Qarabağa həsr olunan rəsm əsərlərinin sərgisi açılıb

Bakıda gənc rəssamların Qarabağa həsr olunan rəsm əsərlərindən ibarət sərgi açılıb.

Bu barədə AZƏRTAC-a Qarabağ Dirçəliş Fondundan məlumat verilib.

Tədbirdə QDF-nin İdarə Heyətinin sədri Rəhman Hacıyev çıxış edərək bildirib ki, Qarabağın əsrarəngiz təbiətinə, tarixi abidələrinə, eləcə də Prezident İlham Əliyevin rəhbərliyi ilə işğaldan azad olunmuş ərazilərdə aparılan bərpa-quruculuq işlərinə həsr edilən 38 rəngkarlıq əsəri gənc rəssamların inkişafına töhfə vermək məqsədilə dünyaşöhrətli almaniyalı rəssam, Berlin Rəssamlıq Akademiyasının professoru İnqa Şmidtin Azərbaycan Dövlət Rəssamlıq Akademiyasının (ADRA) və Azərbaycan Dövlət Mədəniyyət və İncəsənət Universitetinin (ADMİU) tələbələri üçün Fondun dəstəyi ilə keçirdiyi master-klas çərçivəsində hazırlanıb.

O diqqətə çatdırıb ki, QDF və ADRA-nın birgə təşkilatçılığı ilə artıq “Qarabağın rəngləri–2025” layihəsinin icrasına start verilib. Belə ki, layihədə iştirak edəcək finalçıların seçim mərhələsi yekunlaşıb, onların ərsəyə gətirəcəyi əsərlərin eskizlərinin hazırlanması prosesi isə davam edir.

Qeyd olunub ki, rəssam İnqa Şmidtin master-klasında iştirak edən gənclərin əksəriyyəti yüzlərlə digər tələbələr arasından seçilən, “Qarabağın rəngləri–2025” layihəsinin final mərhələsində iştirak etmək hüququ qazanan ADRA və ADMİU-nun tələbələridir.

R.Hacıyev xatırladıb ki, ötən il keçirilən “Qarabağın Rəngləri-2024” layihəsi çərçivəsində ADRA-da təhsil alan 23 istedadlı gənc tərəfindən hazırlanmış 19 rəsm əsərinin və 4 heykəltaraşlıq nümunəsinin satışından əldə olunmuş 90 min 200 manat vəsait Ağdam rayonu ərazisində yerləşən İmarət kompleksinin bərpasına yönəldilib.

Tədbirdə, həmçinin Azərbaycan Rəssamlıq Akademiyasının rektoru, Xalq rəssamı Natiq Əliyev, akademiyanın prorektoru, Xalq rəssamı Salxab Məmmədov və Azərbaycan Dövlət Mədəniyyət və İncəsənət Universitetinin rektoru Ceyran Mahmudova çıxış edərək layihənin əhəmiyyətindən danışıb, onun gənc rəssamların gələcək yaradıcılıq fəaliyyətinə böyük töhfə verəcəyini vurğulayıblar.

Çıxışlardan sonra rəsm əsərlərinin müəlliflərinə xüsusi sertifikatlar təqdim olunub.

Sonda sərgi iştirakçıları nümayiş olunan əsərlərlə tanış olub, xatirə şəkli çəkdiriblər.

525-ci qəzet .- 2025.- 17 aprel(№64).-S.9.