Dərin mətləblərə işıq salan aktual müsahibə

Azərbaycan Prezident İlham Əliyev “Euronews” televiziyasına müsahibəsində XII Qlobal Bakı Forumunun beynəlxalq məsələlərin müzakirəsində oynadığı mühüm rolu vurğulamaqla yanaşı, müasir qlobal düzənin əsas problemlərinə də toxundu. Dövlət başçısı dünya nizamının dəyişdiyini, beynəlxalq təşkilatların etibarlılığının zəiflədiyini və yeni təhlükəsizlik mexanizmlərinin yaradılmasının vacibliyini qeyd edərək, Azərbaycanın milli maraqlarını qorumaq siyasətinin uğurlu model olduğunu diqqətə çatdırdı.

Azərbaycan son illərdə həm regional, həm də qlobal siyasətdə önəmli aktorlardan birinə çevrilib. Ölkənin strateji coğrafi mövqeyi, zəngin enerji resursları və balanslaşdırılmış xarici siyasəti onun beynəlxalq nüfuzunu gücləndirib. Xüsusilə, Prezident İlham Əliyevin rəhbərliyi ilə həyata keçirilən siyasət nəticəsində Azərbaycan yalnız Cənubi Qafqazda deyil, daha geniş geosiyasi məkanda təsir gücünü artırıb. Dünyanın hər yerindən siyasətçiləri və ekspertləri bir araya gətirən aparıcı tədbirlərdən biri də Qlobal Bakı Forumudur. Azərbaycan Prezidentinin himayəsi altında və Nizami Gəncəvi Beynəlxalq Mərkəzinin təşkilatçılığı ilə sayca 12-ci dəfə keçirilən “Dünya düzəninin yenidən düşünülməsi: Çağırışların fürsətə çevrilməsi” adlı forumda bəşəriyyəti narahat edən aktual problemlər müzakirə edildi, çıxış yolları axtarıldı, müvafiq təkliflər və tövsiyələr səsləndirildi.

Forum çərçivəsində Prezident İlham Əliyev “Euronews” televiziyasına verdiyi müsahibədə dünya və regional gündəmə toxunaraq mühüm mesajlar verdi. Dövlət başçısı forumun əhəmiyyətindən danışaraq bildirdi ki, XII Qlobal Bakı Forumunun iştirakçıları beynəlxalq arenada vəziyyətin kəskin şəkildə dəyişdiyi bir vaxtda ənənəvi olaraq qlobal gündəlikdə duran məsələlər barədə öz mövqelərini, fikirlərini və yanaşmalarını bölüşürlər. Dövlət başçısının müsahibəsində toxunduğu önəmli məsələlərdən biri də dünyada nizamlı sistemin olmaması barədə səsləndirdiyi fikirlər oldu. Bu gün dünyada sürətli dəyişikliklər gedir və bəzi proseslər xaotik xarakter alır. Qlobal səviyyədə müxtəlif siyasi, iqtisadi və ekoloji problemlər son illərdə daha mürəkkəb hala gəlib. Əvvəllər mövcud olan qaydalar və strukturlaşmış beynəlxalq münasibətlər bəzi hallarda öz effektivliyini itirir. Bununla yanaşı, yeni güc mərkəzlərinin meydana gəlməsi, texnologiyanın sürətli inkişafı və pandemiya kimi qlobal miqyaslı hadisələr bu vəziyyəti daha da mürəkkəbləşdirib. Prezident İlham Əliyev müsahibəsində məhz bu məqamlara toxunaraq əlavə etdi ki, bu gün hər kəs tərəfindən bölüşülən fikir odur ki, hazırda yeni qaydaların müəyyənləşdirilməsi prosesi baş verir.

Dövlət başçısı müsahibədə diqqətə çatdırdı ki, beynəlxalq ictimaiyyət tərəfindən istifadə olunacaq qarşılıqlı əlaqə konfiqurasiyası heç kəsə bəlli deyil. Prezident İlham Əliyevin dünyada cərəyan edən geosiyasi və geoiqtisadi proseslərə baxışını əks etdirən bu fikirlərdən aydın olur ki, hər bir ölkə öz gücünə və imkanlarına güvənməlidir. Beynəlxalq yardıma və hüquqa arxalanmaq artıq risklidir. Yaxın tarixə nəzər salanda görürük ki, Azərbaycan müstəqillik illərində beynəlxalq səviyyədə ikili standartlara məruz qaldı və problemlərinin həllində müvafiq beynəlxalq təşkilatlardan hər hansı bir yetərli dəstək almadı. Prezidentin qeyd etdiyi kimi, ölkəmiz beynəlxalq hüququn selektiv tətbiqinin qurbanı oldu. Dövlət başçısı müsahibəsində birmənalı şəkildə vurğuladı ki, milli maraqlar məsələsində Azərbaycan heç kəsə və ya heç bir təsisata arxalanmadı.

Dövlət başçısının müsahibəsində diqqət çəkən məsələlərdən biri də onun Cənubi Qafqaz regionu barədə fikirləri oldu. Bu gün region çox məsuliyyətli mərhələdən keçir. Regionun ən təhlükəli problemi - Qarabağ münasiqəşi həll olundu və müşahidə edilən proseslər Azərbaycanın formalaşdırdığı yeni reallıqlar fonunda cərəyan edir. Bakı Ermənistanın sülh gündəminə sadiq qalmasını və regionda davamlı sülhün yaradılması üçün adekvat addımlar atmasını gözləyir. Barışığa doğru addımlar atmaq lazımdır və Azərbaycan Prezidentinin bəyan etdiyi kimi, region hazırda nisbətən sakit dövrdədir. Amma bu sakitlik real addımlarla təmin olunmalı, gücləndirilməlidir. Prezident bir daha xatırlatdı ki, növbəti hərbi qarşıdurmanı istisna edəcək əhatəli təhlükəsizlik mexanizmləri yaradılmalıdır və sovet dövründə olduğu kimi qonşuluq şəraitində yaşamağa çalışılmalıdır.

Fuad HÜSEYNZADƏ

Binəqədi Rayon İcra Hakimiyyəti yanında İctimai Şuranın katibi

525-ci qəzet .- 2025.- 18 mart(№50).- S.9.