Şəfa və vəfa adamı

HƏKİM-DÖYÜŞÇÜ AYAZ MUSAYEVİN HƏYAT HEKAYƏSİ

Ürəyin döyüntüsü onun səssiz fəryadıdır. Bəzən həyəcanla atır, bəzən yorğun dayanır, bəzən də qəfil susur. Amma elə insanlar var ki, onların əlləri qəlbləri susmağa qoymur. Onlar döyüş meydanında da, cərrah masasında da həyatla ölüm arasında vuruşurlar. Ayaz Musayev kimi. O, həm qılıncın, həm də şəfanın adamıdır.

Tarixin səhifələrinə qanla yazılan Qarabağ savaşlarında elə insanlarımız var ki, onların həyatı yalnız bir döyüşlə, bir missiya ilə məhdudlaşmır. Onlar ömrünü iki fərqli cəbhədə - həm döyüş meydanında, həm də insan həyatını xilas edən ağ xalatlı mübarizələrdə keçirirlər. Bu yazıda həm əsgər, həm də həkim olan vətənpərvər bir insan haqqında danışacağam. O, Birinci Qarabağ müharibəsində döyüş meydanına əlində silah atılmışdı, İkinci Qarabağ müharibəsində isə həkim kimi insanları ölümdən qurtardı.

Səhər şəfəqləri bir körpənin ilk nəfəsini işıqlandıranda hələ heç kim bilməzdi ki, o nəfəs illər sonra yüzlərlə ürəyə toxunacaq, onlara şəfa verəcək. O, dünyaya bir kəndin sakitliyində göz açmış, uşaqlığını torpaq qoxusunun içində keçirmişdi. Amma tale onu yalnız bir kəndin yox, bütün bir xalqın qəlbinə yazacaqdı...

Azərbaycanın Qarabağ bölgəsində, Ağdərə rayonunun Manikli kəndində 1975-ci il may ayının 1-də dünyaya göz açan Ayaz Musayev hələ tələbə ikən müharibə meydanına atıldı.

1975-ci ilin may ayı... Qarabağın bir kəndində bir oğlan dünyaya gəlir - adını Ayaz qoyurlar. Uşaqlığı Qarabağın saf sularında, dağ havasında keçdi, yeniyetməliyi isə od-alov içində. 1991-ci ildə orta məktəbi bitirəndə artıq vətən atəş içində idi. O, həkim olmağa qərar verdi. Azərbaycan Tibb Universitetinə daxil oldu, amma müharibə ocağında həkim kürsüsündə oturmaq çətindir. Tələbə ikən könüllü olaraq cəbhəyə yollandı. Əslində, o vaxt tibbi xidmət göstərmək üçün getmişdi, amma həyatın sərt qanunu var - döyüş meydanında hər kəs əsgərdir! O da silaha sarıldı. Dörd dəfə yaralandı, amma geri çəkilmədi. Sonuncu yarası ağır oldu, hospitalın ağ divarları arasında aylarla qaldı. Amma o divarlar da onu həkim olmaq arzusundan döndərə bilmədi. Bir il akademik məzuniyyət götürdü, sağaldı və yenidən universitetə qayıtdı. 1997-ci ildə artıq Tibb Universitetini bitirmişdi.

Döyüş meydanında ürəyi dayananları xilas edə bilməmişdi, amma indi bir həkim olaraq əlləri daha güclü idi. İnternaturanı Kardiologiya İnstitutunda keçdi, sonra həyat yolunu Göygöldən Ağcabədiyə apardı. Artıq kardioloq idi. Bir vaxtlar qəlbində döyüş yarası almış bir insan indi yüzlərlə qəlbi müalicə edirdi.

O, yalnız həkim kimi deyil, ehtiyatda olan zabit kimi də fəaliyyətini davam etdirdi. 2006-2008-ci illərdə hərbi xidmətə çağırıldı, yenə də vətənin keşiyində dayandı. 2016-cı ildə Aprel döyüşlərində könüllü iştirak etdi. Tərtər hospitalında yaralıların nəfəsiylə nəfəs aldı, onların ağrısını öz qəlbində hiss etdi. Amma tale ona hələ bir imtahan da hazırlamışdı.

2020-ci ilin sentyabr ayı... Yenə səfərbərlik, yenə savaş, yenə Vətən çağırışı! Ayaz Musayev yenə həkim xalatını çıxarıb, hərbi geyimini geyindi. Bu dəfə döyüş meydanına həkim kimi yollandı. Füzuli, Cəbrayıl, Hadrut və Şuşa... Vətənin hər qarışı uğrunda savaşan əsgərlərlə birgə o da var idi. Onun əlləri yüzlərlə yaralını həyata qaytarırdı.

91 gün - bu 91 günün hər anı həyatda qalmaq üçün mübarizə idi. Yaralıları döyüş meydanından çıxarmaq, onların qanaxmasını dayandırmaq, bəzən bir ürəyə son dəfə toxunmaq... Döyüşçü olan bir insan üçün bəlkə də, ən ağır an bu idi - dostunun gözlərinə baxıb, heç nə edə bilməmək. Amma o, bacardığını etdi. O günlərdə Ayaz Musayev təkcə həkim yox, həm də bir əsgər idi - silahsız, amma daha güclü!

Müharibə bitdi. Ayaz Musayev yenidən Ağcabədiyə qayıtdı, yenidən öz vəzifəsinin başına keçdi. İndi o, "KARDİO MED" klinikasının rəhbəridir, amma onun həkimliyi yalnız müalicə ilə bitmir. Şəhid ailələri və qazilər üçün həmin klinikanın qapıları həmişə açıqdır. O, şəfa və vəfa adamıdır.

Hər döyüşçünün bir borcu var - döyüş meydanında qalib gəlmək. Hər həkimin bir borcu var - insan həyatını xilas etmək.

Ayaz Musayev bu iki borcu bir ömür boyu çiyinlərində daşıdı. O, təkcə ürəkləri müalicə etmədi, həm də insanlara yaşamaq eşqini qaytardı. Əsl həkim yalnız xəstəni sağaltmır, həm də insana ruh, ümid verir. Və bu ümid bir millətin qəlbinin döyüntüsünə çevrilir.

Bu gün Ayaz Musayev təkcə bir kardioloq deyil, həm də vətən uğrunda canını sipər etmiş, yüzlərlə insanın həyatını xilas etmiş qəhrəmandır. O, həkimdir, döyüşçüdür, vətənpərvərdir - ürəklərin keşiyində dayanan bir igiddir.

Aynurə İNCİ

525-ci qəzet .- 2025.- 4 mart(№40).- S.14.