Dünya boyda səs

Esse

Xarici ölkələrin birinə ailəvi səfər etmişdik. Gəzməli və görməli yerlərə səyahət edirdik. Səfərimiz çox maraqlı keçirdi. Təbii ki, oradakı dostlarımız bu işdə bizə dəstək olurdu. Bir axşam biz opera teatrına dəvət olunduq. Böyük maraqla operaya tamaşa edirdik. Rollar çox məharətlə oynanılırdı. Fikrim tamaşanı təhlil etmək deyil. Amma tamaşada oynayan aktyorlardan birinin səsi bütün tamaşaçılar kimi məni də heyran etdi. Kiçik cüssəli bir kişi aktyorun ifası, səsinin tembri insanı riqqətə gətirirdi. Maraqlandıq. Dedilər ki, bu balaca bədənli oğlan dünya şöhrətli ifaçıdır. Onun səsi demək olar ki, dünyanın bütün böyük səhnələrində eşidilib. Bu sözlər məndə bir sıra duyğular yaratdı. Qəlbən qürurlandım, fəxarət hissi keçirdim. Doğma Vətənimlə, dövlətimlə, Azərbaycanımla. Bilirsiniz niyə? Axı bir sıra ölkələrə nisbətən bizim ölkəmiz ərazisinə və əhalisinin sayına görə böyük hesab olunmur. Amma bu gün Azərbaycanımın səsi dünya boydadır. İstər ölkə daxilində, istərsə də beynəlxalq aləmdə həyata keçirilən tədbirlər, aparılan siyasət bütün dünyada maraqla izlənilir, təqdir olunur.

Bir sıra sahələrdə Azərbaycan təcrübəsi dünya ölkələrinin çoxunda marağa səbəb olub və bu təcrübədən yararlanmaq istəyənlərin sayı gündən-günə çoxalmaqdadır. Məsələn, "ASAN xidmət". Ölkəmizə səfər edən ən ali qonaqlar belə bu xidmətlə tanış olur və geri döndükdən sonra bu sistemi özlərində həyata keçirirlər. Çünki bu sistem dövlət xidmətlərinin vətəndaşlara daha səmərəli, şəffaf və əlçatanlıq baxımından ən müasir xidmətlərindəndir. Prezident İlham Əliyevin fərmanı ilə 2012-ci ildə əsası qoyulmuş bu xidmət dövlət-vətəndaş əlaqələrini sadələşdirmək və dövlət xidmətlərini optimallaşdırmaq məqsədi ilə həyata keçirilib.

44 günlük Vətən müharibəsi. Antiterror əməliyyatı. Ali Baş Komandanımızın rəhbərliyi altında ordumuz torpaqlarımızı azad etdi. Ordumuzun igid oğullarının qəhrəmanlığı və şücaəti bütün dünyaya səs saldı. Onlar nəinki Azərbaycan, hətta qürurla deyə bilərik ki, dünya hərb tarixində yeni salnamə yaratdılar. İndi dünyanın bir çox ölkələrində igidlərimizin həyata keçirdikləri hərbi əməliyyatlar öyrənilir və hərbi məktəblərdə tədris olunur. Bu, Azərbaycanımızın dünyaya yayılan haqq və ədalət səsi deyilmi?

Prezident İlham Əliyevin həyata keçirdiyi uğurlu islahatların həddi-hüdudu olmadığı kimi, misli-bərabəri də yoxdur. Bu islahatlar həyatımızın bütün sahələrini-mədəniyyəti, incəsənəti, iqtisadiyyatı, siyasəti, kənd təsərrüfatını, sosial, elm, idman və digər sahələrini əhatə edir. Bunların hər biri cild-cild kitabların mövzusudur. Səsimiz və bayrağımız daim uca olsun. Ulu öndər Heydər Əliyevin "Azərbaycan dünyaya günəş kimi doğacaq" fikirləri artıq günümüzün reallığıdır.

Akif TƏVƏKKÜLOĞLU

525-ci qəzet .- 2025.- 7 mart(№43).- S.8.