Niyə üzgüçülük ilə məşğul olmalıyıq?

Azərbaycan xalqı coğrafi və tarixi baxımdan quru xalqıdır. Dəniz və ya okeandan uzaqlığımız düşüncə formamızda, ətraf aləmi necə dərk etməyimizdə özünü göstərir. Məsələn, çinlilərdə olduğu kimi, bizim dastan və miflərimizdə su əjdahasına rast gəlinmir. Dastanlarımızda bəhs olunan axar suyun qarşısını kəsən əjdaha quru canlısıdır. Sudan uzaqlığımız özünü böyük coğrafi kəşflərdən kənarda qalmağımızda, eləcə də gəmi donanmamızın Avropa xalqlarına nəzərən olduqca gec yaranmasında da təsirli olmuşdur. Sosial tərəfdən baxdıqda isə üzgüçülüyün Azərbaycanda cüdo, güləş, futbol kimi idman növləri ilə müqayisədə daha az populyar olduğu görünür. Bu səbəbdən də Azərbaycan idmançılarının su idman növlərində nəticələri ürəkaçan deyil.

Üzgüçülük bütün dünyada populyarlığına görə seçilən idman növü olmaqla yanaşı, faydalılığna görə də bir çox idman növündən fərqlənir.

Üzgüçülük əhalinin az qala bütün qruplarına xitab edir. Yaşlılar, fiziki problemləri olan fərdlər, riskli hamiləlik vəziyyəti istisna olmaqla hətta hamilə qadınlar belə üzgüçülük ilə məşğul ola bilərlər. Vurğulamaq lazımdır ki, əksər idman növlərindən fərqli olaraq üzgüçülükdə ciddi zədələnmək ehtimalı çox azdır.

Üzgüçülüyün sağlamlığa faydaları çoxdur. Üzgüçülük qan-damar sistemini gücləndirir, əzələləri möhkəmləndirir, bədənin elastikliyini artırır və bədəndə stress səviyyəsini aşağı salır. Daimi formada üzgüçülük ilə məşğul olduqda insanlarda yuxu rejiminin yaxşılaşması və yüksək əhval-ruhiyyənin uzun müddət davam etməsi müşahidə olunur. Bununla yanaşı, bütün əsas əzələ qruplarının işlədildiyi üzgüçülük fəaliyyəti sağlam formada arıqlamağa və qazanılmış bədən formasını saxlamağa kömək edir.

Müasir dövrdə üzgüçülük bəzi fiziki və psixoloji travmaların müalicəsində effektiv müalicə üsulu kimi istifadə olunur. Üzgüçülük, xüsusilə hidroterapiya, zədələnmiş əzələlərin və oynaqların sağalması üçün mükəmməl bir vasitədir. Suyun yüngülləşdirici xüsusiyyəti hərəkət zamanı təzyiqi azaldır və ağrısız reabilitasiyanı təmin edir. İsti suda üzmək qan dövranını yaxşılaşdıraraq oynaq ağrılarını azaldır və hərəkət qabiliyyətini artırır. Skolioz və digər onurğa deformasiya problemlərinin müalicəsində üzgüçülük əzələ balansını bərpa edir və duruşu düzəldir.

Üzgüçülük fəaliyyətinin bədən quruluşuna və yuxu rejiminə müsbət təsiri davam etdikcə onun sosial və psixoloji faydaları da üzə çıxır. Belə ki, məşqdən sonra bədəndə yaranan rahatlıq hissi psixoloji vəziyyətin yaxşılaşmasına, insanların xoşbəxt hiss etməsinə səbəb olur. Üzgüçülük qamətin düzəlməsinə, ağciyərlərin hava tutumunun artmasına və hətta diksiyanın yaxşılaşmasına kömək edir. Yuxarıda sadalanan bütün faktorlar insanın özünəinamını artırır və əzmkar xarakter formalaşdırır.

Üzgüçülük sadəcə idman deyil, həm də bədənimizi və ruhumuzu gücləndirən bir həyat tərzidir. Hər yaşda və vəziyyətdə olan insanın bu fəaliyyətdən faydalana biləcəyi məlumdur. Üzgüçülüyü həyatımıza daxil etmək bizə daha sağlam və xoşbəxt bir həyatın qapılarını açacaq.

Sabir ETİBARLI

525-ci qəzet .-2025.- 11 fevral(№25).- S.13.