"Afərin" eşitmək istəyi

İmkanlarına görə özünə böyük seçdiyi adamların tapşırıqlarının icrası ilə ötürür günlərini. Bu baxımdan adi deyil yaşamı. Kimlərə salam verib alması da onların rəyindən asılıdır. Beləcə, tərifləyir ləyaqətsizləri, aşağılayır layiqliləri. Yoxdur öz fikri. Görmür ətrafının qınayıcı baxışlarını. Qulaqardına vurur barəsində eşitdiklərini. Cəhd edir "böyük"lərinin onlarca yaxınlarının rəğbətini qazanmağa. Çalışır "qulluğunda" səhvlərə yol verməsin. Dilinə də qıfıl vurur onların yanında. Qorxur, çox qorxur "şef"lərinin xoşuna gəlməyən birisi barədə çaşıb həqiqəti deməkdən. Haradasa "böyüyü"nün ünvanına deyilən xırda iradasa sərt reaksiya verməyi özünə borc bilir. Belədə qaldırdığı "vay-şüvən"in sorağının, "böyük təəssübkeşliyinin" sədasının ünvana çatmasından ötrü dəridən-qabıqdan çıxır. İstəyi var axı. "Böyük"dən "afərin" eşitmək istəyi. Bundan ötrü isə hər "şərəfsizliyə" hazırdır. Bax belə yaşayır. Və adi deyil bu yaşam.

13.12.2024

Ürəyi böyükmüş

Ağır bir işi götürmüşdük boynumuza. Müraciət edəcəyimiz hər kəsin yardımçımız olacağını düşünmüşdük. Axı bunda heç bir şəxsi xeyir gözləmirdik. El-oba işi idi. Yanılmışdıq. Başlanğıcda bizə xeyir-dua verənlər, əllərindən gələni edəcəklərini söz verənlər bir-bir yaxasını kənara çəkdi. Ayrı-ayrı imkanlılara da müraciətlərimizdən elə bir nəticə ala bilmirdik. İki nəfər qalmışdıq çoxlarının "başlayın, yanınızdayıq" dediyi işdə. Çətinliklə də olsa xeyli, lap xeyli iş görə bilmişdik. Qalan o qədər də asan olmayan mərhələni isə artıq ancaq və ancaq öz imkanımız, öz vəsaitimiz, o qədər də böyük olmayan imkanımızla gördürməyi qərar verdik. Hə, gördürməliydik.

Müraciət etdik neçə nəfərə. Çox yüksək qiymət dedilər. Bu işin xeyirxahlığı barədə moizələrimizə qulaq asan da olmadı. Ümidsizləşirdik. Artıq nə edəcəyimizi düşünə də bilmirdik. Allah yol açana kimi...

Təsadüfi oldu onunla söhbətimiz. O kasıb, imkansız adamla. Diqqətlə dinlədi bizi. "Kömək edərəm" - dedi. Qiymətləşmək istədik. Sakit səslə: "Mən belə işlərdən ötrü pul almıram" - dediyini eşitdik. Əlimizdə olan vəsaiti xahiş-minnətlə ona vermək istədik. Qəbul etmədi. "Onda başqasını tapın" - dedi. Gördü həmin işi. Halallığını verib getdi. Belələri üçün deyirlərmiş: "Kasıblığına niyə baxırsan, ürəyi böyükdür..."

17.12.2024

Arzulamadığım

Yanıma təbrikə gəlirdilər doğmalarım, yaxınlarım. Həyatımda baş verən önəmli hadisədən yana. Gözləmədiklərim də vardı aralarında. Uzun illər boyu mənə laqeyd münasibətdə olduqlarını düşündüklərim. Belələrinin gəlişi daha çox sevindirirdi məni. Yeni bir xoş istilik, məhrəmlik duyurdum onlardan. Qınayırdım da özümü "demə, onlar beləymiş" düşüncəmlə. Gözlədiklərim bəzilərindənsə laqeyd münasibət görməyim sıxırdı məni "demə onlar beləymiş" fikrimlə. Hamını, hamını qəbul etməyə hazır idim. Fərq qoymadan hər bir kəsi. Təkcə bir "cütlük"dən savayı. Sorurdum özümdən: "Niyə axı, niyə?" Nifrətmi edirdim onlara-yox, acığımmı gəlirdi onlardan-yox. Bəs niyə? Əslində bu sualların cavabı da aydın idi mənə. Riyakarlığını görmüşdüm bu cütlüyün, həm də dönə-dönə. Hər dəfə onların izahatlarına özümü inanmış kimi göstərmişdim. Amma hər halda təkrarlanan riyakarlıqlar yaratmışdı ürəyimdə onlara qarşı bu qəribə hissi. Mənə xeyli, lap xeyli pislik etmişlərə yox, məhz bu cütlüyə idi bu hissim. Sadəcə məni təbrikə gəlməyini arzulamadığım adamlar idi bu "cütlük". Gəlsəydilər də, neyləyəcəkdim ki...

08.02.2025

"Şəxsiyyət"

Riya dolu kəlmələrdən "səngər" qurub özünə. Qəlbinin dərinliklərində qərar tutanlara tamamilə əks olan sözlərdən, kəlmələrdən. Düşünür, qoruyar onu başqalarına qarşı öz çirkin məqsədlərini həyata keçirmək üçün. Pak, saf, düz-dürüst mələk donunda təqdim etmək istəyir özünü bu şeytan xislətli adam. Qorxur axı kimlərinsə xoşuna gəlməz sonrakı sayıqlamaları. Başqalarına dediyi, deyəcəyi şər-böhtan. Haqdan, ədalətdən dəm vura-vura özünün içindəki mənfur niyyətləri həyata keçirmək istəyir. Bu niyyətlərsə gözünə xoş görünməyən, ac nəfsinin qarşısına çəpər çəkənləri qaralamaqdan, onlara ləkə yaxmaqdan ibarətdir. Tapır bundan ötrü cürbəcür sözlər, ibarələr. Yorulmur, usanmır. Mənfiliklər arayır hər görülən işdə. Hamı yalançı, fırıldaqçı, rüşvətxordur onun nəzərində. Taylarını öz ətrafına toplayıb səfərbər edir. Züy tuturlar onun "çaldıqlarına". Şəxsiyyət sayır özünü belə tərəfdarlarının arasında. Hə, "şəxsiyyətdir". Mən də təsdiq edirəm bunu. Amma göründüyü kimi, məhz dırnaq arasında!

05.02.2025

Nəcməddin MÜRVƏTOV

525-ci qəzet .- 2025.- 5 mart(№41).- S.12.