Laçının özü kimi...

PROFESSOR ŞİRİNDİL ALIŞANLININ VƏFATININ İLDÖNÜMÜNƏ

Hər şey ondan başladı ki, hərbi xidmətdən qayıdandan sonra ixtisasıma uyğun iş axtarmağa başladım. Döymədiyim qapı, boylanmadığım pəncərə qalmadı. Və bu qapıların, pəncərələrin o biri üzündə xeyli daş ürəklər, soyuq baxışlar gördüm. Arzularımın üşüdüyü, ümidlərimin donduğu soyuq günlərin birində görkəmli tənqidçi, ədəbiyyatşünas alim kimi yalnız mətbuatdan, televiziyadan tanıdığım, sonralar isə hər gün adını dəfələrlə və minnətdarlıqla çəkdiyim professor Şirindil Alışanlının qapısını döydüm.

Utana-utana, sıxıla-sıxıla, amma ümidlə! Mən Universiteti nəşriyyat redaktoru ixtisası üzrə bitirmişdim, Şirindil müəllim isə "Elm" nəşriyyatının direktoru idi...

Şirindil Alışanlı məni "Elm" nəşriyyatına işə götürmədi. Amma mən həmin günü həyatımı dəyişən gün sayıram. "Səni nəşriyyata işçi yox, özumə aspirant götürəcəyəm, müdafiə edəcəksən" - dedi Şirindil müəllim. Açığı, bu, mənim üçün inanılmaz idi. Bu, mənim qarşımda açılan yeni bir üfüq idi. Həmin gün ən əsası mənə ona görə doğmadır ki, Şirindil Alışanlı kimi bir insanı, parlaq şəxsiyyəti tanıdım, onunla bərabər bir yola çıxdım. Şirindil müəllim mənim üçün yalnız elmi rəhbər olmadı, bir insanın övladına, qardaşına, əzizinə etdiyindən artıq qayğı göstərdi, amma tələbkarlığından da qalmadı.

Unudulmaz, yeri hər zaman görünən Şirindil müəllim bu gün mənim üçün bir meyardır. Dostluğun, mərdliyin, əyilməzliyin, kişiliyin, sədaqətin meyarı! Şirindil Alışanlı olmaq - ədalətli olmaq deməkdir, cəsarətli olmaq deməkdir, haqsevər, dürüst, vicdanlı olmaq deməkdir. Bir sözlə, ŞİRİNDİL ALIŞANLI olmaq -İNSAN olmaq deməkdir!

2022-ci ilin payızında dostlarla Şirindil müəllimin 70 illik yubileyini qeyd elədik. Təntənəli və dəfələrlə. Həm də sevinclə. Ona görə təntənəli və sevinclə ki, bu yubiley ustadımın ən gözəl yubileyi idi. Doğulduğu Laçın azad idi. Vətən müharibəmiz tarixi Zəfərlə bitmişdi.

60 illik, 65 illik yubileylərində gözlərində ağır bir nisgil var idi ustadımın. İndi gözləri fərəhdən parlayırdı. İndi bu əzəmətli, dağ vüqarlı kişi daha əzəmətli görünürdü - azad Laçının özü kimi! Bu yubileyi Şirindil müəllim üçün laçınlı ömrün yeni doğuluşu adlandırdıq. Ona uzun, sağlam ömür arzuladıq...

Deyir, sən saydığını say...

Professor Şirindil Alışanlını 70 illik yubileyindən az sonra itirdik. Sinəmizə dağ çəkdi Şirindil müəllim. Həmin gündən o qədər sarsılmışam ki, bu gün də bu ağrının, itkinin təsirindəyəm. Yəqin ki, bu ağrı bütün ömrüm boyu mənimlə olacaq.

Ötən yay doğma Laçınımıza getdim. Azad Laçınımıza. Əhmədli kəndini də ziyarət elədim. Unudulmaz Hüseyn müəllimin, ustadım Şirindil müəllimin gəzdiyi yerləri gəzdim, su içdikləri bulaqlardan su içdim. Doğma yurdunda bir daha rəhmətlə, həm də bitməyəcək bir həsrətlə xatırladım bu gözəl, əvəzsiz, unudulmaz insanları.

Əziz Şirindil müəllim, mənə elə gəlir ki, mənim Sizə olan bağlılığım yalnız elmi rəhbər - aspirant münasibətləri deyil, daha uca bir məqamdır. Mən o məqamı ifadə etməyə söz tapmırdım. Dostumuz Aslan Salmansoy bu barədə danışanda: "Sizin münasibətləriniz elmi rəhbər-aspirant münasibətləri deyil, mürid-mürşid münasibətləridir" - dedi. Açığı, bu mənim çox xoşuma gəldi, ürəyimcə oldu. Sizə də demişdim bunu. Siz də çox bəyəndiniz bu məqamı. Məqamınız, məkanınız cənnət olsun, əziz müəllimim. Ruhunuz qarşısında baş əyir, sonsuz ehtiramımı bildirirəm.

Ələmdar CABBARLI

Bakı Dövlət Universitetinin dosenti, filologiya üzrə fəlsəfə doktoru

525-ci qəzet .- 2025.- 14 mart(№48).- S.16.