Gənclər Kitabxanasında “Kürəkçay” müqaviləsi haqqında icmal

Respublika Gənclər Kitabxanasında Kürəkçay” müqaviləsinin 220 illiyi münasibətilə biblioqrafik icmal hazırlanıb.

Kitabxanadan AZƏRTAC-a bildirilib ki, vəsaitin hazırlanmasında əsas məqsəd gənc nəsli dövlətçilik tariximizin qara səhifələrindən biri – “Kürəkçay” müqaviləsi haqqında məlumatlandırmaq və bu mövzuya dair nəşr edilən kitabları onların diqqətinə çatdırmaqdır.

İcmalda Rusiya ilə Azərbaycanın münasibətlərinə dair mühüm sənədlərdən biri sayılan bu müqavilənin təkcə Qarabağın deyil, bütünlükdə Azərbaycanın taleyində oynadığı rolu, əsas müddəaları, həyata keçirilməsi və acı nəticələri haqqında geniş məlumat verilir, 11 maddədən ibarət olan “Kürəkçay” müqaviləsinin tam mətni təqdim olunur. Həmçinin Kürəkçay müqaviləsi haqqında Azərbaycan, türk, rus və ingilis dillərində çap edilən “Qarabağ: XIII əsrdən 1920-ci ilədək”, “Qarabağ: mif və həqiqət”, “Azərbaycanın əzəli və əbədi torpağı İrəvan xanlığı”, “Münxendən başlayan zəfər”, “Şimali Azərbaycanın Çar Rusiyası tərəfindən işğalı”, “Kürekçay anlaşmasından Şuşa beyannamesine Karabağ”, “Karabakh from the 13th century to 1920” kimi 30-a yaxın kitabın biblioqrafik təsviri, qısa annotasiya və dövrü mətbuat nümunələri sərgilənir.

525-ci qəzet .- 2025.-15 may(№83).- S.9.