"Şimali və Şərqi Qafqaz yəhudilərinin irsi və mədəniyyəti"

BAKIDA BU MÖVZUDA BEYNƏLXALQ ELMİ KONFRANS TƏŞKİL EDİLİB

Bakı Beynəlxalq Multikulturalizm Mərkəzinin təşkilatçılığı ilə Dağ Yəhudilərinin Beynəlxalq Xeyriyyə Fondu "STMEGI" və İsraildəki Bar-İlan Universitetinin nəzdində Dahan Mərkəzinin (Dahan Centre) birgə layihəsi olan "Şimali və Şərqi Qafqaz yəhudilərinin irsi və mədəniyyəti" mövzusunda beynəlxalq elmi konfrans keçirilib.

Konfransdan əvvəl Bar-İlan Universitetinin nəzdində Dahan Mərkəzinin direktoru Şimon Ohayon, Azərbaycan Dillər Universitetinin rektoru, akademik Kamal Abdulla, Bakı Beynəlxalq Multikulturalizm Mərkəzinin icraçı direktoru Rəvan Həsənov, Aşkelon Akademik Kollecinin rektoru Şimon Şarvit, Azərbaycan İlahiyyat İnstitutunun rektoru Aqil Şirinov və Bar-İlan Universiteti Təhsil fakültəsinin dekanı Zehavit Qrossun görüşü olub.

Mərkəzin icraçı direktoru Rəvan Həsənov ölkəmizdə multikulturalizmə aid tədbirlərin keçirilməsinin ənənəvi hal aldığını qonaqların diqqətinə çatdırıb.

Rektor Kamal Abdulla Azərbaycan Dillər Universiteti haqqında məlumat verərək qeyd edib ki, bu gün universitetdə 20-yə yaxın dil öyrədilir. Buraya təkcə Avropa dilləri daxil deyil, universitetdə Yəhudi Dili Mərkəzi də var: "Paralel olaraq çalışırıq ki, Azərbaycan dilini də digər ölkələrdə yayaq. Bu məqsədlə bəzi ölkələrdə Azərbaycan Dili Mərkəzi də var. İsraildə də bu cür mərkəzlər yaradılarsa, sevinərik".

Rektor əlavə edib ki, universitet müasir dillərin öyrənilməsində 300-cü yerdədir. Bu, 1600 universitet arasında aparılan statistikadır.

K.Abdulla qonaqların diqqətinə çatdırıb ki, Azərbaycanda yəhudilərlə münasibətlər çox gözəl inkişaf edib: "Ümumiyyətlə, ölkəmizdə bütün dinlər arasındakı münasibətlər harmonik vəziyyətdir. Dövlətimizin siyasəti nəticəsində bütün konfessiyalara bərabər münasibət göstərilir. Bu münasibət Azərbaycanda multikulturalizmin çiçəklənməsinə gətirib çıxarıb".

Bu görüşdən sonra konfrans Azərbaycan və İsrailin himlərinin səsləndirilməsi ilə başlayıb.

"Şimali və Şərqi Qafqaz yəhudilərinin irsi və mədəniyyəti" mövzusundakı beynəlxalq-elmi konfransda çıxış edən Bar-İlan Universitetinin nəzdində Dahan Mərkəzinin direktoru Şimon Ohayon bildirib ki, Azərbaycan Dillər Universiteti ilə Bar-İlan Universiteti arasında əməkdaşlıq əlaqələri qurulacaq. Bu da universitetlər arasındakı münasibətləri yaxşılaşdıracaq. O, Dağ, Avropa və Gürcüstan yəhudiləri haqqında məlumat verərək deyib ki, bu konfrans vasitəsilə akademik və mədəni əməkdaşlığın əsası qoyulur və bunun təzahürlərini gələcəkdə görəcəyik.

Azərbaycan Dillər Universitetinin rektoru, akademik Kamal Abdulla qeyd edib ki, bugünkü konfrans elmi cəhətlərinə görə vacib əhəmiyyətə malikdir. Bu gün Azərbaycan və İsrail münasibətləri üçün xüsusi bir gündür. Çünki konfrans elmi, mədəni və siyasi mahiyyətinə görə əhəmiyyətlidir. Rektor vurğulayıb ki, ölkəmizdə tarix boyu yəhudilər yaşayıblar. Bu səbəbdən də iki ölkənin tarixində, mədəniyyətində oxşarlıqlar var. "İsraildə Azərbaycan Dil və Mədəniyyət Mərkəzinin yaradılması məsələsini israilli qonaqlarla müzakirə etdik. İnanırıq ki, yaxın zamanlarda bu, baş verəcək".

Azərbaycan İlahiyyat İnstitutunun rektoru Aqil Şirinov diqqətə çatdırıb ki, yəhudilərin keçmişdəki sürgünlərdən sonra məskunlaşdığı yerlər arasında Azərbaycan da var. Bu da ölkəmizin bütün millətlər, dinlərin nümayəndələri üçün təhlükəsiz ölkə olmasını göstərir. Diqqətə çatdırıb ki, Azərbaycan İlahiyyat İnstitutunda yəhudi dini ilə bağlı dərslər də keçirilir. Yəhudi icması ilə də yaxın münasibətlər var. Biz bunu akademik səviyyədə də inkişaf etdirmək istəyirik.

Qeyd edək ki, Azərbaycan Dillər Universitetində reallaşan konfransa Azərbaycan, İsrail, Rusiya, ABŞ, Fransa və digər ölkələrdən 60-dan çox tədqiqatçı-alim qatılıb.

Konfrans Bar-İlan Universitetinin nəzdində Dahan Mərkəzi (İsrail), Bakı Beynəlxalq Multikulturalizm Mərkəzi, Azərbaycan Dillər Universiteti, Azərbaycan İlahiyyat İnstitutu, Akademik Aşkelon Kolleci (İsrail), Dağ Yəhudilərinin Beynəlxalq Xeyriyyə Fondu "STMEGI"nin birgə təşkilatçılığı ilə gerçəkləşib.

İki gün davam edən beynəlxalq konfransın 13 panel iclasında - "Adət və ənənələr". "Azərbaycanda və yəhudi icmasında multikulturalizm", "Milli və etnik kimlik", "Sionist fəaliyyət və Qafqazdan immiqrasiya", "İsrail-Azərbaycan münasibətləri", "Bakıdakı yəhudi icması: Tarix və cəmiyyət", "Dil və kimlik", "Qafqaz yəhudiləri müasir dövrdə", "Dağ Yəhudiləri İkinci Dünya müharibəsi dövründə", "Mədəniyyət və incəsənət", "Yəhudilər Azərbaycanda", "Qafqaz yəhudilərinin tədqiqi mənbələri" mövzularında geniş müzakirələr aparılıb.

525-ci qəzet.- 2023.- 1 sentyabr.- S.6.