GEDILMƏMIŞ YOL

Əyalət həyatının realist təsvirləri fonunda mürəkkəb sosial, fəlsəfi mövzuları incələyən əsərləri, sıravi Amerikalının danışıq tərzini şeirləşdirən bədii məziyyətləri onu 20-ci əsr Amerikasının ən şöhrətli şairlərindən etmişdir. Sağlığında dəfələrlə ABŞ-ın ən yüksək mükafatlarına layiq görülmüşdür.

Payızdı, meşədə yol haçalandı,

Qəlbimi məchulluq qorxusu diddi.

Mənə bu cüt yoldan hansı həyandı?

Zillənib birinə xeyli dayandım –

Gördüm kolluqlara əyilib itdi...

Sonra da zilləndim ikinci yola.

Çox güman, daha çox bu yol yarıdar,

Düşündüm, qoy gedim, nə ola, ola.

Bəlkə də getmişlər izləri qala

Vaxtilə o yolu başqaları da.

O səhər hər iki yolun xəzanı

Tapdaq görməmişdi, qaraltısızdı.

Birinci qoy dursun, gələr zamanı,

Onsuz da öndədir qovuşan anı

Yolların. Nə bilim, bəlkə də azdım...

İllər arxadadır... Rahat nəfəslə

Qoy deyim, qurtaran məni o yoldu

Meşədə... seçmişdim qəribə şəstlə

Mən az gediləni məchul həvəslə.

Hər şeyi dəyişən, şəksiz, bu oldu.

QARLI MEŞƏLİYİN AXŞAM ÇAĞINDA

Kimindir bu meşə? Əlbət, bilirəm.

Hərçəndi burda yox, bir kənd içində

Yurd salmış yiyəsi. Hey zillənirəm

Qarlı meşəsinə bir zənd içində.

Ürgəmsə döyükür, durmuşuq nədən,

Yox axı yaxında bir ev damı da.

Gözünü donmuş bir göldür göynədən

Ilin ən qaranlıq bir axşamında.

Titrədir yüyənin zınqırovunu,

San sorur bəlkə səhv salmışıq yeri.

Almaqmı istəyir atın hovunu

Əsən meh, uçuşan qar dənələri.

Azır baxışlarım dərin meşədə,

Varmı yol çıxasan böylə nəşədən.

Vədli-vədəlisən, gözü yol çəkən

Var, tərpət atını bayılmamışkən.

ROBERT FROST

(1874 - 1963)

525-ci qəzet .- 2025.- 1 mart(№39).- S.23.