efirdə səslənəndə nə mahnının sözlərinin, nə də bəstənin kimə mənsub olduğu məlum olmur. O cümlədən də xalq arasında geniş yayılan və sevilən "Çırpınırdın, Qara dəniz", "Gəncədən gəlirəm", "Qurban olduğum", "Can Azərbaycan", "Baharım gəl, yazım gəl" kimi qəlblərə məlhəm olan mahnılar. Görəsən çoxmu adam bilir ki, Əhməd Cavadın 25-ə yaxın şeirinə bəstələnmiş mahnıların müəllifləri dahi Üzeyir Hacıbəyov, görkəmli və tanınmış bəstəkarlarımız Vasif Adıgözəlov, Ramiz Mustafayev, Emin Sabitoğlu, Eldar Mansurov, Sərdar Fərəcov, Aygün Səmədzadə, Dadaş Dadaşov, Rəşid Şəfəq və Elnarə Dadaşovadır. Televiziya kanallarında efiri doldurmaq üçün insanların zövqünü korlayan, ağlasığmayan mənasız verilişlər baş alıb gedir. "Nə olar ki, efirdə mahnılardan istifadə zamanı mahnının sözlərinin və bəstənin müəllifinin adı elan ediləydi. Bu, o qədər də çətin bir iş deyil. Axı, Sovet dönəmində buna ciddi fikir verilirdi" - deyə məktubda bildirilir.

Professor Qəzənfər Paşayev məktubunda haqqında söhbət açmaq istədiyi digər məsələnin də mahnılarımızla bağlı olduğunu qeyd edib, müğənni Əlikram Bayramovun bu yaxınlarda "525-ci qəzet"ə müsahibəsində Azərbaycan musiqisinin, estradanın bugünkü vəziyyətinin bərbad olması ilə bağlı səsləndirdiyi fikirlərə diqqət yönəldib: "Əlikram Bayramov müsahibəsində qeyd edir ki, "ən böyük problem ondadır ki, ara müğənniləri çox yayılıb. Son zamanlar oxunan mahnıların heç birində məna yoxdur. Bəzi müğənnilər var ki, onları efirə buraxmaq ayıbdır. Çünki nə oxuduğu, nə də istedadı bir şeydir. Onlar musiqimizi uçuruma aparırlar. Müğənni göstərir ki, bununla televiziyalarımız mübarizə aparmalıdır, lakin bu məsələni Mədəniyət Nazirliyi də nəzarətdə saxlamalıdır". Fikrimcə, müğənni Əlikram Bayramov haqlıdır, bayağı mahnıların və bədnam "müğənnilərin" qarşısını yalnız bir yolla almaq olar. Bəzi ölkələrdə efirdə fonoqram qadağan edilib. Bizdə də televiziyaların efirində və tədbirlərdə fonoqram qadağan edilsə, bu, milli musiqimizin xilası yolunda Mədəniyyət Nazirliyinin atdığı ən cəsarətli addımlardan biri olardı".

525-ci qəzet.- 2023.- 4 mart.- S.14.