Novruz Nəcəfoğlunun hekayələri “Köhnə komanın işığı”nda

Tanınmış yazıçı Novruz Nəcəfoğlunun yeni kitabı nəşr olunub. “Köhnə komanın işığı” adlanan bu kitaba müəllifin yaradıcılığının ayrı-ayrı dövrlərində qələmə aldığı 25 hekayə daxildir. Mövzu və mündəricə baxımından xeyli fərqlənən bu hekayələr kitabda “Bilinməz dünyanın sirri...”, “Eşq imiş, hər nə var aləmdə...”, “Ötən günlər” dəftərindən” və “Zəmanənin ovqatı” adlı dörd bölmədə təqdim olunur.

Hekayələrdə keçmişə və indiyə, insana və insanlığa, ailəyə, dostluğa, halallığa, xeyirxahlığa və digər ülvi anlayışlara yazıçı münasibətinin ədəbi-bədii ifadəsi öz əksini tapıb. Eləcə də eşqin ilahi və bəşəri təzahürlərindən yaranan duyğu-düşüncələr, yaddaşa həkk olunan çoxçalarlı təəssüratlar yazıçı qələmi ilə işığa çıxarılıb.

Bir qismi bütünlüklə yazıçı təxəyyülünün məhsulu olan hekayələrlə yanaşı, kitabda tutarlı səviyyədə gerçək əhvalatlara, olmuş hadisələrə əsaslanan və bədii-sənədli nəsr xarakteri daşıyan mətnlər də var.

Kitabda N.Nəcəfoğlunun yaradıcılıq üslubunu xarakterizə etmək, nasir dəst-xəttini səciyyələndirmək baxımından önəm daşıyan fikirlərə də yer verilib. Millət vəkili, filologiya elmləri doktoru Elnarə Akimova bu mövzuda yazır: “Novruz Nəcəfoğlunun mətnlərinin dili axıcı və ritmik, təhkiyəsi dinamikdir, buna görə oxucu ilə asan, səmimi ünsiyyət qurur... Bu əsərlərdə psixoloji varlıq olan insanın iç dünyası sosial əhatədən mənəvi-əxlaqi dəyərlərə, fəlsəfi sıraya qədər ən müxtəlif sıralarda gəzişir. Təmkinli üslub, lirika, prozaizm, ironiya - Novruz Nəcəfoğlunun mətnlərində qəti estetik müəyyənliyə malik ton olaraq bəlirlənir”.

AMEA-nın müxbir üzvü, filologiya elmləri doktoru, professor Tehran Əlişanoğluya görə isə: “Novruz Nəcəfoğluimza yaratmağı bacarmış yazardır... O, illüziyalı yazmır, sadəcə komplekssiz yazır; qələmində sərbəstdir, hiyləsizdir və zamanların dialoqunu faktın sükutundan, bunu fiksə edən bədii sözün təsdiqindən çıxarır... Babaların, ataların dostluğu, övladların dostluğu, nəvələrə nümunə kimi yeri düşdükcə mətnə ötürülən mental intensiyalar ümumən Novruz Nəcəfoğlu yaradıcılığına xas ümdəliklərdəndir”.

Kitabın “Bilinməz dünyanın sirri...” bölümündə N.Nəcəfoğlunun “Bəmbəyaz keçiddə”, “Əcəlin kölgəsi”, “Kövrək əsintilər”, “Hikkə”, “Bir ovuc badam”, “Köhnə komanın işığı”, “Çərçivədəki şəkil” hekayələri verilib.

“Eşq imiş, hər nə var aləmdə...” adlı bölümdə “Yalın belində görüş”, “Sarı ipək şərf”, “Yağışda dayanacaqdakı qadın”, “Bu, bir eşq hekayəsi”, “Ovcuma qazıdığım ad” yazıçının hekayələri sıralanıb.

Müəllifin “Ağayana təbəssümlü qonaq”, “Yaddaşıma yazılan gün”, “Yadigar köynək”, “İlk şeirimin şirinliyi”, “Fərhadın “şirin” şakəri”, “Dünyanın “adamlar”ı, dünyanın itləri”, “Gəl birlikdə ölək...” hekayələri kitabdakı “Ötən günlər” dəftərindən” bölümündədir.

“Zəmanənin ovqatı” adlandırılmış bölümdə isə yazıçının “Ay sizi, pir olmuşlar...”, “Dəqiq adam”,”O elin “təmənnasızları”, “Peşmançılıq”, “Bir görüş - iki üzüntü”, “Yaxşı qurtardıq” hekayələri təqdim olunub.

Kitabın tərtibçisi və ədəbi-bədii redaktoru Seyfəddin Hüseynli, texniki redaktoru Vüsalə Babayeva, korrektoru Gülzar Səfərovadır.

Tanınmış naşir Elman Qasımovun rəhbərlik etdiyi “Zərdabi Nəşr”də çap olunmuş kitab dizayner Azər Aydının texniki tərtibatında işıq üzü görüb.

525-ci qəzet .- 2025.- 15 iyul(№121).-S.9.