BDU-da Məmməd Arazın
90 illiyi qeyd olunub
Bakı
Dövlət Universitetinin (BDU) Filologiya fakültəsində
Azərbaycan ədəbiyyatının görkəmli nümayəndəsi,
"İstiqlal" ordenli Xalq şairi Məmməd Arazın
90 illiyinə həsr olunmuş ədəbi-bədii tədbir
keçirilib.
Tədbirin
moderatoru olan BDU-nun Azərbaycan ədəbiyyatı tarixi
kafedrasının dosenti Məti Osmanoğlu
çıxışında poeziyamızın milli istiqlal
şairlərindən biri kimi müasir ədəbi fikrin və
milli azadlıq ideyalarının formalaşmasında
M.Arazın müstəsna xidmətlərdən söz
açıb. Bildirib ki, Məmməd Araz Azərbaycan ədəbiyyatında
çoxcəhətli və zəngin ədəbi irsinə, sənətkarlıq
qüdrətinə görə özünəməxsus yeri və
mövqeyi olan görkəmli söz ustadıdır. O, mənalı,
keşməkeşli və şərəfli,
bütövlükdə Vətənə və sənətə
həsr olunmuş əsl şair-vətəndaş
ömrü yaşayıb. Dərin məzmunlu, oxunaqlı və
milli mündəricəli şeirlərilə Məmməd
Araz vətəndaş qeyrətli ədəbiyyat nəhəngidir.
Onun yaradıcılığının baş qəhrəmanı
Azərbaycandır. Ona görə də bu görkəmli
şair milli azadlıq ideyalı əsərləri ilə
xalqımızın xatirəsində ədəbilik zirvəsinə
yüksəlib.
Şimali
Kipr Türk Cümhuriyyətinin Lefke Avropa Universitetinin dosenti
Nazim Muradov M.Araz yaradıcılığının nəinki
Azərbaycan, ümumən türk xalqları ədəbiyyatının
mühüm ədəbi-mədəni hadisəsi olduğunu
diqqətə çatdırıb, ədibin "Dünya sənin,
dünya mənim..." şeirinin dillər əzbərinə
çevrilməsini şairin poeziyasının bənzərsiz
özəlliklərə malik olması ilə əlaqələndirib
və fikirlərini faktlarla əsaslandırıb. Həmçinin
qeyd olunub ki, torpağa bağlılıq, vətəndaşlıq,
vətənpərvərlik mövzularına müraciət edən
şairin bir çox şeirləri bu gün də öz
aktuallığını qoruyub saxlayır və əsərlərindəki
milli-ideoloji ruh bundan sonra da müstəqil dövlətçiliyimizin
möhkəmlənməsinə xidmət edəcək.
Filologiya
fakültəsinin sosial məsələlər və tələbələrlə
iş üzrə dekan müavini Anar Fərəcov
çağdaş ədəbiyyatımızın görkəmli
siması M.Araz yaradıcılığına və şəxsiyyətinə
Ümumilli liderimiz Heydər Əliyevin verdiyi yüksək qiymətdən
söz açıb, şairinin milli azadlıq
ideyalarının bundan sonra da müasir gəncliyə
aşılanmasının zəruriliyini vurğulayıb. Bildirib
ki, uzun illər azadlıq həsrəti ilə
yanıb-alışan, suverenliyimizin, ərazi
bütövlüyümüzün kobud şəkildə
pozulduğu illərdə öz xalqı ilə göz
yaşı tökən böyük sənətkarın ruhu
şaddır. Çünki bu gün xalqımız Ali Baş
Komandan cənab İlham Əliyevin rəhbərliyi altında
"Məmməd Arazın dünyasındakı Azərbaycan"a
qovuşub, regionun güclü, lider dövlətinə
çevrilib.
Tədbirdə
ədibin əsərlərindən ibarət kitab sərgisi
nümayiş olunub, "Mədəniyyət"
kanalının M.Arazın ömür yolu ilə bağlı
hazırladığı film göstərilib, həmçinin
Filologiya fakültəsinin tələbələri - Səbinə
Sadıqzadə, Nəzrin Aslanlı və Aysu Türkel
şairin şeirlərini səsləndiriblər.
MEHRİ