Qarabağ xalçaları Abşeron torpağında

Builki Novruz ərəfəsində Abşeronun dəniz-torpaq timsallı mavi-sarı rənglərinə Qarabağın allı-güllü çalarları da əlavə olundu.

Suraxanı Rayon İcra hakimiyyəti və Azərbaycan Mədəni İrs Sənətkarlığına dəstək və Kreativ Sənaye İctimai Birliyinin təşkilatçılığı ilə Suraxanıda və Xırdalanda silsilə tədbirlər keçirildi. Qarabağın qədim xalçaçılıq ənənələrini yaşadan yaradıcılıq mərkəzlərinin dəyərli nümunələri geniş auditoriyaya təqdim olundu.

Tədbir təşkilatçılarından biri, Laçın Xalçaçılıq Mərkəzinin rəhbəri Azər Rəsulovun dediyinə görə, sərgilənən sənət əsərləri azad Laçında toxunan xalçalardır. Bu xalçalar ənənəvi Qarabağ texnikası ilə toxunur, amma müasir tələblərə uyğun yenilikçi elementləri də özündə əks etdirir.

Qeyd olundu ki, Suraxanı və Abşeron rayonlarında keçirilən sərgilər ənənəvi xarakter daşıyacaq, həm yerli həm də xarici qonaqların marağını cəlb etmək üçün önəmli bir platformaya çevriləcək.

Qarabağ xalçalarının ornamentlərində Novruzun bütün simvolları əks olunub - səməni də, xonça da, tonqal da, hər biri də əlvan, parlaq rənglərdə.

Tədbir vaxtı Yaradıcı Mərkəzin “Box”ça layihəsi də təqdim edildi. Novruz bayramında boxça bağlamaq ənənəsi ailələr və yaxın dostlar arasında məhəbbəti və birliyi əks etdirib.

Sözügedən sərgiləri Abşeron camaatı heyranlıqla qarşıladı – xalçaların alabəzək fonunda şəkil çəkdirən kim, xalçalara tumar çəkib hərarətini duyan kim, gözəl əl işlərindən zövq alan kim. Bu, həm də keçmişə bir ekskurs oldu. Yaşadılan ənənələr tarixi də daim canlı tutar, unudulmağa qoymaz.

525-ci qəzet .-2025. -19 mart(№51).- S.8.