Cüdomuzun gücü və yeniləşən ruhu

Bakı İdman Sarayı üç gün yenidən tatami üzərində ağ və göy cüdokilərin heyrətamiz rəqsinə şahidlik etdi. Dekabrın 5-dən 7-dək burada cüdo üzrə növbəti Azərbaycan çempionatı keçirildi. Kişilər və qadınlar arasında bu idman növü üzrə ən güclülər müəyyənləşdirildi. Cüdoçular həm fərdi qaydada döyüşdülər, həm də komanda halında...

Çempionatın nəticələri ölkə mediasında ətraflı işıqlandırıldığı üçün, necə deyərlər, təfərrüata varmaq istəmirəm. Bir məqamı xüsusi vurğulayardım: qaliblər, medalçılar arasında köhnə qvardiyanın nümyəndələri də var, yeni nəsil idmançılar da... Onların hər biri öz döyüş ruhunu, əzmkarlığını nümayiş etdirdi, istedad və ustalıq səviyyəsini göstərdi.

Çempionatın təşkilatçılığı yüksək səviyyədə idi: ən müasir avadanlıqların və texnologiyaların tətbiq edildiyi zaldakı parlaq işıqlandırılmış tatami, çoxsaylı məlumat lövhələri, yarışa xidmət edən hakimlərin və texniki heyətin səmərəli və operativ işləmələri üçün yaradılmış rahatlıq, funksionallıq, üstəgəl, tamaşaçılarla dolu olan tribunalarda azarkeşlərin həyəcanı və intizarı böyük maraq və məmnunluq doğururdu.

Əslində, ölkə çempionatı daxili seçim məqsədi daşıyır, burada qalib gəlmək, yalnız medal qazanmaq deyil, həm də milli komandanın əsas heyətinə düşmək, gələcək beynəlxalq turnirlərdə iştirak etmək imkanı verir. Tatamiyə çıxan hər bir idmançı dərk edir ki, bu meydan Avropa və dünya arenalarına, həmçinin Olimpiya xəyallarına gedən yolun təməlidir. Buna görə də qarşılaşmalarda böyük gərginlik və məsuliyyət hissinin hökm sürməsi təbii idi.

Yarışlar zamanı nümayiş etdirilən çeşidli texnika və taktika, Azərbaycan cüdosu üçün ənənəvi olan gücə və sürətə əsaslanan döyüş tərzi ilə yanaşı, bəzi idmançıların rəqiblərini tamamilə çaşdıran yeni, qeyri-standart fəndlər tətbiq etməsi xüsusi diqqət çəkirdi. Bu, məşqçilər heyətinin müasir cüdo tələblərinə uyğun olaraq fərdi yanaşmaları inkişaf etdirdiyini göstərir. Xüsusilə, final görüşlərindəki psixoloji mübarizə yaddaqalan oldu. Bəzən fənd deyil, məhz son saniyədəki soyuqqanlılıq və rəqibin taktikasını oxumaq bacarığı qalibi müəyyən edirdi. Komanda yarışlarında Şuşa Uşaq-Gənclər İdman Məktəbinin qadın cüdoçularını birinci pilləyə yüksəlməsi sürpriz hadisə kimi yadda qaldı.

Əminliklə deyə bilərik ki, hazırda Azərbaycan cüdosu dünyanın idman ictimaiyyətinin diqqət mərkəzindədir və bu, tamamilə qanunauyğun bir haldır. Beynəlxalq arenalarda ölkəmizi təmsil edən idmançılarımızın əksəriyyəti nəinki dünya cüdosunun ən nüfuzlu nümayəndələri ilə bərabər səviyyədə mübarizə aparmağı bacarır, hətta ən mötəbər yarışlarda, çox böyük arenalarda onlara üstün gələ, bayrağımızı yüksəklərə qaldıra, hamını Dövlət Himnimizi dinləməyə təşviq edə bilirlər.

Yeri gəlmişkən, bu il Azərbaycan cüdosunun nailiyyətlərinin kulminasiya nöqtəsi Səudiyyə Ərəbistanının Ər-Riyad şəhərində keçirilən VI İslam Həmrəyliyi Oyunları oldu. Olimpiya çempionlarımız Hidayət Heydərovun və Zelim Kotsoyevun öz çəki dərəcələrində rəqibsiz liderliklərini təsdiqləməsi, eləcə də cüdoçularımızın qarışıq komanda yarışlarında bütün rəqiblərinə qalib gələrək tarixi birincilik qazanması hər birimizi qürurlandırdı. Azərbaycanın tatami ustalarının sıralarına Hüseyn Allahyarov, Kənan Nəsibov, Elcan Hacıyev və digər gənc istedadların qoşulması cüdomuzun gələcəyinin təminatıdır.

Tamaşaçısı olduğum cüdo üzrə ölkə çempionatındakı təşkilatçılığın yüksək səviyyəsini bir daaha qeyd edərkən, Azərbaycan Cüdo Federasiyasının son illərdəki yüksək nəticələrə hədəflənmiş səmərəli fəaliyyətini, bu sahəyə dövlət qayğısını vurğulamaqla yanaşı, ölkə çempionatının sponsorlarının “Azercell”in və “AZMAN holding”in xeyriyyəçilik dəstəyinə də dəyər verməyi vacib sayıram. Xüsusən də, “AZMAN holding” öz həmtəsisçisi, Azərbaycan Cüdo Veteranları Assosiasiyasının prezidenti, Azərbaycan Cüdo Federasiyası İcraiyyə Komitəsinin üzvü, ustalar və veteranlar arasında dünya və Avropa çempionatlarının qalibi Azər Əsgərovun timsalında ölkəmizin cüdo ənənlərinin inkişafına daim sanballı töhfə verir. Son iki ildə milli çempionata sponsorluq etməkdən başqa, şirkət 2017-2023-cü illərdə əfsanəvi kəşfiyyatçı, polkovnik-leytenant Raquf Orucovun və digər şəhidlərimizin xatirəsinə həsr edilmiş ənənəvi beynəlxalq cüdo turnirinin təşkilatçısı olub. Azər müəllimin təşəbbüsü ilə Əməkdar Bədən Tərbiyəsi və İdman xadimi, “Şöhrət” ordenli, Əməkdar məşqçi Tərlan Həsənov haqqında yazılmış “Bir cüdo əfsanəsi” kitabı isə gənc nəsil arasında bu idman növünün populyarlaşmasına xidmət edir. Kitabın müəllifi kimi bunu qeyd etməyə bilmərəm...

Çempionatın əsas təəssüratı isə belədir: Azərbaycan cüdosu öz ənənələrinə sadiq qalmaqla yanaşı, daim yenilənir və inkişaf edir. Tatamidə nümayiş etdirilən hər bir fənd və qazanılan hər bir medal idmançılarımızın beynəlxalq arenada yeni uğurlar qazanmaq əzmində olduqlarını bir daha sübuta yetirdi. Cüdo üzrə Azərbaycan çempionatı gələcəyin Olimpiya və dünya çempionlarının yetişdiyi məkan kimi öz əhəmiyyətini yenidən təsdiqlədi...

Elşən Əliyev

Əməkdar jurnalist

525-ci qəzet .- 2025.- 10 dekabr (№ 225).- S.16.