"Zərifə və Heydər Əliyevlər. Əbədiyaşar məhəbbət" kitabının Daşkənddə təqdimatı oldu

Özbəkistan Yazıçılar İttifaqında Azərbaycanın Xalq yazıçısı Elmira Axundovanın ölkəmizin Özbəkistandakı səfirliyinin və Heydər Əliyev adına Mədəniyyət Mərkəzinin birgə təşəbbüsü və dəstəyi ilə nəfis şəkildə özbək dilində çap olunan "Zərifə və Heydər Əliyevlər. Əbədiyaşar məhəbbət" kitabının təqdimat mərasimi keçirilib.

AZƏRTAC xəbər verir ki, Azərbaycanın Özbəkistandakı səfirliyi və onun nəzdindəki Heydər Əliyev adına Azərbaycan Mədəniyyət Mərkəzinin (AMM) birgə layihəsi olan bu kitab Ümummilli lider Heydər Əliyevin və görkəmli oftalmoloq-alim, akademik Zərifə xanım Əliyevanın anadan olmasının 101 illiyinə həsr edilib. Kitabı özbək dilinə alim və tərcüməçi Babaxan Məhəmməd Şərif çevirib.

Mərasimdə səfirliyimizin və AMM-in əməkdaşları, elm və mədəniyyət xadimləri, ziyalılar, şair və yazıçılar, ictimaiyyət nümayəndələri, soydaşlarımız, jurnalistlər iştirak ediblər.

Təqdimat mərasimində çıxış edən Babaxan Məhəmməd Şərif bu kitabın Ulu öndər Heydər Əliyevin şəxsiyyəti, ailə həyatı, fəaliyyəti haqqında misilsiz mənbə olduğunu diqqətə çatdırıb, tərcümə prosesindəki işindən danışıb.

Azərbaycanın Özbəkistandakı səfiri Hüseyn Quliyev Elmira Axundovanın yaradıcılığı haqqında söhbət açıb: "Elmira Axundova Ulu öndər Heydər Əliyev və postsovet məkanının ən praqmatik siyasi xadimlərindən biri olan İlham Əliyev haqqında qələmə alınmış, tutarlı fakt və materialları özündə əks etdirən kitabların müəllifi kimi tanınır. "Zərifə və Heydər Əliyevlər. Əbədiyaşar məhəbbət" kitabında xalqımızın tarixində müstəsna yeri olan iki parlaq şəxsiyyətin - Zərifə və Heydər Əliyevlərin boya-başa çatdıqları ailələrindən, uşaqlıq və gənclik illərindən, həyatın bütün çətinliklərinə birgə sinə gərməyə kömək edən əbədiyaşar məhəbbətlərindən söhbət açılır".

Səfir deyib ki, bu qiymətli kitabda Ümummilli lider Heydər Əliyev və Zərifə xanım Əliyevanın həyatı, bu böyük şəxsiyyətlərin gəncliyi, onların ailə münasibətləri, həyatlarının ən yaddaqalan, sevincli məqamları haqqında məlumatlar, eləcə də bu ailəyə yaxın insanların xatirələri yer alıb.

Özbəkistan Yazıçılar İttifaqının "Cahan ədəbiyyatı" jurnalının baş redaktoru Əhmədcan Melibayev deyib ki, dünyaşöhrətli siyasi xadim Heydər Əliyevin ideyaları türkdilli dövlətlər arasında, xüsusən də bu ölkələrin mədəniyyət sahəsində əlaqələrinin inkişafında həmişə mühüm rol oynayıb.

O, Özbəkistan Yazıçılar İttifaqının təşəbbüsü ilə "Türk dövlətlərinin ədəbiyyat inciləri" adlı 100 cildlik kitabın çap olunduğunu, 16 cildin Azərbaycan ədəbiyyatına həsr edildiyini vurğulayıb.

Sonra o, Elmira Axundovanın Özbəkistan Yazıçılar İttifaqının fəxri üzvü seçildiyini bildirib, bu münasibətlə təbriklərini çatdırıb, üzvlük vəsiqəsini Elmira Axundovaya təqdim edib.

Filologiya elmləri doktoru, professor Nurbay Cabbarov, Özbəkistan Yazıçılar İttifaqının üzvü İsmat Kuçiyev, professor Cəmilə Şermuxammedova və başqaları çıxış edərək kitabın əhəmiyyətindən danışıblar.

Sonra Elmira Axundova "Zərifə və Heydər Əliyevlər. Əbədiyaşar məhəbbət" kitabı üzərindəki işindən söz açıb: "Daşkəndlə və onun sakinləri ilə tanışlığım XX əsrin 60-cı illərinin ortalarına gedib çıxır. O zaman atam məni - məktəbli bir qızı Özbəkistanın paytaxtına gətirmişdi. Mən bu möcüzəvi paytaxtla tanış oldum və onun rahat, kölgəli küçələrinə, sərin sulu kanallarına, mehriban və açıq insanlarına sonsuz bir eşqlə vuruldum. Sonra isə 1966-cı ildə Daşkənddə qorxunc zəlzələ baş verdi və biz bütün ailə olaraq bu faciəni yaşadıq. İttifaqın digər respublikaları kimi Azərbaycan inşaatçıları da bu şəhərin bərpasında fəal iştirak etdilər.

90-cı illərdə Azərbaycan Prezidentinin mətbuat xidmətinin əməkdaşı olaraq mən Özbəkistan Prezidenti İslam Kərimov və Azərbaycan Prezidenti Heydər Əliyevin qarşılıqlı səfərlərini işıqlandırırdım, onların səmimi dostluq münasibətlərini öz gözlərimlə müşahidə etmək imkanı qazandım və hər ikisindən müsahibə aldım.

Azərbaycanın Özbəkistandakı səfiri hörmətli Hüseyn Quliyevin dəvəti ilə dəfələrlə Daşkənddə səfirlik tərəfindən təşkil olunan müxtəlif tədbirlərdə iştirak etmişəm, ölkənin ədəbi və elmi elitası ilə əlaqələr qurmuşam. Bu səfərlər zamanı Hüseyn müəllim məni Özbəkistanın ilk dəfə "Daşnaksutyun"un terrorçu mahiyyətini və ölkədəki cinayətlərini açan dəyərli əsərlər yaradan alim Şuxrat Salamovla tanış edib. Erməni millətçiləri Salamova qarşı qarayaxma kampaniyası başlayanda digər jurnalistlərlə birlikdə mən də onun müdafiəsinə qalxdım.

Sonra səfirin təşəbbüsü ilə biz Daşkənddə "İlham Əliyev. Dəyişikliklər fonunda prezidentin portreti" adlı kitabımı tərcümə edib nəşr etdik.

"Zərifə və Heydər Əliyevlər. Əbədiyaşar məhəbbət" kitabının Daşkənddə özbək dilində nəşrindən sonra, Ümummilli lider Heydər Əliyev haqqında yeni kitabım çap üçün hazırlanır. Bütün bunlar üçün bizim səfirimiz Hüseyn Quliyevə çox minnətdaram. O, mədəniyyət diplomatiyasına böyük önəm verir. Dövlətlərarası əlaqələrimizin canlanması dövründə iki prezident - İlham Əliyev və Şavkat Mirziyoyev arasında çox dinamik qardaşlıq münasibətləri qurularkən, mədəni və ədəbi körpülərin yaradılması mənim üçün də son dərəcə vacibdır. Sevinirəm ki, mənim kitablarım bu münasibətlərdə kiçik bir töhfə, ölkələrimiz arasında dostluq və harmoniyanın möhkəmləndirilməsi üçün atılmış bir addımdır".

525-ci qəzet.- 2025.- 7 may(№78).- S.9.