İnsan Allahın əşrəfidir...

Elçin İsgəndərzadəyə

Günəş qürub edəndə ətraf aləm zülmətə qərq olur. Həmin an torpağın da, gecənin içində çırpınan ilğımların da təlaşı artır. Səhər açılar-açılmaz, günəş yenə öz şölələrini saçır, təlaş itir...

Bəzi insanlar da belədir; gözlərinin qarşısında dağ kimi görünəndə özünü daim qovğadan uzaq bilirsən. Onların varlığı səndə daxili rahatlıq yaradır.

Azərbaycan Elmi-Tədqiqat Aerokosmik İnformatika İnstitutunun direktoru, texnika və filologiya elmləri doktoru, Azərbaycan Texniki Universitetinin professoru, Əməkdar mədəniyyət işçisi Elçin İsgəndərzadə hər dəfə rastlaşanda, adını eşidəndə qürur duyduğumuz simalardandır. O, tanınmış ictimai xadimdir, bir sıra əlamətdar uğurlara imza atıb, bir çox nailiyyətlər, titullar müəllifidir. Bir sözlə, zəngin, dopdolu tərcümeyi-hala malikdir. Həmişə məqsədinə doğru inamla irəliləyib - bəzən təlaşda bişib, bəzən "həyəcan gölü"ndə boğulub, bəzən tikanlı cığırları yalın ayaqla keçib, bəzən də həyatın soyuq materiklərində donub, ancaq heç vaxt məyusluq girdabına düşməyib.

Alim elmin, bütövlükdə cəmiyyətin aynasıdır. Elçin İsgəndərzadə elmə uğur bəxş edən alimlərimizdəndir. Onun sevgisinin əsas cövhəri insana olan sayğısı və diqqətidir. Onun elm dibçəyində hər zaman tərbiyə, əxlaq təcəssümlü "çiçəklər" açıb.

Ədəbi fövqün ən üstün qatlarında ilham pəriləri olur. Şairlərin səmt tapdıqları istiqamətlər o pərilərin işıqları ilə süslənir. Elçin müəllimin də şair mülkünü o pərilər nura qərq edib. Onun hikmətamiz həyat, yaşam və tale paradokslarında bu qaynarlıq real təsəvvürlərdir. Elçin müəllimin şair dərkində şeir bir mütləq, duyğu bir mövcudatdır. Biz onun qələm nümunələrində bu zərrəvi tendensiyanın təqdimatını görürük.

Elçin İsgəndərzadə çoxlarının üz tuta biləcəyi insandır. O, körpəlikdən zəhmət adamı olmaq, istedadla ucalmaq, şəxsiyyət kimi hörmət qazanmaq amalı ilə yaşayıb və alim kimi, insan kimi, şair kimi şöhrət, ehtiram, rəğbət və sevgi qazanıb. Bu qazancın təməlində zəhmət durduğu üçün o, qalxdığı zirvələrdən heç vaxt enməyəcək. Elçin İsgəndərzadə xoşbəxtdir ki, yaşadığı, təqdir etdiyi ömür qədər sevilir. Hörmətli ziyalı, dəyərli alim, şair, publisist, pedaqoq, ən başlıcası, nəcib insan Elçin İsgəndərzadə dost-həmkar diqqətində daim bu görkəmdə özünə yer tapıb. Elçin İsgəndərzadənin timsalında şəstlə, qürurla deyə bilərik ki, insan sözün həqiqi mənasında yaranmışların ən kamili, Allahın əşrəfidir...

Hikmət MƏLİKZADƏ

525-ci qəzet .- 2025. -3 may(№76).- S.20.