Akademik: Qərbi Azərbaycan məsələsinin tarixi kökləri Türkmənçay müqaviləsindən sonrakı dövrə gedib çıxır

Qərbi Azərbaycan məsələsi bu gün Azərbaycan dövlətinin daxili və xarici siyasətində prioritet istiqamətlərdən biri kimi formalaşıb.

AZƏRTAC xəbər verir ki, bu sözləri Elm və Təhsil Nazirliyi İnformasiya Texnologiyaları İnstitutunun baş direktoru akademik Rasim Əliquliyev “Böyük yolun davamı” adlı konfransda çıxışı zamanı söyləyib.

Akademik bildirib ki, Prezident İlham Əliyevin yerli və beynəlxalq platformalarda Qərbi Azərbaycan mövzusunu ardıcıl şəkildə gündəmə gətirməsi dövlətin siyasi iradəsini və məsələnin strateji əhəmiyyətini açıq şəkildə göstərir. Qərbi Azərbaycana qayıdış artıq tarixi yaddaşın bərpası olmaqla yanaşı, beynəlxalq hüquqa əsaslanan legitim və real siyasi hədəf kimi qəbul olunur.

“Bu məsələ yalnız son dövr hadisələri ilə məhdudlaşmır, onun tarixi kökləri Türkmənçay müqaviləsindən sonrakı dövrə gedib çıxır. Belə ki, XIX–XX əsrlər boyunca azərbaycanlıların Qərbi Azərbaycandan mərhələli şəkildə deportasiyası, mədəni irsin məhv edilməsi və tarixi yaddaşın silinməsi sistemli xarakter alıb. Qərbi Azərbaycan anlayışı təkcə ərazi deyil, yüzillər ərzində formalaşmış sosial-mədəni mühitin, tarixi abidələrin və milli kimliyin bütöv şəkildə məhv edilməsinə qarşı mübarizədir”, - deyə R. Əliquliyev vurğulayıb.

525-ci qəzet .- 2025.- 23 dekabr (№234).- S.5.