Elmi yaradıcılığın və şəxsiyyətin harmoniyası

Hörmətli redaksiya!

Milli mətbuatımızın 150 illik yubileyi ilə bağlı Azərbaycan Prezidentinin Sərəncamından sonra Azərbaycan elmi, ictimai və media mühitində çoxsaylı tədbirlər gerçəkləşdirildi. Bu tədbirlərin hamısında milli mətbuatımızın keçdiyi tarixi yol maraqlı məruzələr və çıxışlarla yadda qaldı.

Belə tədbirlərdən biri iyulun 17-də Azərbaycan Milli Elmlər Akademiyasının Nizami Gəncəvi adına Ədəbiyyat İnstitutunda təşkil olunmuşdu. Mən bundan əvvəlki tədbirlərin də bir çoxunda iştirak etmiş jurnalist kimi etiraf etməliyəm ki, AMEA-da həyata keçirilən tədbir özünün bir çox istiqamətləri ilə daha çox yaddaşlarda qaldı. Tədbirdə AMEA prezidenti, akademik İsa Həbibbəylinin geniş formatda məruzəsi tədbir iştirakçıları tərəfindən yüksək maraqla qarşılandı. Akademik İsa Həbibbəyli Azərbaycan Prezidentinin Milli mətbuatımızın 150 illik yubileyi ilə bağlı Sərəncamının bütün tezislərini əsas götürərək məruzəsini bu kontekstdə hazırlamışdı.

Yəqin ki, oxucularımız akademik İsa Həbibbəylini humanitar tariximizin mahir bir tədqiqatçısı və həm də "525-ci qəzet"in sanballı müəlliflərindən biri kimi yaxşı tanıyırlar. İsa müəllim ədəbiyyatımızı və milli mətbuatımızı sənətə beynəlxalq baxış kontekstində araşdırmağı və təhlil etməyi ilə Azərbaycan tədqiqatçılıq mühitində ciddi bir məktəb yaratmışdır. Onun tədbirdəki məruzəsinin tezislərinin hər biri ətrafında dissertasiya mövzuları təqdim etmək olar. Alimin "Cəlil Məmmədquluzadə: mühiti və müasirləri" kimi fundamental bir doktorluq işindəki elmi mənbələrə diqqət etməklə onun mövzuya və problemə necə diqqət və cəsarətlə yanaşmasının şahidi olmaq mümkündür. Bu əsər hazırda milli mətbuatımızın tədqiqatçıları üçün mükəmməl elmi mənbədir.

Tədbirdə çıxış edən Yeni Azərbaycan Partiyasının Yasamal rayon təşkilatının sədri, tarix elmləri doktoru, professor Bəxtiyar Nəbiyev, AMEA Nizami Gəncəvi adına Ədəbiyyat İnstitutunun Mətbuat tarixi və publisistika şöbəsinin müdiri, filologiya üzrə elmlər doktoru, professor Vüqar Əhməd, həmin şöbənin əməkdaşı, filologiya üzrə elmlər doktoru Gülbəniz Babayeva və başqaları mətbuat tariximizin ünlü tədqiqatçılarını - Əziz Şərif, Abbas Zamanov, Əziz Mirəhmədov, Şamil Qurbanov, Nazim Axundov və başqalarının bu sahədəki yaradıcılığını yüksək qiymətləndirdilər. Milli mətbuat tariximizin ən yaddaqalan tədqiqatçısı, yaradıcılığı dövlətimiz tərəfindən yüksək qiymətləndirilən professor Şirməmməd Hüseynovun fəaliyyəti ayrıca olaraq maraqlı faktlarla yüksək dəyərləndirildi.

Tədbirin sonunda AMEA-nın bir qrup alimi mətbuatda göstərdikləri elmi-praktik fəaliyyətinə görə həm mənəvi, həm də maddi cəhətdən mükafatlandırıldı.

Tədbirin daha bir maraqlı cəhəti AMEA-nın prezidenti, akademik İsa Həbibbəylinin ayrı-ayrı media qurumlarına və BDU Jurnalistika fakültəsinə Ədəbiyyat İnstitutunun milli mətbuatımızın bir sıra klassik nümunələrini, o cümlədən, "Molla Nəsrəddin" jurnalının transliterasiya nəşrini və "Molla Nəsrəddin" ensiklopediyasının nəşrini hədiyyə etməsi ilə yadda qaldı.

Tədbirin gedişini izlədikcə mən hələ neçə il bundan əvvəl İsa Həbibbəyli ilə bağlı düşüncəmin dəqiq ünvanını tapdım; Akademik İsa Həbibbəyli elmi yaradıcılığın, vətəndaşlığın və şəxsiyyətin harmoniyası kimi üç mühüm keyfiyyəti özündə birləşdirən bir alimdir.

Hörmətli redaksiya!

AMEA Nizami Gəncəvi adına Ədəbiyyat İnstitutunda təşkil olunmuş bu tədbir haqqında xəbər janrında hazırladığım bu kiçik yazını sizə təqdim etməklə milli mətbuat tariximizin bu gün tamam olan 150 illik yubileyi münasibətilə qocaman bir jurnalist kimi bu tədbiri hazırlayanlara və şəxsən akademik İsa Həbibbəyliyə öz təşəkkürümü bildirmək istədim.

Cahangir MƏMMƏDLİ

BDU Milli mətbuat tarixi kafedrasının müdiri, filologiya elmləri doktoru, professor

525-ci qəzet .- 2025.- 22 iyul(№126).-S.10.