Şəhidlik zirvəsində

Ayxan Cəmalləddin oğlu Cəfərovun 44 günlük haqq savaşımızda göstərdiyi qəhrəmanlıqdan onun tanıyanlar qürurla danışır. Əzəldən vətənin torpağına, daşına vurğun olan Ayxan Cəfərov 1996-cı ilin sentyabrın 6-da Cəlilabad rayonunun Üçtəpə kəndində anadan olub. İkinci Qarabağ müharibəsində xüsusi qəhrəmanlıq göstərən Ayxan düşmənə qarşı son damla qanına qədər döyüşüb və 24 yaşında şəhadətə qovuşub.

Ayxan 2015-ci ilin iyul ayında hərbi xidmətə yollanıb. Vətənin keşiyində duran gənc əsgər həm də kəşfiyyatı ixtisası üzrə kurs keçib.

Ayxan düşməndən ilk qisasını 2016-cı ilin Aprel döyüşlərində alıb. Onun kimi vətənini canından əziz tutan qəhrəmanların misilsiz hünəri hesabına uzun illər əsir düşən Tərtərin Suqovuşan, Talış, Qazaxlar, Cəbrayılın Cocuq Mərcanlı kəndləri, Goranboyun bir kəndi, Lələtəpə yüksəkliyi, ümumilikdə 2000 hektarlıq ərazi işğaldan azad olunub.

Hərbi xidməti başa çatandan sonra Ayxan ehtiyata buraxılıb. 2020-ci ilin 27 sentyabrında cəbhədə yaranan vəziyyəti eşidən kimi Müdafiə Nazirliyinə kəşfiyyatçı olduğunu və döyüşlərdə iştirak etmək istədiyini yazıb. Sentyabrın 28-də yenidən hərbi xidmətə çağırılıb. Füzuli bölgəsində Ağcabədi korpusunun könüllülər dəstəsinin tərkibində snayper kimi döyüş meydanına girib. 15 oktyabra qədər düşməndən qisasını layiqincə alıb. Şəhidlik zirvəsinə ucalan Ayxan oktyabrın 17-də boya-başa çatdığı Üçtəpə kəndində dəfn edilib.

Ayxan Cəfərov Vətən müharibəsində göstərdiyi rəşadətə görə "Vətən uğrunda", "Qubadlının azad olunmasına görə" və "Cəbrayıln azad olunmasına görə" medalları ilə təltif edilib.

ZƏFƏR ORUCOĞLU

525-ci qəzet .- 2025.- 6 may(№77).- S.13.