Naxçıvan Teatrı: yeni ilə yeni tamaşayla

Yaradıcı kollektiv dekabrın son günlərində "Herostratı unudun" tamaşasının premyerasını təqdim edəcək

Cəlil Məmmədquluzadə adına Naxçıvan Dövlət Milli Dram Teatrı tamaşaçılarını daha bir maraqlı səhnə əsəri ilə sevindirəcək. Bu, rus dramaturqu Qriqori Qorinin dünyanın bir çox aparıcı teatr səhnələrində oynanılan məşhur "Herostratı unudun" əsəridir. Müəllifin eyniadlı əsəri əsasında hazırlanan tamaşa bu dəfə istedadlı rejissor Mir Qabil Əkbərovun quruluşunda səhnə təcəssümü tapacaq.

Maraqlı süjet xətti və dolğun məzmunu olan tamaşada hadisələr Efes şəhərində cərəyan edir. Səhnə əsərində eramızdan əvvəl 356-cı ildə dünyanın 7 möcüzəsindən biri sayılan Artemida məbədini yandıran bazar alverçisi Herostratın eşq macərasından, sərsəm xülyalarından, cinayət əməlindən bəhs olunur. O, insanların sitayiş ocağı olan məbədi yandırır və bu hərəkətinə görə həbs olunur. Şəhər əhalisi onun bu əməlindən qəzəblənir, edam olunmasını istəyirlər. Herostrat isə bu əməli diqqətləri üzərinə çəkmək, şöhrətlənmək, məşhur olmaq naminə etdiyini bəyan edir.

Bu məqsədlə o, müxtəlif vasitələrə əl atır, şəhərin sərxoş, tüfeyli təbəqəsinə gizli yolla içki pulu göndərir, papirus kağızlarında yazdığı təsiredici mətnləri yaymaqla çox sayda adamı öz tərəfinə çəkə bilir. Əsərdə baş verən hadisələr, eyni zamanda, o dövrdə cəmiyyətdə xaosun hökm sürdüyünə, qanunların boşluğuna, hətta terror hadisəsinə belə biganəliyə diqqət çəkir. Belə ki, Efes hökmdarı Tissafernin "Herostratı unudun" əmri əhali arasında yayılsa da, Herostrata rəğbət bəslənilir, hamı onu görməyə can atır. İnsanların bəziləri onun bu hadisəni məşhurlaşmaq üçün etdiyini desə də, çoxları onun məhəbbət macəralarına görə edam ediləcəyindən danışır. Bu rəğbət hətta Efes hökmdarının xanımı Klementinaya da sirayət edir.

Onun Herostrata heyranlığı tamaşada dolğunluğu ilə əks olunub. Bundan ruhlanan Herostrat edam olunmaqdan qorxmadığını iddia edir. Rahibə Erita İsə Herostratın edam olunmasına mane olur, onun tanrılar tərəfindən cəzalandırılacağına inanır. Hökmdar Tissafern xanımı Klementinanın Herostratla münasibətini bilən baş hakim Kleonu vəzifəsindən uzaqlaşdırılır və zindana qapıçı qoyur. Özü isə Herostratla görüşüb xanımı ilə olan münasibəti yaymaması üçün ona xəncər verərək zindandan qaçıb getməsinə şərait yaradır.

Əhali tərəfindən baş hakim seçilən Kleon qapıçı vəzifəsində olarkən də Herostratı cəzalandırmaq üçün hər cür vasitələrə əl atır və sonda özünə qarşı sui-qəsdin qarşısını alarkən məhbus Herostratı öldürür. Səhnə əsərində Xalq artisti Rza Xudiyev Tissofern, Əməkdar artistlər Əbülfəz İmanov, Behruz Haxverdiyev Kleon və daşyonan, Naxçıvan Muxtar Respublikasının Əməkdar artisti Səməd Canbaxşıyev Herostrat, Zəminə Məmmədova rahibə Erita, Səkinə Məmmədova isə Klementina, Zakir Fətəliyev Krisipp, Anar Eyvazov qapıçı obrazlarını canlandırırlar. Aktyorlardan Saynur Babayev və Xəlil Hüseynov gərgin situasiyalarla müşayiət olunan əsərdə obrazları məharətlə ifa edir, həyəcan dolu səhnələri dolğunluqla əks etdirirlər. Tamaşanın quruluşçu rəssamı Əməkdar rəssam Səyyad Bayramov, musiqi tərtibatçısı Azər Cəfərlidir. "Herostratı unudun" tamaşasının premyerası dekabrın son günlərində gerçəkləşəcək.

Adilə SƏFƏROVA

Azərbaycanın Əməkdar mədəniyyət işçisi, teatrşünas

525-ci qəzet .- 2024.- 17 dekabr(№231).-S.11.