Xətai Sənət Mərkəzində rəssam Bayram Qasımxanlının sərgisi açılıb

Xətai Sənət Mərkəzində Azərbaycan Rəssamlar İttifaqının üzvü, Azərbaycan Dövlət Memarlıq və İnşaat Universitetinin baş müəllimi, pedaqoq, qrafika rəssamı, karikatura və eksilibris ustası Bayram Qasımxanlının “Qrafika” kitabının təqdimatı keçirilib və “Qara rəngin zəhmi” adlı sərgisi açılıb.

Mərkəzdən AZƏRTAC-a bildirilib ki, tədbiri giriş sözü ilə sənətşünas, Milli İncəsənət Muzeyinin aparıcı mütəxəssisi, Azərbaycan Elmlər Akademiyasının doktorantı, “Qrafika” kitab-kataloqun mətn müəllifi Əsəd Quliyev açaraq kitab haqqında məlumat verib.

Xətai Sənət Mərkəzinin direktoru Zahid Əvəzov qonaqları salamlayaraq müəllifə uğurlar arzulayıb.

Sonra Azərbaycan Rəssamlar İttifaqının üzvü, rəssam-qrafik-dizayner Mais Əliyev, Memarlıq və İnşaat Universitetinin müəllimləri - xalçaçı rəssam Oktay Murtuzayev, Əməkdar müəllim Yaşar Səmədov, sənətşünas, fəlsəfə elmləri doktoru Dilarə Vahabova öz ürək sözlərini bölüşüblər.

Tədbirdə rəssamın sənət dostları, tələbələri iştirak edib.

525-ci qəzet .- 2025. -5 aprel(№56).- S.13.