YENİLMƏZ

Britaniya şairi, nasiri, ədəbiyyatçısıdır. Bir neçə poetik toplunun müəllifidir. Nelson Mandellanın sevimli şeiri kimi daha çox “Invictus” (“Yenilməz”) şeirinə görə məşhurluq qazanmışdır.

Cəhənnəm gecəsi, aləm qapqara,

Sarmış vücudumu ağrılar içrə.

Şükranlıq edirəm mən ilahlara

Bax bu ram olmamış ruhuma görə.

Tənimdə işgəncə döyənəkləri,

Çığırtım-bağırtım eşidilməmiş.

Taleyin ən ağır dəyənəkləri

Yarsa da başımı əyə bilməmiş.

Qəzəb, göz yaşları… yollar dumanlı,

Məchulluq kabusu atılmış önə.

Gələcək illərin gözləri qanlı

Olsa da qorxmuram, qorxmaram yenə.

Keçidlər, cığırlar dar olsun, nə qəm,

Ard-arda cəzalar olsun, nə sözüm.

Mənəm taleyimin ağası, mənəm,

Özüməm ruhumun öndəri, özüm.

VİLYAM ERNEST HENLİ

(1849-1903)

525-ci qəzet .- 2025.- 1 mart(№39).- S.23.