Türkiyənin Millət Kitabxanasına Azərbaycana dair zəngin kitab kolleksiyası hədiyyə olunub

Ankaradakı Azərbaycan Mədəniyyət Mərkəzi Türkiyənin Prezident Sarayının Millət Kitabxanasına Azərbaycana dair nəşrlərdən ibarət zəngin kitab kolleksiyası hədiyyə edib.

AZƏRTAC xəbər verir ki, kitab kolleksiyasına Azərbaycan dövlətçiliyi, tarixi, mədəniyyəti, ölkəmizin nailiyyətlərinə dair Mədəniyyət Nazirliyi tərəfindən göndərilən nəşrlər, habelə Azərbaycan Mədəniyyət Mərkəzinin layihəsi ilə ölkəmizə dair Türkiyə türkcəsinə tərcümə olunmuş və çap olunmuş kitablar daxil edilib.

Azərbaycan Mədəniyyət Mərkəzindən bildirilib ki, Türkiyənin ən böyük kitabxanalarından olan Millət Kitabxanasında artıq Azərbaycana dair zəngin kitab kolleksiyası formalaşmış, gələcəkdə də regionun ən böyük informasiya mərkəzi – kitabsaxlayıcısı ilə bu istiqamətdə layihələr davam etdiriləcəkdir.

Qeyd edək ki, Mədəniyyət Nazirliyinin dəstəyi ilə xarici ölkələrdəki Azərbaycan Mədəniyyət Mərkəzləri milli mədəniyyətimiz, tariximiz, ana dilimiz, klassik ədəbiyyatımızın təbliği məqsədlə layihələr həyata keçirir, aparıcı kitabxanalara ölkəmizə dair nəşrlər hədiyyə edir, kitabxanalarda Azərbaycan fondlarının formalaşdırılması istiqamətində işlər həyata keçirir.

525-ci qəzet .- 2025.- 12 iyun(№ 100).- S.9.