Şəmsi VƏFADAR

Mən burdayam...

Vaqif Səmədoğluya

Günahlara bələndim,

Mən burdayam, İlahi!

Bəxtimə dərd ələndi,

Mən burdayam, İlahi!

Hər gün əl açıb göyə,

"Ya rəbbim" deyə-deyə,

İçimi yeyə-yeyə

Mən burdayam, İlahi!

Nəyim var ki, qorxam mən,

Gözü-könlü toxam mən.

Kim deyib ki, yoxam mən,

Mən burdayam, İlahi!

Dünyadan qopar məni,

Yanına apar məni,

Kim olsa, tapar məni,

Mən burdayam, İlahi!

Bitməmiş eşq nağılı,

Qolları, gözü bağlı,

Ürəyi, qəlbi dağlı,

Mən burdayam, İlahi!

Sevəndən dərdi-qəmi,

Taleyim batmış gəmi,

Unutmamısan məni?

Mən burdayam, İlahi!

Səni sordum

Rüzgarlara məktub yazıb,

Küləklərdən sordum səni.

Gözü yaşlı, sevgi dolu,

Ürəklərdən sordum səni.

Həsrətindən ölə bilsəm,

Məni eşqə

kölə bilsən -

Sən çiçəksən, axı gülsən,

Çiçəklərdən sordum səni.

Bağrımın başı yaradı,

Bəxtimə düşən qaradı,

Gözlərim gəzdi, aradı

Mələklərdən sordum səni.

Günaha yazma

Qəlbindən dərd boylanır,

Gözündə qəm gizlənib.

Nigaranam gecikmə,

Yollarda çən gizlənib

Qəlbimdəki yaralar,

Uşaq kimi ağlayır.

Sənin dərdin, həsrətin

Ürəyimi dağlayır.

Ürəyimin göz yaşı

Damla-damla süzülər.

Sən olmasan, dünyadan

Əlim çoxdan üzülər.

Tanrı mənə tapşırıb:

- Eşqin yolunda azma.

Bu sevgini, bu eşqi,

Ya Rəbb, günaha yazma.

Məni apar yanına

Həsrətin ayaq səsin,

Eşidirəm hər gecə.

Qəlbimi sənə verdim,

Günlərim getdi heçə.

Ürəyimi göynədir,

Səsindəki göz yaşı.

Qorxuram dəli etsin

Məni eşqin təlaşı...

Ürəyimə yazmışam,

Axı sənin adını.

Mənə sən öyrətdin, sən

Ayrılığın dadını.

Həsrətinlə doludu

Qəlb evim, könül evim.

Gəl incimə, nə olar...

Üstünə səni sevim.

Qəlbimin divarından,

Şəkilini asmışam.

Yaram yaman göynəyir,

Üstünə köz basmışam.

Yoruldum gözləməkdən,

Harda qaldı bu ölüm.

Allah, apar yanına,

Dərdimi sənlə bölüm.

525-ci qəzet 2023.- 15 sentyabr.- S.15.