Qadın istəyəni Tanrı da istəyər

İlin on iki ayının hər birinin özünəməxsusluğu var. Amma hamı mənimlə razılaşar ki, bir neçə gündür qədəm qoyduğumuz mart ayının özəllikləri bir başqadır. Martın ilk həftəsində çox zərif bir bayramı qeyd edir bütün dünya. Bu, 8 Martdır. Yer üzünün ən zərif, elə zərif olduğu qədər də çox güclü varlığı qadınların bayramı. Daha sonra təbiət öz donunu dəyişməyə doğru üz tutaraq bahara sarı yol alır. Nazəndə bahar elə nazlana-nazlana da gəlir. Builki baharın daha bir özəlliyi də var. On bir ayın sultanı adlanan Ramazanla Novruzu qarşılamağa hazırlaşırıq. O gələnə qədər isə çərşənbələri yola salırıq həmişə olduğu kimi. İki gün əvvəl Od çərşənbəsini qarşıladıq, lakin məsələ heç də bununla bitmədi. Həmin gün ölkəmizdə ilk dəfə keçirilən "Qadın Liderləri Zirvəsi 2025" çox uğurlu başlanğıca imza atdı. Qadın adının arxasında çox məqamlar gizlənib. Haqlarında dahilərin söylədiyi saysız kəlamların hamısından tam bir qadın obrazı boylanır. Və bu obrazı yaradanlar da yalnız kişilərdir. "Dünyada cəmi bir qadın qalsa belə, onlar haqqında deməyə həmişə yeni söz tapılacaq". Bəli, tapılacaq, ən azından ona görə ki, ən uğurlu kişinin arxasında güclü qadın dayanır. Onu da unutmayaq ki, bəşəriyyəti yaradan iki fərddən biri qadındır, tərəzinin iki gözü olduğu kimi. Lakin tarixin dərinliklərinə boylansaq, həmin tərəzi bugünkü tarazlığa gələnə qədər çox çətin yollardan keçib. Zamanında: "Qadınlar çiyin-çiyinə düzüləndə onların arasından heç kim keçə bilməz" deyimi bu gün artıq öz yerini tapıb.

İki gün əvvəl "Gülüstan" sarayındakı "Qadın Liderləri Zirvəsi 2025" toplantısında zərif görünüşlərilə böyük işlərə qoşulan, cəsarətlə irəliləyən, güclü məntiqə söykənən, qadın adının bütün incəliklərini bilən, ona riayət edən, gender bərabərliyində qarşı tərəfə hörmətlə yanaşan kifayət qədər ziyalı, kübar, müəyyən məsələlərdə rahat şəkildə fikirlərini bildirən xanımlar əsl Azərbaycan qadınının nümunəsi idi.

DİM Direktorlar Şurasının sədri Məleykə Abbaszadə, millət vəkili Nigar Arpadarai, "Asan İnnovativ İnkişaf Mərkəzi"nin rəhbəri Aysel Cəbrayılova bu günün qadınlarının cəmiyyətin aparıcı fərdi kimi yüksək dəyər sahibi olduğunu öz çıxışlarında vurğuladılar.

Tədbirin ilk panelində "Lider qadın, yoxsa qadın lider" sualı qoyulmuşdu. Sual ətrafındakı fikir mübadiləsində "Kapital Bank" ASC-nin İdarə Heyətinin üzvü Fərqanə Məmmədovanın moderatorluğu ilə beş lider xanım arasında maraqlı diskussiya oldu. Elə həmin sualla millət vəkili Nigar Arpadarinin fikrini bilmək maraqlı oldu: "Panelin sualından belə anladım ki, qadınlarımız karyera ilə ailə balansını necə qoruyur və hansı daha önəmlidir. Düşünürəm ki, hər bir qadın sevdiyi işlə məşğul olaraq, həyatda özünü reallaşdırmalıdır. Azərbaycan qadını inkişaf etdikcə, ailələrimiz, cəmiyyətimiz, ölkəmiz də inkişaf edəcək. Amma onu da vurğulamaq istəyirəm ki, heç bir karyera ailədən üstün deyil. Qadın ana, ailənin qızı, həyat yoldaşı olduğunu unutmamalıdır. Bir qadının lider ola bilməsi üçün ailəsinin onu başa düşməsi və dəstəkləməsi çox vacibdir. İstər gənc qızının ambisiyalarını anlayan valideyin olsun, istər xanımının karyera qurmaq üçün nə qədər zəhmət çəkdiyini anlayan həyat yoldaşı olsun, istərsə də anaları ilə fəxr edən övlad olsun. Onu da qeyd edim ki, bu fikirlərim eyni zamanda kişilərə də aiddir. Onlar da ailədə dəstəyi hiss etməlidir. Yəni liderlik istənilən halda liderlikdir, onu cinsin rənglərinə boyamaq lazım deyil".

"Qadın Liderləri Zirvəsi 2025" maraqlı konsept mesajı ilə iştirakçılarla görüşə gəlmişdi - "Fərqlərin bərabərliyi". Dilimizdə tez-tez işlənən gender bərabərliyinə münasibət heç də birmənalı deyil. Azərbaycan müstəqillik qazanandan sonra qadının cəmiyyətdəki rolu dayanmadan inkişaf etməkdədir. Bu gün vaxtilə evdar xanım olan qadınlarımız var ki, sərbəst şəkildə işlərini quraraq, öz ayaqları üstə durmağa nail ola biliblər. Lakin hələ də beyinlərdə: "Kişinin öz işi olar, qadının öz işi" fikri qalmaqdadır. Müzakirə olunan suallardan biri də qadının karyera ilə ailə arasındakı seçimi haqda idi. Bu müzakirədə analıq məzuniyyətinə davam etmək istəməyib karyerasını qurmağa üstünlük verən xanımın açıq etirafı da oldu, övladının üç yaşına qədər yanında olmağı üstün tutan qadın da. "Mənim karyeram övladımın gələcək təminatıdır", "Əgər mən xoşbəxtəmsə, ailəm də, övladlarım da xoşbəxtdir" deyən qadınlar çıxışlarında həmcinslərinə seçim qarşısında qalmaq kimi bir çətinlikdən qorxmamağı cəsarətlə tövsiyə etdilər.

Bu gün zaman bir yerdə dayanmağı sevmir. Hər şey sürətlə inkişaf edir. Cəmiyyətdə elə bir sahə yoxdur ki, orada qadın əməyi, qadın fəaliyyəti olmasın. Əgər əvvəllər ailədə qız övladları əsasən müəllim və həkimlik sənətinə yönləndirilirdisə, indi siyasətdən tutmuş dövlət qulluğuna qədər bütün sahələrdə qadınlarımızın imzası var. Etiraf edək ki, qadın güclü varlıqdır. Belə olmasa idi, tarixdə nə matriarxat dövrü olardı, nə qadın dövlət başçısı, nə də cəngavər qadın. Dəqiq xatırlamıram, bir dəfə həmsöhbətlərimdən biri dedi ki, Kolumbiyada xeyli ştat var. Bütün ştatlar patriarxat, yalnız ikisi matriarxatdır. Məhz həmin iki ştat ölkədə daha firavan və rahat yaşayır. Sözümü isə dahilərdən birinin fikrilə bitirmək istədim: "Qadınlarda qeyri-adi intuisiya olur. Onlar ən aydın görünənlərdən başqa, hər şeyi sezə bilir".

Tamilla M-ZADƏ

525-ci qəzet .- 2025.- 6 mart(№42).- S.10.