Qurreyhaqurrey

Klassik aşıq poeziyasının ustad nümayəndələrin olan Aşıq Alı şeirlərindən birində yazırdı:

Evdə arvadına sözü keçməyən,

İndi koxa olub, el dolandırır.

Aradan illər keçsə də, ustad aşığın bu misraları bu gün də çox müasir səslənir.

...Sovet vaxtı "Kirpi" satirik jurnalında bir rəsm dərc olunmuşdu. Rəssam radiotexnika üzrə elmlər namizədi dərəcəsi olan alimin radioqəbuledicinın xırda bir detalını təmir etdirmək üçün onu usta yanına apardığını təsvir etmişdi.

Həyatda belə hallarla az rastlaşmırıq. Məsələn, dəfələrlə evlənib-boşanmış adamlar teleradio verilişlərində ailə dəyərləri haqqında mühazirələr oxuyurlar. Və ya ali tibb təhsili olan həkim-pediatr adi soyuqdəymə zamanı müalicə üçün uşağını xəstəxanaya aparır. Ölməz Hüseyn Cavidin misraları yada düşür: "Rəqsi təlim edir axsaqlar".

Bir neçə il bundan qabaq televiziya kanallarının birində ağsaçlı bir həkim ağaran saçları öz əvvəlki rənginə qaytaran şampunu reklam edirdi. İndi ölkəmizdə fəaliyyətdə olan məşhur klinikalardan birində isə tibb müəssisəsinə müraciət edən xəstələrə uzunömürlülük eliksiri tövsiyə olunurdu, halbuki eliksirin ixtiraçısı olan həmin klinikanın direktoru 55 yaşında gözlərini bu dünyaya əbədi yummuşdu... Başqa bir televiziya kanalında isə aparıcı uzun illər teatr səhnəsində çalışan Xalq artisinin oynadığı rolları, yaratdığı obrazları bir kənara qoyub, onu yalnız toy, şənlik və ziyafətlərin tamadası kimi təqdim edirdi.

Metroya düşürsən, mağazaya girirsən, küçə ilə gedirsən, avtobusa minirsən - hər yerdə belə təzadlı hallarla üzləşirsən. Elə adamlar var ki, görürsən, yanında da iki-üç nəfər dar küçədə şellənə-şellənə gedir: nə arxadan, nə də qarşıdan gələni fikirləşir. Avtobusun tən ortasında gövdəsi ilə gediş-gəlişi kəsərək dayananlar da olur, nə o tərəfə gedir, nə də bu tərəfə. Deməsən, itələməsən, tərpənmir.

Yaxud metro kartına pul yükləmək üçün ödəniş terminalına yaxınlaşan şəxs əvvəlcə çantasında axtarış apararaq kartını və ya nömrəni tapır, daha sonra pul kisəsindən pul çıxararaq prosesi yerinə yetirir və terminaldan uzaqlaşır. Həmin müddətdə onsuz da sıx olan sıra bir az da sıxlaşır. Yaxud ictimai nəqliyyata özü minəndən sonra ətrafındakıları düşünmədən dayandığı yerdə durub qalmaq, ictimai yerdə telefonla ucadan danışmaq, uzun avtomobil tıxacı zamanı özündən əvvəlki avtomobilə siqnal vermək, yeri gəldi-gəlmədi özünün şəxsi keyfiyyətlərini və hansısa bacarıqlarını qabartmaq, uşaqlarını hamınınkından fərqli tutmaq...

Aşıq Hüseyn Saraclı bir dəfə dastan danışanda deyir ki, çoban qoyunları su içmək üçün bulağın üstünə endirir və başlayır qurreyhaqurrey deməyə. Qulaq asanlardan biri sual verir ki, aşıq, bəs o qurreyhaqurrey nə deməkdir? Deyir ki, qoyunun da içində qananı-qanmazı olur, qurreyhaqurrey deməsən, su içmək lazım olduğunu anlamır...

Süleyman QARADAĞLI

525-ci qəzet.- 2025.- 8 may(№79).- S.16.