31 il sonra Laçında izlənən ilk film

Sosial şəbəkədə yazılanlar

Fərhad Mehdiyev, professor:

- Nədənsə unudulub, amma yazıram.

Azərbaycan Dəmir Yollarının rayonlara səfərləri bərpa edilməlidir. Qatarlarımız köhnəlib? Bütün keçmiş MDB məkanında onlardan istifadə olunur, olunur da. Çox da aşanı, relsdən çıxanı olmur. Məsələn, mən gedib Gədəbəyi, Zaqatalanı görmək istəyirəm, amma gedə bilmirəm. Çünki ora uzaq olduğuna görə maşın sürmək istəmirəm, avtobus da narahatdır. Onun yerinə gecə qatara minib səhər orda enmək istəyirəm.

Qatar səfərlərinin açılması:

1. Avtomobillərin səbəb olduğu yol qəzalarını azaldacaq.

2. Daxili turizmi canlandıracaq.

3. Rayonlarda işsizliyi azaldacaq.

4. Rayonlara investisiya axımını gücləndirəcək.

5. Dəmir yolları effektivdir, modernizm və mədəniyyət göstəricisidir.

Şəbnəm Uğurlu, müəllim:

- Bu gün Laçında bərpa edilən kinoteatr, mənə uşaqlığımı xatırlatdı... Anamgil həmişə həmin kinoteatra kino gələn kimi gedərdi, qohumlar, qonşular birlikdə, həvəslə izləyərdilər. Çox vaxt dəsmal götürürdülər. Çünki əksər vaxtı ağlamalı filmlər olurdu. Mən isə nədənsə qaranlıqdan qorxar, ağlayardım... Binanı görən kimi məni aparmamaları üçün çalışardım. Yaxınlıqda qohumlarımız qalırdı, məni onlarda qoymalarını xahiş edərdim... Bu gün 31 il sonra orada ilk film izlədik. Həm də göz yaşları ilə izlədik. Bəzən kədər göz yaşı, bəzən qürurdan axan göz yaşı idi. Bu gün ordumuzun qəhrəmanlığını, xalqımızın birliyini, sevginin əngəl tanımadığını özündə əks etdirən bir film izlədik... "Mən buradayam, İlahi..." filmini izləmək qürur verdi. Əməyi keçən hər kəsə təşəkkür edirəm...

Müsəllim Həsənov, jurnalist:

- Zəfər paradına baxıram...

Adamın başının tükləri biz-biz durur...

Tarix yaşayırıq...

Osman Gündüz, Azərbaycan İnternet Forumunun prezidenti:

- Bir şəhidin taleyi haqqında

Bu gün Balakəndə Şəhidlər xiyabanında oldum. Zəfər Günü ilə bağlı Balakəndə bu gün bir sıra tədbirlər təşkil olunub. Bəzilərində iştirak etdim.

Şəhidlər xiyabanında dəfn olunan şəhidlərimizin əksəriyyətinin adlarını artıq əzbərləmişəm. Şəhid ailələri ilə görüşdüm. Sonuncu antiterror tədbirlərində şəhid olan Sərxan Köklərovu yad etdim.

Bir-bir qəbirlər önündən keçərkən bir anlıq Şuşanın işğalı günü şəhid olan Nəsrəddin Məmmədovun qəbri önündə dayandım. Ötən dövrlər gözümün önündən keçdi.

Nəsrəddin müəllim həm rayonda tanınmış rəssam, həm də mənim oxuduğum 1 saylı şəhər orta məktəbində rəsm müəllimi olub.

Xatırlayıram ki, bir az da fəlsəfi, ruhani söhbətləri olardı.

Olmuş hadisədir.

1-ci Qarabağ savaşı başlayanda 52 yaşlı Nəsrəddin müəllimi yaşlı olması səbəbindən cəbhəyə göndərmədiklərinə görə bığını və saçlarını dibdən qırxmışdı ki, gənc görsənsin.

Sonradan özü könüllü gedib Şuşada Milli Qəhrəman Ramiz Qənbərovun özünümüdafiə batalyonunda vuruşmuşdu.

O zaman xatırlayıram ki, bir neçə gündən sonra rayonda bilinmişdi ki, Nəsrəddin müəllim artıq Şuşa ətrafında döyüşlərdə iştirak edir. 52 yaşlı Nəsrəddin müəllimin bu addımını hamı çox maraqla qarşılamışdı.

Nəsrəddin Məmmədov Şuşa ətrafındakı döyüşlərdə, Şuşanın işğalı günü, 8 may günü şəhid olub.

Bildiyim qədər meyiti indiyədək tapılmayıb.

Bu gün isə 8 Noyabr, Şuşanın işğaldan azad olunduğu gün, Zəfər Günüdür.

2020-ci ilin 8 Noyabr tarixində güclü ordumuz, rəşadətli əsgərlərimiz və qətiyyətli Ali Baş Komandanın rəhbərliyi ilə Azərbaycan Qarabağa qovuşdu, Şuşaya qovuşdu, tarixi zəfərə imza atdı, şəhidlərimizin, Xocalı qurbanlarının, həlak olan günahsız vətəndaşlarımızın qisası döyüş meydanında alındı.

İndi bu xiyabanda Şuşanı işğaldan azad edənlər, Zəfəri bizə yaşadanlar da dəfn olunub.

Şəhidlərimizin ruhları artıq şaddır.

Bu gün Zəfərimizin 3 illiyini qeyd edirik. Həm də bunu Xankəndidə və Şuşada qeyd edirik.

Zəfərimiz mübarək!

Asif Nərimanlı, jurnalist:

- Ermənistanın keçmiş müdafiə naziri, Koçaryanın partiyasının parlamentdəki fraksiya sədri Seyran Ohanyan deyir ki, "ermənilər Qarabağa ev sahibi kimi qayıtmalıdır". Bunun üçün o, təklif edir ki, erməni xalqı vahid şəkildə birləşməli, "beynəlxalq səviyyədə tanınmış formatda danışıqlar tezliklə bərpa edilməlidir". Yəni Minsk qrupu yenidən işə düşməlidir və s. və ilaxır.

Bakı-İrəvan xəttində məsələ olmaqdan çıxan Qarabağ mövzusu Ermənistanın daxili siyasətində iqtidar-müxalifət məsələsinə çevrilib. Ohanyan dedikləri də firqə davasından qaynaqlanır. Lakin erməni revanşistlərin - daşnakların Qarabağ iddiasını daim diri saxlayamağa çalışacağı və şəraitin yaranacağı günə qədər gözləyəcəkləri də bəllidir. Ermənistanda onların qarşısını alacaq yeganə tərəf isə hələ ki Paşinyandır.

Taleh Şahsuvarov, jurnalist:

- Hər bir cəmiyyətin institutlaşmış yaddaşı olmalı. Bu yaddaşımızı media adına formalaşdıran ən önəmli isimlərdən biri və məncə, birincisi Mirşahindir. O, indiki zamanın şəkli, yeni tarixi dövrün aynasıdır. Bərdədə olduğumdan və az sonra Bakıya qayıdacağımdan Mirşahinin 60 illik yubiley gününü geniş məqalə ilə təbrik edə bilməyəcəm. Bir neçə cümlə deyəcəm: o, artıq Mir deyil, Pir Şahindir. Mirlik cəddir, pirlik ərdəm. O, olaylara Şahin gözü ilə yuxarıdan baxmaq üçün həmişə cəddinə inanmalı, ərdəminə güvənməli idi. Qalanı zamanlıqdı və zaman onu həmişə haqlı çıxaracaqdı. Əziz qardaşıma bundan sonrakı zamanda da həmişə haqlı çıxmağı arzu edirəm. Çünki bu, Azərbaycanın haqlı çıxmağı deməkdir.

Yeganə Hacıyeva, politoloq:

- ABŞ Senatı Mark Libbinin Azərbaycana səfir təyin olunmasını təsdiqləyib.

Korrupsioner Menendes senatın xarici məsələlər üzrə komitəsindən uzaqlaşdırılandan sonra ABŞ Azərbaycana nəhayət yeni səfir təyin edə bilib.

Ona və erməni həyat yoldaşına ABŞ federal məhkəməsi bir neçə bənd üzrə cinayət işi qaldırıb.

Menendesə qarşı ABŞ qanunvericilik tarixində ilk dəfə olaraq vəzifədə olan senatora xarici dövlətin maraqlarını təşviq etmək ittihamı irəli sürülüb.

Elxan Şahinoğlu, politoloq:

- Fransa prezidenti Emmanuel Makron xalqına açıq məktubla müraciət edib. Makron məktubunda Fransada artan antisemitizmdən narahat olduğunu bu sözlərlə ifadə edib: "Cəmi bir ay ərizndə Fransada mindən çox antisemitizm hadisəsi baş verib. Fransada yaşayan yəhudilər qorxu içindədirlər. Yəhudilər uşaqlarını məktəbə aparmağa, gec saatlarda evə qayıtmağa qorxurlar. Yəhudilərin həyatları üçün qorxu hissi keçirdikləri ölkə Fransa olmamalıdır. Bu, həmin Fransa deyil".

Bu, həmin Makrondur ki, bizə "ermənilərin haqları" mövzusunda mühazirə oxuyurdu. Fransada bir ar ərzində mindən çox antisemit olayı baş verirsə, demək, bu dövlətin köklü problemləri mövcuddur. Belə yerdə deyiblər, evin şüşədəndirsə, başqasına daş atma.

Vüqar Bayramov, millət vəkili:

- Mərkəzi Bank bankomatlar vasitəsi ilə plastik kartlardan vəsaitlərin nağdlaşdırılması zamanı haqların aşağı salındığını bildirib. Bu, xüsusən digər bankların bankomatlarından nağdlaşdırma zamanı xərcləri azaldacaq. Bu, müsbət haldır. Amma bu xidmətdə güzəşt edən bəzi banklar digər istiqamətlərdə qiymət artımlarına getməklə yenə də müştərilər hesabına daha çox gəlir əldə etməyə çalışırlar. Yəni nəticədə yenə də müştərilərin xidmətlər üzrə xərcləri yüksək olaraq qalacaq.

Belə ki, bir sıra sistem əhəmiyyətli banklar SMS xəbərdarlıq tarifini gələn aydan 2.5 dəfə artırmaq qərarı veriblər. Əvvəllər 40 qəpiyə olan bu xidmət gələn aydan 1 manat olacaq. Əslində, belə artımlar özü də süni qiymət artımı və ya sektor mövqeyindən istifadə deməkdir. Çünki nəinki son dövrlər rabitə tariflərində hər hansı artım var, əksinə, texnologiyanın yeniləşməsi SMS göndərmənin maya dəyərini xeyli aşağı salıb.

Belə olan halda isə, bu xidmətlərdə kəskin qiymət artımını iqtisadi baxımdan izah etmək mümkün deyil. Bu baxımdan, requlator kimi Mərkəzi Bank belə kəskin tarif artımlarının səbəblərinin araşdırması və yöndə interventiv addımlar atması çox vacibdir. Bəlkə də, SMS xidmətinin 1 manata çatdırılması yüksək xərc kimi görsənməyə bilər, amma sistemli əhəmiyyətli banklarda müştərilərin sayını nəzərə alsaq, bu, kifayət qədər böyük dövriyyə deməkdir. Bu baxımdan da, liberal iqtisadiyyat prinsipləri çərçivəsində belə süni tarif artımların tənzimlənməsi çox vacibdir.

525- ci qəzet.- 2023- cü il.- 14 noyabr.- №- 205.- S. 8.