Rənglərin dilində danışan adam

İyulun 21-də Laçındakı "Yurd" qalereyasında Azərbaycan Rəssamlar İttifaqının gənc üzvü, rəssam Fuad Musayevin fərdi sərgisi keçiriləcək.

Əslən Laçından olan 24 yaşlı Fuadı ölkənin mədəni ictimaiyyəti də, Laçıın camaatı da yaxşı tanıyır. Fuad dünyaya gələndən hamı kimi deyil - eşitmə və nitq məhdudiyyəti var. Və Fuad bugün də hamı kimi deyil - hamı kimi adi deyil, fərqlidir, istedadlıdır. Onun səsi rənglər, özünü ifadə tərzi - rəssamlıq, sözü, cümləsi, fikri - rəsmlərdir.

- Fuad, Qarabağda ilk fərdi sərginiz olacaq. Yəqin həyəcanlısınız. Hazırlıq necə gedir?

- Laçın şəhərində ilk qalereya açılanda ürəyimdən keçdi ki, Qarabağa həsr etdiyim rəsmləri - "Qarabağ xatunu", "Həkərim", "Naxışlarım", "Şuşam" və digər əsərləri burada sərgiləyim. Şuşanı təsvir edən ilk əsərimi 7 yaşımda çəkmişdim. Sonra, uzun illər sonra həmin rəsmi Şuşa döyüşlərində yaralanmış Qarabağ qazisinə hədiyyə etmişdim.

- Əsərlərinizi yalnız hədiyyə edirsiniz?

- Yox, satış sərgilərində də oluram. Və rəsmlərdən əldə olunan gəlirlə məhdudiyyəti olan uşaqların ehtiyaclarını ödəməyə çalışıram. Eyni zamanda onlara sənətin sirlərini də öyrədirəm. Bu peşəyə yiyələnməkdə mənə ailəm dəstək oldu. Əvvəl Əzim Əzimzadə adına Rəssamlıq Kollecində, sonra Azərbaycan Dövlət Rəssamlıq Akademiyasında təhsil aldım.

- Müəllimlərinizin dediyinə görə, hər iki təhsil ocağını yüksək qiymətlərlə başa vurmusunuz.

- Elədir. Düşündüm fiziki məhdudiyyətli elə uşaqlar var ki, təhsil almaq onların imkanları xaricindədir. Yenə də ailəmin köməyilə belə uşaqlar üçün öz məktəbimi, studiyamı qurduq. Bu gün həm də Əmək və Əhalinin Sosial Müdafiəsi Nazirliyinin tabeliyində olan Dost İnklüziv İnkişaf Yaradıcılıq Mərkəzinin İsmayıllı "Dost Evi" filialının təlimçisiyəm. Uşaqlar mənim yanıma sevə-sevə gəlirlər. Rənglərin dünyası tamam başqa bir aləmdir.

- Bəs sizin bu dünyanızda həyat nə rəngdədir?

- Mənim aləmimdə həyat bir rəngdən ibarət deyil, orada sevincin qırmızısı da var, ümidin yaşılı da, kədərin mavisi də var, motivasiyanın narıncısı da. Həyat rəngarəng bir palitradır, biz hər gün yeni rənglər əlavə edirik - gah parlaq, gah solğun, hamısı da bizim həyat hekayəmizin bir hissəsinə çevrilir.

- Bu ay həyat hekayənizə bir önəmli tarix də yazılacaq - 21 iyul.

- "Yurd çağırır məni" - sərgi belə adlanacaq. Düşünürəm, artıq işlərimi yurdumun adamlarına göstərməyin zamanı yetişib. Çox istəyirəm ki, sərgiyə hər bir laçınlı gəlsin. Və çox isstəyirəm ki, fiziki məhdudiyyəti olan gənclər də gəlsinlər sərgiyə. Gəlib görsünlər ki, heç bir əngəl, heç bir məhdudluq mənəvi zənginliyə və həyat eşqinə mane ola bilməz. İnsan özünü sənətdə də tapa bilər, elmdə də, yaradıcılıqda da. Əsas odur ki, istəsin. İstəsə, mütləq bacaracaq. Bayaq soruşdunuz ki, həyəcanlıyammı? Bəli, həyəcanlıyam. Amma bu, çox sevincli və qürurverici bir həyəcandır.

"525"

525-ci qəzet .- 2025.- 8 iyul(№116).-S.11.