Azərbaycan 42-ci İstanbul Beynəlxalq Kitab Sərgisində təmsil olunur

İstanbul, Türkiyə – 13–16 dekabr 2025 — Azərbaycan Respublikası 42-ci İstanbul Beynəlxalq Kitab Sərgisində uğurla iştirak edir. Qeyd edək ki, Azərbaycan ötən il bu mötəbər tədbirdə “Fəxri qonaq ölkə” statusu ilə təmsil olunub. TÜYAP Sərgi və Konqres Mərkəzində təşkil edilən sərgi Azərbaycan–Türkiyə ədəbi və mədəni əlaqələrinin daha da inkişaf etdirilməsi baxımından da mühüm hadisə kimi dəyərləndirilir.

525.az xəbər verir ki, Azərbaycan Respublikası Mədəniyyət Nazirliyinin təşkilatçılığı ilə qurulan milli pavilyonda azərbaycanlı yazıçılar, nəşriyyatlar və mədəniyyət sahəsinin nümayəndələri iştirak edirlər. Pavilyonda klassik və müasir Azərbaycan ədəbiyyatına aid nəşrlər, eləcə də son illərdə çap olunmuş kitablar nümayiş etdirilir.

Sərgi çərçivəsində Azərbaycan stendində müxtəlif ədəbi və mədəni proqramlar həyata keçirilir, kitab təqdimatları, panel müzakirələri və imza günləri təşkil olunur. Bu tədbirlər ziyarətçilərin Azərbaycan ədəbiyyatı və mədəni irsi ilə daha yaxından tanış olmalarına şərait yaradır.

Sərgi çərçivəsində Azərbaycan stendində “Azərbaycan ədəbiyyatı və ortaq türk dili” mövzusunda panel müzakirəsi təşkil olunub.

Azərbaycanın Ankaradakı səfirliyinin nəzdindəki Azərbaycan Mədəniyyət Mərkəzinin rəhbəri Samir Abbasov, “Azərbaycan Nəşriyyatları Assosiasiyası”nın rəhbəri Şəmil Sadiq və əsəbiyyatşünas, tərcüməçi, Azərbaycan Yazıçılar Birliyinin "Dünya ədəbiyyatı" dərgisinin baş redaktoru Seyfəddin Hüseynlinin çıxışçı olduqları paneldə tanınmış şairlər, ədəbiyyatşünaslar, yazıçılar, nəşriyyat nümayəndələri və mədəniyyət sahəsinin mütəxəssisləri iştirak ediblər.

Panel müzakirəsində Azərbaycan ədəbiyyatının ümumtürk ədəbi məkanında tutduğu yer, ortaq türk dilinin formalaşması və inkişafında klassik və müasir Azərbaycan ədəbiyyatının rolu, eləcə də türk xalqları arasında ədəbi əlaqələrin gücləndirilməsinin əhəmiyyəti ətrafında geniş fikir mübadiləsi aparılıb. Çıxışçılar dil birliyinin mədəni inteqrasiyanın əsas dayaqlarından biri olduğunu vurğulamış, ortaq terminologiya, qarşılıqlı tərcümə fəaliyyəti və nəşriyyat əməkdaşlığının genişləndirilməsinin vacibliyini qeyd etmişlər.

Sərgi günlərində Azərbaycan nümayəndə heyəti Türkiyənin müvafiq dövlət qurumlarının, nəşriyyat evlərinin və mədəniyyət təşkilatlarının nümayəndələri ilə görüşlər keçirir, kitab sənayesi və ədəbi əməkdaşlıq sahəsində mövcud imkanlar və gələcək perspektivlər ətrafında fikir mübadiləsi aparır.

Azərbaycanın 17 dekabradək davam edəcək 42-ci İstanbul Beynəlxalq Kitab Sərgisində uğurlu iştirakı milli ədəbiyyatın beynəlxalq müstəvidə tanıdılması, mədəni diplomatiyanın gücləndirilməsi və Azərbaycan–Türkiyə arasında ədəbi əlaqələrin daha da möhkəmləndirilməsi baxımından xüsusi önəm daşıyır.

525-ci qəzet .- 2025.- 16 dekabr (№229).- S.9.