İbrahim YUSİFOĞLU

Bakı küləyi

Sanki bəd qaynana fağır gəlinə

Hayqırır səslənir, doymur ürəyi.

Zalımlıq fürsəti düşüb əlinə,

Həm asır, həm kəsir Bakı küləyi,

Yamanca sərt əsir Bakı küləyi.

Göy üzü büsbütün bürünüb toza,

Günəşin al rəngi bələnib boza,

Həyatı döndərib içi boş qoza,

Həm atır, həm tutur xəlbir-ələyi,

Yamanca bərk əsir Bakı küləyi.

Dəniz çalxalanır, aşır səddini,

Köklü ağacların bükür qəddini.

Cığal adam kimi keçir həddini,

Dizi üstündədi duzu-çörəyi,

Yamanca tərs əsir Bakı küləyi.

Gəlir, uzaqlardan atlanıb gəlir,

Təbiət əzaba qatlanıb gəlir,

Qorxuya, haraya şadlanıb gəlir.

Yıxıb-dağıtmaqdı istək-diləyi,

Yamanca pərt əsir Bakı küləyi.

Bir səbəb tapılmır davalarına,

Oynadır xəzəli havalarına,

Edilən hər Tanrı dualarına,

Yumşalır, səngiyir çılğın ürəyi,

Yavaş-yavaş kəsir Bakı küləyi.

Mənə bircə gilə göz yaşı bəsdi...

Göylərin üzünü aldı buludlar,

Qəlbimi ürpədən külək də əsdi.

Mənim səndə xeyli əmanətim var,

Qaytarsan... bir gilə göz yaşı bəsdi.

Bitdin bənövşətək yolumun üstə,

Yaydın yaylığını qolumun üstə,

Yığdım dərdlərimi solumun üstə,

Ağrılar çoxaldı səbrimi kəsdi,

Mənə bircə gilə göz yaşı bəsdi.

Vətənin obasın, elin sevmişəm,

Günəşin, yağışın, yelin sevmişəm,

Anamın şipşirin dilin sevmişəm,

Zirvənin qartalı, sərt qaşı bəsdi,

Mənə bircə gilə göz yaşı bəsdi.

Bəxtimə düşənlər Tanrıdan gəlir,

Sevincim, kədərim yarıdan gəlir,

Bütün istəklərim "barı"dan gəlir,

Həyat nə verdisə, bir üzü tərsdi,

Mənə bircə gilə göz yaşı bəsdi.

Bir gün göz yaşıyla yuyulacağam,

Üç qarış torpağa qoyulacağam.

Bir sal daş altında uyuyacağam,

Tanrımın verdiyi öz yaşı bəsdi,

Mənə bircə gilə göz yaşı bəsdi.

Qorxuram

Otları saralmış, gülləri solmuş

Çəmənəm, qırovdan, çəndən qorxuram.

İnadkar gözəltək gözləri dolmuş

Buluddan qorxmuram, səndən qorxuram.

Qorxuram, adına söz gələr axı,

Sözlər sinən üstə köz ələr axı.

Közlər ürəyini pörşələr axı -

Qəlbinə çökəcək nəmdən qorxuram.

Gözlərin göy kimi durudu, duru,

Yanağın yaş deyil, qurudu, quru,

Üzündə günəşin nurudu, nuru -

Saçına ələnən dəndən qorxuram.

Bəd nəzər dikilib boyuna sənin,

Qoymaram salalar oyuna səni.

Özüm gələcəyəm toyuna sənin -

Yoluma ələnən qəmdən qorxuram.

525-ci qəzet 2023.- 15 sentyabr.- S.15.