Ali Baş Komandanım

Düşmən üstə yeriyən Ordu Sizdən güc aldı,

44 gündə yağını diz çökdürüb öc aldı.

Ən hündür zirvələrdə Bayrağımız ucaldı,

Şuşamızda yazıldı parlaq Zəfər Dastanım,

Ali Baş Komandanım!

Yumruq kimi birləşdik, müqəddəsdir andımız,

İndi dəqiq bəllidir: kim dostdur, kim yadımız!

Qaliblər sırasında var şərəfli adımız,

Düşməndən hər addımda haqq-hesablar soranım -

Ali Baş Komandanım!

"Firəng" kimi əfilər daş altında yatandır,

"Miatsum" yalanına həqiqəti satandır,

Dünya görsün: əyrilər düzə böhtan atandır!

İftiralar qoşanı haqq sözüylə vuranım -

Ali Baş Komandanım!

Qisas aldıq bir gündə qart düşməndən, yağıdan,

Qurtardıq 30 illik ah-nalədən, ağıdan!

Bir sutkada terrorun yuvasını dağıdan

Sərkərdəyə heyrətlə baxır indi zamanım,

Ali Baş Komandanım!

Hər əsgərin övlad tək qayğısına qalan - Siz!

Düşməndən qarış-qarış o torpağı alan - Siz!

Qüdrətli Ordumuzla Böyük Zəfər çalan - Siz!

Xankəndi oldu şanlı Parad üçün meydanım,

Ali Baş Komandanım!

Zirvələrə can atan, qartal tək məğrur gedən,

Doğma yurda kəc baxmış xain gözləri didən,

"Uf" demədən qanıyla torpağı Vətən edən

Şəhidlərə Anadır Anam -Azərbaycanım!

Ali Baş Komandanım!

Hər bir qaçqın-köçkünə ey dar gündə həyanım,

Savaşlarda ən böyük sərkərdəm, qəhrəmanım,

Bu aydın həqiqəti görməyim? Necə danım?

Sizə alqış söyləyir elim-obam, dörd yanım,

Ali Baş Komandanım!

Yusif MİLLƏTOĞLU

525-ci qəzet .- 2024.- 24 dekabr(№236).-S.14.