Üçüncü Şuşa Qlobal Media Forumunun əsas mesajları

İyulun 19-21-də Xankəndidə keçirilən III Şuşa Qlobal Media Forumunda Azərbaycan Prezidenti İlham Əliyevin çıxışı, səsləndirdiyi fikirlər dünya gündəminin əsas mövzusuna çevrildi. Xarici ölkələrin aparıcı mediaları, eyni zamanda sosial platformalar məhz Azərbaycan liderinin mesajlarına fokuslanaraq, xəbərlər, şərhlər yayımladılar.

Bu il keçirilən Forum 52 ölkədən 140 qonağı, 30-a yaxın informasiya agentliyinin və 80 media qurumunun nümayəndələrini bir araya gətirdi. Ümumiyyətlə, Şuşa Forumu artıq ənənə halını almaqla, beynəlxalq bir platformaya çevrilməkdədir. Builki Forumun mövzusu "Rəqəmsal keçidlər: Süni intellekt dövründə informasiya və media dayanıqlılığının gücləndirilməsi" idi.

Zəngəzur dəhlizi

Hazırda Zəngəzur dəhlizi ətrafında müxtəlif müzakirələr aparılır, bir sıra güclərin dəhlizə olan marağı, hətta rəqabəti özünü açıq şəkildə göstərir. Bir neçə gün əvvəl ABŞ-nin Zəngəzur dəhlizini idarə etməyə götürməyə hazır olduğu ilə bağlı informasiya tirajlandı. Mövzu Şuşa Media Forumunda da gündəmə gətirildi. Prezident İlham Əliyev bildirdi ki, Zəngəzur dəhlizi bir çox ölkələri birləşdirəcək: "Biz isə daşımaların bu dəmir yolu və ya avtomobil yolu ilə həyata keçirilməsinin zəruriliyindən danışarkən, təkcə Azərbaycanın əsas hissəsinin onun Naxçıvan Muxtar Respublikası ilə birləşdirilməsini nəzərdə tutmuruq. Söhbət beynəlxalq tranzit dəhlizdən gedir. Zəngəzur dəhlizinin potensialını ilkin mərhələdə 15 milyon ton yük səviyyəsində qiymətləndiririk. Biz demək olar ki, Ermənistan və İranla sərhədimizin qovuşuğuna qədər dəmir yolunun tikintisini başa çatdırırıq və yəqin ki, bir ildən az müddətdə, bəlkə də gələn ilin yazında bu dəmir yolunun Azərbaycan hissəsi hazır olacaq".

Dövlət başçısı əlavə edib ki, Ermənistan Zəngəzur dəhlizi ilə bağlı prosesi bundan sonra da bloklasa, onun nə vaxtsa tranzit ölkəyə çevrilmək şansı sıfıra yaxınlaşır: "Təəssüf ki, son beş ildə Ermənistan tərəfində heç bir iş (Zəngəzur dəhlizi ilə bağlı - red.) aparılmayıb. Bu məsələ qəsdən gündəmdən çıxarılır. Belə olan halda, Ermənistanın nə vaxtsa tranzit ölkəyə çevrilmək şansı sıfıra yaxınlaşır. Əgər onlar bu prosesi əngəlləməkdə davam etsələr, düşünürəm ki, nəinki bu gün düşdüyü nəqliyyat təcridində, həm də müəyyən dərəcədə siyasi təcrid vəziyyətində olacaqlar".

Amerika şirkətinin Zəngəzur dəhlizini icarəyə götürməsi ilə bağlı məsələyə gəlincə, dövlət başçısı deyib ki, bu sual Ermənistan rəhbərliyinə ünvanlanmalıdır: "Bizim ərazidə heç bir operator, heç bir ticarətçi, heç bir icarədar ola bilməz. Ermənistan nə etmək istəyir? Onlar çox şey edə bilərlər, mənim bundan xəbərim yoxdur. Onlar artıq dırnaqarası "Avropa müşahidəçiləri"ni də sərhədə dəvət ediblər. Onlar sərhəddəki peşəkar casuslardır və İrana qarşı casusluq fəaliyyəti aparırlar. Xüsusilə də bu son İran-İsrail münaqişəsi zamanı onlar İran sərhədi boyu hərəkət edirlər. Düzdür, onlar binokl vasitəsilə bizə də baxırlar, ancaq biz də öz ərazimizdən onları izləyirik. Sabah Ermənistan istənilən ölkəni, tərəfi də dəvət edə bilər. Bizim üçün isə ən başlıca məsələ odur ki, - mən Əbu-Dabidə həmkarıma dedim, - bizim Azərbaycandan Azərbaycana maneəsiz və təhlükəsiz keçidimiz olmalıdır. Bu, Azərbaycanın bir bölgəsindən ölkənin digər bölgəsinə keçiddir. Bizim yüklər və bizim vətəndaşlar, Azərbaycan vətəndaşları hər dəfə orada sərhədçi erməninin simasını görməli deyil. Budur bizim tələbimiz. Bu, legitim tələbdir, bu, ədalətli tələbdir. Əks təqdirdə bizim vətəndaşlarımız təhlükə altında olacaqdır".

Sülh sazişi

Forumda Azərbaycan-Ermənistan normallaşma prosesi, Əbu-Dabi görüşü ilə bağlı dövlət başçısına suallar ünvanlandı. Prezident bildirdi ki, bunun üçün ATƏT-in Minsk qrupu ləğv edilməlidir: "Məntiq sadədir. Əgər erməni tərəfi Qarabağ münaqişəsinin bitdiyini hesab edirsə, - Minsk qrupu isə Qarabağ münaqişəsi üçün yaradılmışdı, - deməli, onu ləğv etmək lazımdır. Bunun üçün Ermənistan konstitusiyasına dəyişikliklər edilməlidir ki, oradan Azərbaycana ərazi iddialarının yer aldığı müstəqillik bəyannaməsi çıxarılsın".

Azərbaycan Prezidenti deyib ki, sülh sazişinin mətni razılaşdırılıb, bu sənədin paraflanması ideyasını da Azərbaycan tərəfi irəli sürüb. "Prinsipcə, dediyim kimi, biz tabutun üzərini dəmir-betonla qapatmaq və bundan sonra normal yaşamaqdan uzaqda deyilik. Mən bunu əvvəlki görüşlərdə də demişəm: siz öz həyatınızı yaşayın, biz də öz həyatımızı yaşayaq. Ancaq belə olan təqdirdə Cənubi Qafqazda az-çox məqbul situasiya tədricən yarana bilər ki, nəhayət üç ölkə heç olmasa hər hansı əməkdaşlıq imkanlarını müzakirə etməyə başlaya bilsin"

İşğalla barışmamaq

Azərbaycan İkinci Dünya müharibəsindən bu yana işğal altındakı torpaqlarını azad etmiş və ərazi bütövlüyünü bərpa etmiş, müharibəni tam qələbə ilə başa çatdırmış yeganə ölkədir. Ölkəmizin qələbəsinin sirri indi də böyük maraq doğurmaqdadır. Dörd ilə yaxındır Rusiya işğalına qarşı müharibə aparan Ukraynanın "Gordon" media qurumunun təsisçisi jurnalist Dmitro Qordonun da sualı elə bu mövzuda idi: "Siz qalib xalqın Lideri kimi Ukraynaya və ukraynalılara hansı tövsiyələri verə bilərsiniz?"

Prezident İlham Əliyev Azərbaycanın Birinci Qarabağ müharibəsi dövründəki çətinliklərdən, üzləşdiyi faciələrdən, Xocalı soyqırımından söz açaraq deyib: heç vaxt işğalla barışmamaq. Bu, əsas tövsiyədir. Bizim etdiyimiz də bu idi. Daha doğrusu, biz bu prosesi belə görürdük".

ABŞ-Azərbaycan münasibətləri

Məlumdur ki, Bayden administrasiyasının Azərbaycana yönəlik siyasəti qərəz, ikilistandart üzərində qurulmuşdu. Donald Tramp isə həm birinci prezidentliyi dönəmində, həm də indi Azərbaycana qarşı iki ölkənin maraqlarının tələb etdiyi siyasəti aparır. Eyni zamanda, Azərbaycan və Ermənistan arasında yekun sülh sazişinin imzalanmasını diqqətdə saxlayır. Dövlət başçısı deyib ki, Tramp beynəlxalq təhlükəsizik üzrə daha qlobal məsələlərlə məşğul olmasına baxmayaraq, Cənubi Qafqazdakı şəraiti də diqqət mərkəzində saxlayır. Azərbaycana və Ermənistana son nəticədə razılığa gəlməyə kömək etmək səylərinə görə ona çox minnətdarıq. "Hazırda Tramp Administrasiyasının nümayəndələri ilə qarşılıqlı fəaliyyətin bir neçə ayı aydın şəkildə göstərir ki, biz düz yoldayıq. Biz normal münasibətlərə qayıdırıq. Əvvəlki ABŞ Administrasiyası demək olar ki, ABŞ-Azərbaycan əlaqələrini heçə endirmişdi. Dövlət Departamentinin yüksək rütbəli rəsmiləri açıq söyləyirdilər ki, Azərbaycanla bir daha işlər adi qaydada gedə bilməz və bu, suverenliyin və ərazi bütövlüyünün tərəfimizdən bərpa olunması ilə bağlı idi.

Prezident Bayden hər il etdiyi kimi, Azadlığa Dəstək Aktının 907-ci düzəlişinin dayandırılmasından uzaqlaşaraq, bu cür qərarı yenidən qəbul etmədiyini biz çox ciddi nəzərə aldıq, çünki biz onlara Əfqanıstanda lazım olduğumuz zaman, o və onun sələfləri həmin düzəlişin qüvvəsini əvvəllər dayandırırdı. Əfqanıstanda biz onlara artıq lazım olmadığımız dövrdə onlar 1992-ci ildə qəbul olunmuş sanksiyaları Azərbaycana qarşı yenidən tətbiq etdilər... Beləliklə, indi biz hazırda Birləşmiş Ştatlarla güclü tərəfdaşlıq münasibətləri üçün böyük potensialı görürük. Biz Vaşinqtondan çox müsbət mesajlar almışıq və Azərbaycandan gedən mesajlar da çox müsbətdir. Gözləntimiz böyükdür və ümid edirik ki, yaxın gələcəkdə ABŞ-Azərbaycan münasibətlərini yüksək səviyyəyə qaldıracaq mühüm hadisələr olacaq".

Rusiyanın məsuliyyətsiz davranışı Azərbaycanın AZAL şirkətinə məxsus təyyarənin Rusiya səmasında vurulması, ardınca rəsmi Moskvanın məsuliyyətdən qaçması, öhdəliklərini yerinə yetirməməsi iki ölkənin münasibətlərində gərginliyə səbəb oldu. Rusiya bütün faktların ortada olmasına, yeddi ay keçməsinə baxmayaraq, qeyd edilən istiqamətdə hələ də heç bir addım atmayıb. Prezident İlham Əliyev bildirib ki, tələbimiz təbii tələb idi: "Qoy, öz günahlarını etiraf etsinlər. Bizim təyyarəni vuranlar cəzalandırılsın və ailələrə təzminat ödənilsin, qurbanların və yaralıların ailələrinə, AZAL-ın təyyarəsinə görə də təzminat ödənilməlidir. Hər şey gün kimi aydındır ki, ancaq yeddi aydır ki, biz cavab ala bilmirik... Hesab edirəm ki, bu, məsuliyyətsiz davranmaqdır... Biz artıq Rusiya tərəfini məlumatlandırmışıq ki, beynəlxalq ədliyyə sisteminə müraciət edəcəyik. Biz müəyyən bir qovluq hazırlayırıq. Bilirik ki, buna vaxt lazımdır. On il lazım oldu ki, Malayziya hava yollarına məxsus "Boeing"lə bağlı təhqiqat başa çatsın. Ancaq biz bu ədalətə nail olacağıq. Biz bunu əldə edəcəyik. Təəssüf ki, bugünkü vəziyyət ikitərəfli münasibətlərimiz baxımından heç də məqbul deyil".

Media ən yaxşı vasitədir

Azərbaycanın güclənməsi, nüfuzunun artması ona qarşı dezinformasiyaları, şər-böhtan kampaniyalarını da artırır. Bu cür kampaniyalarla mübarizədə, dövlətimizin informasiya siyasətinin dünyaya çatdırılmasında mətbuat mühüm rol oynayır. Prezident İlham Əliyev öz çıxışında medianın işini qiymətləndirib: "Bu gün Azərbaycan mediası dövlət maraqlarını qorumağa qadirdir. Azərbaycana qarşı əsassız ittihamları arqumentlərlə, ciddi təhlillə və faktlar əsasında ifşa etməkdə də böyük uğurlar əldə edib. Bizim mediamız nəinki dövlət maraqlarını müdafiə edir, eyni zamanda, lazım gəldikdə hücuma da keçir. Bu da lazımdır... Fakt odur ki, bu gün Azərbaycan mediasını bir çox ölkələrdə müxtəlif səviyyələrdə oxuyurlar, mediada gedən yazıları, məqalələri təhlil edirlər. O məqalələrin Azərbaycanın rəsmi mövqeyinə nə dərəcədə uyğun olub-olmaması ilə bağlı da fərziyyələr irəli sürülür. Bu, deməyə əsas verir ki, mediamız doğrudan böyük inkişaf yolu keçib. Media deyəndə mən ilk növbədə jurnalistləri nəzərdə tuturam. Çünki medianı nüfuzlu edən məhz əməkdaşlardır, sizin kimi insanlardır, sizin həmkarlarınızdır. Azərbaycan bu gün elə bir mərhələdədir ki, hələ də özünü müdafiə etməyə ehtiyacı var. Bu gün Avropadan olan həmkarınız da artıq bu sualı verəndə də onu qeyd etdi: Siz Qərbin ictimai fikrinə, ictimai rəyinə necə təsir edə bilərsiniz? Məncə, media ən yaxşı vasitədir. Bizim media işçilərinin əhatə dairəsi nə qədər çox geniş olarsa, ölkə haqqında o qədər də dəqiq, dolğun və ədalətli məlumat dünya ictimaiyyətinə çatdırıla bilər. Burada hələ görüləsi işlər çoxdur. Ancaq mən deyə bilərəm ki, bizim mediamız artıq istənilən xoşagəlməz, iftira kampaniyasına cavab verməyə qadirdir və bu, çox önəmli yeni reallıqdır.

Pərvanə

525-ci qəzet .- 2025.- 22 iyul(№126).-S.4.