Əli Əmirlinin "Sevdiyim pyeslər"i çapdan çıxıb

Sayca 5-ci pyeslər kitabını "Sevdiyim pyeslər" adlandıran yazıçı-dramaturq Əli Əmirli bu nəşrə əvvəlki kitablardakı pyeslərinin ən yaxşılarını, başqa sözlə, daha çox bəyəndiyi dram əsərlərini toplayıb. Əlbəttə, janrından asılı olmayaraq hansı pyesin daha yaxşı və sevilən olduğunu bir qayda olaraq tamaşaçılar, o cümlədən, rejissorlar, teatrşünaslar, tənqidçilər daha doğru, daha obyektiv müəyyən edirlər, amma bu pyeslərin müəllifinin də fikri az əhəmiyyətli deyil, bir halda ki, dramaturq "Hansı əsərinizi, konkret olaraq, pyesinizi daha çox sevirsiniz?" sualına bir qayda olaraq "Mənim çox sevdiyim, az sevdiyim və heç sevmədiyim pyeslərim var" cavabını verir.

Beləliklə, "Sevdiyim pyeslər" kitabına dramaturq "Köhnə ev", "İyirmi ildən sonra", "Mesenat", "Xoşbəxt gün", "Şah Qacar", "Hasarın o üzü", "Ünvansız qatar", "M.S.S. - Mən səni sevirəm", "Nuri-didə Ceyhun", "Ah, bu uzun sevda yolu" kimi müxtəlif teatrlarda tamaşaya qoyulmuş pyesləri ilə yanaşı, daha çox sevdiyi və hələ ki heç bir teatrda tamaşaya qoyulmamış "İki aktrisa üçün baş rol" və "Pərdəsiz" adlı pyeslərini də daxil edib.

525-ci qəzet.- 2025.- 7 may(№78).- S.9.