Dövlət Mahnı Teatrında Uşaqların Beynəlxalq Müdafiəsi Gününə həsr olunmuş konsert keçirilib

Rəşid Behbudov adına Azərbaycan Dövlət Mahnı Teatrında 1 İyun – Uşaqların Beynəlxalq Müdafiəsi Gününə həsr olunmuş konsert proqramı keçirilib.

525.az AZƏRTAC-a istinadən xəbər verir ki, tədbir Azərbaycan Respublikası Milli Məclisinin Mədəniyyət komitəsi və Mədəniyyət Nazirliyinin dəstəyi ilə keçirilib. Konsert proqramı Şüvəlan qəsəbə Mədəniyyət Evinin nəzdində fəaliyyət göstərən “Səma” rəqs ansamblı tərəfindən təqdim olunub.

Tədbir Azərbaycan şəhidlərinin əziz xatirəsinin bir dəqiqəlik sükutla yad edilməsi ilə başlayıb. Ardınca Azərbaycan Respublikasının Dövlət Himni səsləndirilib.

Proqram çərçivəsində “Səma” ansamblı dünya xalqlarının silsilə milli rəqslərini təqdim edib.

Uşaqların Müdafiəsi Gününə həsr olunmuş tədbirdə çıxış edən Milli Məclisin Mədəniyyət komitəsi sədrinin müavini Günay Əfəndiyeva vurğulayıb ki, bu cür mədəni bayramda uşaqların çoxluq təşkil etməsi onun qəlbini sevinc və qürur hissi ilə doldurur.

Günay Əfəndiyeva xüsusilə qeyd edib ki, Prezident İlham Əliyevin rəhbərliyi ilə Azərbaycanın işğaldan azad olunmuş ərazilərində genişmiqyaslı bərpa işləri uğurla davam etdirilir.

“Əslində, qardaş dövlətlərin dəstəyi ilə bu proses daha da intensiv gedir. Bu gün Füzulidə Özbəkistan tərəfindən inşa edilən məktəb, Ağdamda Qırğızıstanın təməlini qoyduğu məktəb, Cəbrayılda Macarıstan məktəbi artıq fəaliyyət göstərir, həmçinin Qazaxıstan tərəfindən inşa edilmiş Yaradıcılıq Mərkəzi də fəaliyyətə başlayıb. Bütün bu layihələr uşaqlarımızın gələcəyinə qoyulan sərmayədir, onların rifahlı və ləyaqətli həyatlarının təməlidir”, – deyə deputat bildirib.

O, tədbirdə iştirak edən hər kəsə, xüsusilə istedadlı və parlaq uşaqları böyüdən valideynlərə təşəkkür edib.

Günay Əfəndiyeva ansamblın beynəlxalq arenadakı uğurlarını da xüsusi vurğulayıb:

“Yaxın günlərdə “Səma” rəqs ansamblı Türkiyənin TRT telekanalı tərəfindən təşkil olunan 23 Aprel – Milli Uşaq Bayramına həsr olunmuş tədbirlərdə böyük uğurla iştirak edib. Hətta iştirakçılar Türkiyə Prezidenti Rəcəb Tayyib Ərdoğanla şəxsən görüşmək imkanı da əldə ediblər. Bu, hamımız üçün böyük şərəf və nailiyyətdir”.

Çıxışının sonunda deputat Əfəndiyeva “Səma” kollektivinə yaradıcılıq fəaliyyətində uğurlar arzulayıb.

Daha sonra “Səma” ansamblının rəhbəri Səma Nağıyeva çıxış edərək tədbirə göstərilən dəstəyə və diqqətə görə təşəkkürünü bildirib.

AZƏRTAC-ın müxbiri ilə söhbətində Günay Əfəndiyeva bildirib ki, bu gün Uşaqların Müdafiəsi Gününə həsr olunmuş “Səma” kollektivinin konserti sadəcə bayram tədbiri deyil, həm də mühüm mədəni mesajdır:

“Azərbaycanın ərazi bütövlüyü bərpa olunduqdan sonra ölkəmizin hər guşəsindən, o cümlədən azad edilmiş torpaqlardan uşaq gülüşləri və səslərinin eşidilməsi ürəkləri xüsusi bir sevinclə doldurur”, – deyə o qeyd edib.

Müsahibimiz əlavə edib ki, səhnədə çıxış edən uşaqlar yalnız türk xalqlarının deyil, həm də dünyanın müxtəlif xalqlarının xoreoqrafik ənənələrini təqdim ediblər.

“Bu gün səhnədə bir çox xalqların mədəniyyətləri görüşdü. Azərbaycanın dünyaya necə açıq olduğunun, öz mədəni dəyərlərinə necə sadiq olduğunun və eyni zamanda dünya irsinə necə hörmətlə yanaşdığının şahidi olduq. Belə tədbirlər xüsusilə gənc nəsil üçün böyük tərbiyəvi və maarifləndirici əhəmiyyət daşıyır”, – deyə deputat Əfəndiyeva vurğulayıb.

525-ci qəzet .- 2025.-4 iyun(№96).- S.9.