Gələcək çox tez gələcək

GƏLƏCƏK ELMLƏ GƏLƏCƏK

Oxumağa tələsdiyim, Azərbaycanda bestseller sayılan "Gələcək çox tez gələcək" kitabını axır ki, əldə edə bildim. İbrahim Nəbioğlunun təqdim etdiyi bu mükəmməl yaradıcılıq nümunəsi onun həm siyasi, həm elmi, həm də ictimai xadim kimi dünyaya baxış fəlsəfəsini ortaya qoyur. Müəllimi və elmi rəhbəri akademik Azad Mirzəcanzadənin əziz xatirəsinə həsr edilən bu kitab Con Qolsuorsinin "Gələcək haqqında düşünməyənlərin gələcəyi olmayacaq" fikri ilə başlayır. Akademik Rafael Hüseynovun "Onun içindəki saat" düşüncəsi ilə qiymətləndirilən ön sözdə kitab fəlsəfəsi ilə övladdan daha artıq olmaqla müəllifə qazandırdığı əbədiyyət fikirləri ilə qiymətləndirilir, içindəki saatın heç durmayacağı, nəşrlərin davamının gələcəyi ümidi ilə yekunlaşır.

Kitab başdan-başa bir həyat məktəbidir, burada hər kəs özünə lazım olanı tapa və öyrənə bilər. Külliyyat "Gələcəyə futuristik səyahət", "Təhsilimiz, ana dilimiz, gələcəyimiz", "Sapere Aude", "İstedad və dahilik", "Azad Mirzəcanzadə: "Deyə bildim?", "Nobel mükafatının cazibəsi", "Atatürk və Eynşteyn", "Dünya 4.0", "Əzəldən belədir çünki kainat", "Tibb 4.0" adlı on bölməyə sığan elm, təhsil, astrofozika, kosmos, raket texnologiyaları, süni intellekt, ana dili, modern tenoloji inkişafla bağlı publisistik məqalələr toplusudur. Kitab həm də jurnalistika məktəbidir. Hadisələri nəqletmə bacarığı İbrahim bəyin publisistik qələminin peşəkarlığını, gündəmdə olan mövzuları milli maraqlar mövqeyindən təhlili isə vətəndaşlıq möveyini ortaya qoyur. Bu da külliyyatın azərbaycanşünaslıq baxımından əhəmiyyətini və önəmini ortaya qoyur. Külliyyat kürəsəl mövzularla məhdudlaşmır, eyni zamanda insanları kainatın gizli sirlərini çözməyə, qalaktikanın bizə görürən və görünməyən tərəflərini də kəşf etməyə vadar edir.

Kitab gələcəyi qurmaq və görmək istəyənlərə bir çağırışdır. Gələcəyə gedən yol isə ancaq elm öyrənməkdən, inkişaf etməkdən, öz milli kökünə bağlı qalıb dünyəviləşməkdən, kürəsəlləşməkdən və qalaktikada izi qalan bir zərrə olmaqdan keçir. Müəllif kitabın nəşri ilə bağlı feysbukda yazdığı statusda Borxesin "Tiön, Ukbar, Orbis Tertius" adlı hekayəsindən sitat gətirərək yazır: "Təbii olaraq bütün əsərlər ancaq bir müəllifin - zaman xaricində olan və imzasız birinindir".

Görkəmli mistifikatora görə, bütün bədii əsərlər əslində bir "universal müəllif"in əsərləridir... İbrahim Nəbioğlu düşüncələrini Borxesin "yazarlar daha çox kollektiv yaddaşın, miflərin, arxetiplərin daşıyıcısıdır, onlar yalnız bir mənbədən gələn ideyaları yenidən ifadə edirlər" - fikri ilə əsaslandıraraq özünü böyük müəllif kimi yox, sıravi dünyalı kimi, sadəcə daşıyıcı, gördüyünü, bildiyini, anladığını paylaşan biri kimi gördüyünü qeyd edir. Anlamaq və anlada bilmək bacarığı, görmək və göstərmək bacarığı isə hər insana nəsib olmur. Bu, İbrahim Nəbioğlunun özəlliyi, universallığı və unikallığıdır

Bütün elm adamları və gənclər üçün faydalı olan bu nəşrin davamını görmək ümidi ilə...

Surə SEYİD

Filologiya üzrə fəlsəfə doktoru, dosent

525-ci qəzet .- 2025. -30 iyul(№132).- S.10.