Elçinin 80 illiyi elmi sessiya ilə qeyd edilib

Mayın 22-də Azərbaycan Milli Elmlər Akademiyasının Nizami Gəncəvi adına Ədəbiyyat İnstitutunda bu elmi müəssisənin və M.F.Axundov adına Azərbaycan Milli Kitabxanasının birgə təşkilatçılığı ilə görkəmli ictimai-siyasi xadim, Xalq yazıçısı Elçinin 80 illik yubileyi münasibətilə "İki əsrin görkəmli sənətkarı" mövzusunda elmi sessiya keçirilib.

Əvvəlcə Xalq yazıçısı Elçinin yaradıcılığını əks etdirən sərgiyə baxış keçirilib. Sərgini M.F.Axundzadə adına Azərbaycan Milli Kitabxanası təşkil edib.

Tədbiri giriş nitqi ilə açan AMEA-nın prezidenti, akademik İsa Həbibbəyli müasir Azərbaycan ədəbiyyatının görkəmli nümayəndəsi Elçin Əfəndiyevin zəngin və çoxcəhətli yaradıcılığı ilə dünya şöhrətli sənətkar zirvəsinə yüksəldiyini vurğulayıb.

İ.Həbibbəyli Elçinin Azərbaycan ədəbi-ictimai fikir tarixində hərtərəfli şəxsiyyət - həm yazıçı, həm ədəbiyyatşünas, həm dramaturq, həm də ictimai xadim kimi qəbul olunduğunu bildirib, onun əsl Xalq yazıçısı olmağın nümunəsini göstərdiyini diqqətə çatdırıb. AMEA rəhbəri yazıçının yaradıcılığında Abşeron hekayələrinin xüsusi yerə malik olduğunu qeyd edərək, Elçinin "Baladadaşın ilk məhəbbəti" əsərinin Azərbaycan hekayə janrının ən möhtəşəm nümunələrindən biri olduğunu dilə gətirib. Elçinin ədəbiyyata xidmət etməkdən heç zaman yorulmadığını deyən İ.Həbibbəyli, onun bu gün də öz nəhəng ədəbiyyat arxivi ilə ədəbiyyatşünaslığımızı zənginləşdirməyə davam etdiyini vurğulayıb, yubilyara yeni yaradıcılıq uğurları arzu edib.

Milli Kitabxananın direktoru professor Kərim Tahirov Xalq yazıçısı Elçinin mədəniyyətimizin inkişafında əvəzsiz xidmətləri ilə seçildiyini, böyük mədəniyyət təşkilatçısı olduğunu söyləyib. Yazıçının özünəməxsus yaradıcılıq yolundan söz açan direktor onun tamaşaya qoyulan hər bir əsərinin gənc nəsil üçün məktəb rolunu oynadığını qeyd edib. K.Tahirov yubilyarın Milli Kitabxananın inkişafına hər zaman böyük dəstək göstərdiyini bildirib.

Akademik Teymur Kərimli və professor Qəzənfər Paşayev çıxış edərək Elçinin şəxsiyyəti və yaradıcılığı barədə fikirlərini bölüşüblər. Çıxışlarda qeyd olunub ki, görkəmli yazıçı, ictimai xadim və ədəbiyyat tənqidçisi Elçin ölkəmizin elmi-ədəbi və ictimai mühitində çoxcəhətli yaradıcılıq fəaliyyəti ilə özünəməxsus yer və mövqe tutmaqdadır. O, yeni dövr Azərbaycan bədii nəsrinin, keçid dövrü və müstəqillik mərhələsi dramaturgiyasının, eyni zamanda, son yarım əsrdən çox zamanda ədəbi tənqidimizin əsas nümayəndələrindən biridir.

Alimlərdən Tehran Əlişanoğlu "Elçinin hekayə poetikası", Sara Osmanlı "Yazıçı tənqidinin özəllikləri", Nizami Tağısoy "Elçinin "Baş" romanının kompozisiya-struktur polifonizmi", Nərminə Ağayeva "Zamanın Elçin teatrı və Elçin teatrının zamanı", Gülnar Osmanova "Elçin nəsri mif və folklor kontekstində" mövzulu məruzələrlə çıxış ediblər.

Sonda çıxış edən Xalq yazıçısı Elçin tədbirin təşkilatçıları olan Ədəbiyyat İnstitutuna və Azərbaycan Milli Kitabxanasına təşəkkürünü bildirib, burada iştirakından məmnunluğunu ifadə edib. O, gənclik illərinin bir qisminin Ədəbiyyat İnstitutu ilə bağlı olduğunu qeyd edərək, bu elmi müəssisənin Azərbaycan ədəbi tənqidinin, ədəbiyyatşünaslığının inkişafında, onun nəzəri bazasının möhkəmlənməsində, genişlənməsində böyük xidmətlər göstərmiş bir elm ocağı olduğunu vurğulayıb.

525-ci qəzet.- 2023.- 24 may.- S.9.