Ağdam ictimaiyyəti Ümummilli lideri Filarmoniyada konsertlə yad edib

Müslüm Maqomayev adına Azərbaycan Dövlət Akademik Filarmoniyasında “Konstitusiya və Suverenlik İli” çərçivəsində Ulu öndər Heydər Əliyevin anadan olmasının 102 illiyinə həsr olunmuş konsert proqramı təşkil edilib.

Ağdam Rayon İcra Hakimiyyətinin, Yeni Azərbaycan Partiyası Ağdam Rayon Təşkilatının, Elm və Təhsil Nazirliyinin və Azərbaycan Dövlət Akademik Filarmoniyasının birgə təşkilatçılığı ilə baş tutan tədbirdə Rayon İcra Hakimiyyətinin başçısı Vaqif Həsənov, aparatın əməkdaşları, Yeni Azərbaycan Partiyası sədrinin müavini-Mərkəzi aparatın sədri Tahir Budaqov, Yeni Azərbaycan Partiyası Ağdam rayon Təşkilatının sədri Mansur Quliyev, Milli Məclisin deputatları Aqil Abbas, Bəxtiyar Əliyev, Azərbaycan Dövlət İqtisad Universitetinin rektoru Ədalət Muradov, Bakı Slavyan Universitetinin rektoru Anar Nağıyev, ziyalılar və ictimaiyyət nümayəndələri, Ağdam Musiqi Kollecinin müəllim və tələbə heyəti iştirak edib.

Tədbir Dövlət Himninin səsləndirilməsi ilə başlanıb, ölkəmizin ərazi bütövlüyü və suverenliyi uğrunda şəhid olmuş Vətən övladlarının və Ulu öndər Heydər Əliyevin əziz xatirəsi bir dəqiqəlik sükutla yad edilib.

Əvvəlcə Ulu öndər Heydər Əliyevin həyat və fəaliyyətindən bəhs edən videoçarx iştirakçılara təqdim olunub.

Tədbirdə Ağdam Musiqi Kollecinin “Qarabağ” instrumental ansamblının müşayiəti ilə Respublikanın əməkdar artisti Fehruz Səxavətin və kollecin müəllim və tələbə heyətinin ifasında rəngarəng musiqi nömrələri dinlənilib.

Sonda Yeni Azərbaycan Partiyasının himni səsləndirilib.

525-ci qəzet.- 2025.- 9 may(№80).- S.13.