Zəfər Günü- Haqqın, ədalətin qələbəsi

Bu günlər Azərbaycan İkinci Qarabağ müharibəsində qazandığı möhtəşəm qələbənin üçüncü ildönümünü - Zəfər Gününü qeyd edir. 44 gün davam edən Vətən müharibəsinin hər anı, hər səhifəsi ayrıca bir tarix, qəhrəmanlıq dastanıdır. 2020-ci il sentyabrın 27-də Ermənistanın növbəti hərbi təxribatına cavab olaraq Azərbaycan Ordusunun başlatdığı əks-hücum əməliyyatları nəticəsində torpaqlarımızın 30 illik işğalına son qoyuldu, ərazi bütövlüyümüz bərpa olundu.

Ermənistan işğal altında saxladığı Azərbaycan ərazilərində keçilməz hesab olunan sədlər, istehkamlar qurmuşdu. Ordumuz həmin sədləri yararaq, böyük əzmlə döyüşərək şanlı qələbəyə imza atdı. Prezident, Ali Baş Komandan İlham Əliyevin rəhbərliyi ilə rəşadətli ordumuzun Şuşanı azad etdiyi 8 noyabr tarixi ölkəmizdə Zəfər Günü kimi qeyd edilir.

Əlbəttə ki, hər bir hərbi qələbənin başında ordunun Ali Baş Komandanı dayanır. Prezident İlham Əliyevin 44 günlük müharibənin zəfərlə başa çatmasında müstəsna rolu var. Dövlət başçısının qətiyyəti, prinsipiallığı, illərlə həm diplomatik müstəvidə, həm hərbi sahədə apardığı nəhəng işlər, xalq-Prezident birliyi, ordumuzun əzmkarlığı, döyüş ruhu müharibədə qələbəmizi təmin etdi.

Prezident İlham Əliyevin siyasətində Qarabağ məsələsinin həlli hər zaman ön sırada olub. Yuxarıda vurğulandığı kimi, diplomatik müstəvidəki fəaliyyət münaqişənin həlli üçün hüquqi baza yaratmışdı. Bu sahədə BMT Təhlükəsizlik Şurasının məlum 4 qətnaməsindən əlavə, BMT Baş Assambleyasının qətnaməsi, Qoşulmama Hərəkatı, İslam Əməkdaşlıq Təşkilatı və digər qurumlar çərçivəsində qəbul edilmiş sənədləri vurğulamaq olar. Hüquqi baza Azərbaycana imkan verirdi ki, öz torpaqlarını işğaldan azad etsin. Ötən illər ərzində Prezident İlham Əliyevin liderliyi ilə Azərbaycan siyasi, iqtisadi, hərbi gücünü artırdı, Avropanın enerji xəritəsini dəyişən Cənub Qaz Dəhlizi kimi önəmli layihənin təşəbbüskarı oldu, uğurlu xarici siyasət nəticəsində ölkəmizə dost, tərəfdaş, müttəfiq olan dövlətlərin sayı artdı. Azərbaycanın Qoşulmama Hərəkatında fəal iştirakı, sədrliyi dövründə gördüyü işlər bu qurumun nüfuzunun artmasına, həmrəylin güclənməsinə səbəb oldu. Bu fəaliyyət Vətən müharibəsi dövründə ölkəmizin haqq səsinin beynəlxalq təşkilatlarda müdafiə olunması ilə nəticələndi. Belə ki, müharibə günlərində 30 ildə münaqişənin həlli üçün heç bir addım atmayan ATƏT-in artıq keçmiş olan Minsk qrupunun həmsədr ölkələri BMT Təhlükəsizlik Şurasının iclasını çağırdılar. Bundan əvvəl də iclas çağırmışdılar, lakin görünür, orada qəbul edilmiş sənəd onları qane etməyib. Onlar yeni sənəd də hazırlamışdılar. Prezident İlham Əliyev bu barədə deyib: "Dərhal biz hərəkətə keçdik və bu sənədin qəbul edilməsinə imkan vermədik. Baxmayaraq ki, üç həmsədr ölkə BMT Təhlükəsizlik Şurasına üzv olan digər ölkələrə böyük təzyiqlər edirdi. Nə idi bunun məqsədi? Məqsədi çox aydındır, 1993-cü ildə erməni silahlı qüvvələrinin torpaqlarımızdan çıxarılması barədə qəbul edilmiş qətnamələr kölgədə qalsın, onlar arxada qalsın, onlar ya qüvvədən düşsün, ya da ki, öz əhəmiyyətini itirsin. Bu idi məqsəd. Bu, nə dərəcədə ədalətlidir? Biz yenə də işğalçıya dəstək göstərilməsi cəhdini gördük. Amma nə oldu nəticədə? Keçmədi. Necə keçmədi? Qoşulmama Hərəkatına üzv ölkələr kişi kimi buna imkan vermədilər, bizə dəstək göstərdilər, sağ olsunlar. Baxmayaraq ki, onlara təzyiq göstərildi, bəlkə də hədələr oldu. Amma durdular kişi kimi bizim arxamızda, necə ki, biz onların arxasında dururuq. Bu, onu göstərir ki, keçməyəcək. Mənim əziz qardaşım, Türkiyə Cümhuriyyətinin Prezidenti dəfələrlə deyib ki, dünya 5-dən böyükdür. Tam haqlıdır. Bax, bu səsvermə onu göstərdi. Birləşdilər, yenə də Ermənistanın maraqlarına cavab verən sənədi ortalığa atdılar, amma keçmədi. Çünki ədalət var. Nə qədər bu ədaləti pozsalar da, nə qədər bu haqqı yerə vursalar da, yenə də ədalət var. Ədalət və beynəlxalq hüquq bizim tərəfimizdədir. Ona görə biz yolumuzu davam edəcəyik".

Bu məqamlar bir daha onu göstərir ki, Azərbaycan zəfəri asanlıqla qazanmayıb. Müharibə günlərində hegemon dövlətlər tərəfindən ölkəmizə ciddi təzyiqlər edilib. Lakin İlham Əliyev bütün bu təzyiqləri dəf edərək, təkcə döyüş əməliyyatlarının deyil, həm də informasiya müharibəsinin başında dayandı. Prezidentin müharibə dövründə dünyanın aparıcı KİV-lərinə verdiyi müsahibələri, bəzən hətta təxribat xarakterli, qərəzli suallara böyük diplomatik məharətlə verdiyi cavablar beynəlxalq arenada dövlətimizin mövqeyini daha da gücləndirdi.

Əlbəttə ki, Ermənistanın istəyi bəlli idi, danışıqlar uzun müddət davam etsin, o zamankı status-kvo saxlanılsın, münaqişə dondurulsun və Qarabağ əbədi işğal altında qalsın. Minsk qrupunun fəaliyyəti də məhz bu istiqamətə yönəlmişdir. Ermənistanı açıq şəkildə dəstəkləyən, işğala, separatizmə haqq qazandıran bəzi ölkələrin, o cümlədən, Fransanın mövqeyini göz önünə gətirəndə zəfərin necə çətin geosiyasi şəraitdə təmin olunduğunu anlamaq çətin deyil.

Uzun illər davam edən işğal faktoru məhz dövləti başçısının qətiyyəti, iradəsi, ordumuzun şücaəti nəticəsində sona çatdı, Şuşanın azad edildiyi 8 noyabr tarixində artıq Ermənistanın təslim olmaqdan başqa yolu qalmadı. 2020-ci il noyabrın 10-da Ermənistan kapitulyasiya aktına imza atdı

Müharibədən sonra cərəyan edən hadisələr, qalan məsələlərin sülh yolu ilə həlli istiqamətində aparılan danışıqlarda Azərbaycanın dövlət başçısı öz qətiyyətli, dəyişməz mövqeyini davam etdirdi. Ötən üç ilə yaxın müddət ərzində Ermənistan yenə də öz təxribatlarından əl çəkmədi, İrəvan hakimiyyəti Bakının təkliflərinə müsbət cavab vermək əvəzinə, sülh prosesini pozan addımlar ataraq, yenidən ərazi iddiaları səsləndirir və öz havadarlarının dəstəyi ilə prosesi sonsuzadək uzadacaqlarını düşünürdü. Çünki bir çoxları düşünürdü ki, Azərbaycan 2020-ci il 8 noyabrda üçtərəfli bəyanatla təsbit edilmiş status-kvonu dəyişməyə cürət etməyəcək və əksər ərazilərlə Şuşanın azad edilməsi maksimal hədd olacaq. Hesab edirdilər ki, beynəlxalq aləm ermənilər yaşayan Azərbaycan ərazisində hər hansı əməliyyat keçirməyə və bu ərazilər üzərində Azərbaycanın nəzarətini bərpa etməyə imkan verməyəcək. Amma onu da unudurdular ki, Azərbaycan dövləti öz suverenliyini tam bərpa etməkdə qərarlıdır. Beləliklə, 2023-cü il 19-20 sentyabrda bir gündən az davam edən antiterror tədbirləri nəticəsində Azərbaycan dövləti öz ərazisindəki qanunsuz silahlı birləşmələrin varlığına, separatizmə son qoydu. Bununla da öz ərazi bütövlüyünü və suverenliyini tam bərpa etdi. Heç vaxt başladığı işləri yarımçıq qoymayan və bütün fəaliyyəti boyunca "nəyi, nə zaman və necə" etməyin ən yaxşı nümunələrini göstərən Azərbaycan Prezidenti İlham Əliyevin suverenlik və ərazi bütövlüyü anlayışı heç bir zaman müharibənin nəticələri ilə məhdudlaşmadı. Dövlət başçısının ötən üç ildə apardığı siyasət, görülən bütün işlər prosesin davamı oldu və 2023-cü il sentyabrın 20-də öz məntiqi sonluğuna çatdı. Bütün təzyiqlərə, hədələrə baxmayaraq, İlham Əliyev uzaqgörənliklə, praqmatik şəkildə, barışmaz prinsipiallıq və qəti iradə nümayiş etdirərək prosesi başa çatdırdı. Oktyabrın 15-də Xankəndində, eyni zamanda Xocalıda, Xocavənddə, Ağdərədə, Əsgəranda Azərbaycanın dövlət bayrağını ucaltdı. Bu gün Qarabağın hər bir yerində Azərbaycanın üçrəngli bayrağı dalğalanır və bu hər bir azərbaycanlı üçün sonsuz sevinc bəxş edən qürurverici haldır.

Pərvanə

525- ci qəzet.- 2023- cü il.- 3 noyabr.- № 45.- S. 5.