Azərbaycan milli geyimi Parisdə nümayiş olunub

Paris yaxınlığındakı Monfermey (Montfermeil) komunasında “Mədəniyyətlər və Yaradıcılıq” (Cultures & Création) adlı moda nümayişinin 20 illiyi qeyd olunub.

AZƏRTAC xəbər verir ki, moda nümayişində Azərbaycanın milli geyimi də təqdim olunub. “LVMH” (Moët Hennessy Louis Vuitton) və “LİVE” assosiasiyasının sponsorluğu ilə keçirilmiş dəfilədə Azərbaycan milli geyimini Adela Naibova təqdim edib.

“Mədəniyyətlər və Yaradıcılıq” dəfiləsinin builki nəşri “Bütün formalarında sülh" adı ilə təqdim olunub. Moda nümayişinin ikinci hissəsində istedadlı gənc dizaynerlər verilmiş mövzu əsasında geyimlər hazırlayıblar. Azərbaycanəsilli gənc dizayner Səkinə İşıq təxminən iki həftə ərzində tikdiyi üç paltarı təqdim edib.

“Mədəniyyətlər və Yaradıcılıq” adlı moda şousunun 20-ci ildönümünü qeyd etmək üçün 150-dən çox dizayner öz geyimlərini təqdim edib və təxminən 40 ölkə diqqət mərkəzində olub.

2005-ci ildə yaradılmış həvəskar dizayner və modellərin bu moda nümayişi yaradıcılığı, mədəni ifadə müxtəlifliyini və yerli istedadı nümayiş etdirmək məqsədi daşıyır. O, həmçinin moda dünyası ilə tanış olmayan gənc moda həvəskarlarına tanınmaq fürsəti təqdim edir.

525-ci qəzet .- 2025.-4 iyun(№96).- S.9.