Azərbaycan Milli Xalça Muzeyində “Qəlb” adlı fərdi sərgi açılıb

Azərbaycan Milli Xalça Muzeyində rəssam Aydan Nəbizadənin “Qəlb” adlı fərdi sərgisi açılıb. Sərgidə duyğular, hisslər və rənglərlə zəngin 30-a qədər əsər nümayiş olunur.

Muzeydən AZƏRTAC-a bildirilib ki, “Qəlb” sərgisi Aydan Nəbizadənin uzunmüddətli bədii axtarışlarının, daim dəyişən və inkişaf edən yaradıcılığının uğurlu nəticəsi olmaqla yanaşı, onun daxili aləminə açılan pəncərədir.

Rəssamın bədii düşüncəsində parlaq, cəsarətli, ilhamverici, eyni zamanda həssas, refleksiya və özünüdərk qabiliyyətinə malik qadın obrazları xüsusi yer tutur. Fərdi dünyagörüşünü özünəməxsus texnika ilə birləşdirərək unikal üslub formalaşdıran Aydan xanımın hər fırça toxunuşu düşünülmüş və məqsədyönlüdür. O, bir-birindən fərqli, lakin səmimi hisslər yaradan, xüsusi estetik dəyərə malik əsərlərini müəllif və tamaşaçı arasında ünsiyyət vasitəsi kimi təqdim edir.

Aydan Nəbizadə Azərbaycan təsviri sənətində ilk dəfə qeyri-adi formalı kətanlardan istifadə edən rəssam kimi daim yenilikçi ruhuna sadiq qalır, insanları əsərlərində əks olunan dəyərləri kəşf etməyə səyahətə yönəldir.

“Qəlb” sərgisi mövsümün ən maraqlı mədəniyyət hadisələrindən birinə şahid olmaq, həmçinin müəllifin yaradıcılığını, sənətə yanaşma tərzini, saf, dərin sevgisini duymaq üçün gözəl fürsətdir.

525-ci qəzet .-2025. -19 mart(№51).- S.10.